काठमाडौं– जन्म मितिको विवादमा तानिएपछि नेपाल प्रहरीका नायव महानिरीक्षक (डीआईजी) अशोक सिंहले राजीनामा दिएका छन्। डीआईजी सिंहले बुधबार प्रहरी प्रधान कार्यालयमा राजीनामा बुझाएका हुन्।
प्रहरी उच्च स्रोतले सिंहले राजीनामा दिएको पुष्टि गर्यो। स्रोतले भन्यो, ‘उहाँ राजीनामा दिएर जानु भएको छ। अब स्वीकृतका लागि सम्बन्धित ठाउँमा पठाइन्छ।’
काठमाडौं बागबजारका विश्वप्रकाश भेटवालले डीआईजी सिंहको फरक–फरक जन्म मिति रहेको पाइएको, शैक्षिक प्रमाणपत्रसमेत नक्कली बनाएको लगायतको आरोप लगाउँदै अख्तियार दुरुपयोग अनुसन्धान आयोगमा उजुरी दिएका थिए। उक्त उजुरीपछि छानबिनको क्रममा डीआईजी सिंहको जन्म मिति नै फरक–फरक रहेको पाइएको थियो।
सिंहको २०४२ जेठ २२ गते जिल्ला प्रशासन कार्यालय कैलालीबाट जारी भएको एउटा नागरिकताको प्रतिलिपिसमेत फेला परेको थियो। उक्त नागरिकता प्रमाणपत्रमा नागरिकता जारी भएको बेला सिंह १८ वर्ष उमेर पूरा भएको उल्लेख छ।
नागरिकता लगायतका प्रमाणपत्रमा जन्म मितिको विवरणमा वर्ष मात्रै उल्लेख भएको अवस्थामा जारी भएको मितिलाई नै जन्म भएको मिति तथा महिना र गते कायम हुने भनेर प्रहरी निमायवली उल्लेख गरिएको छ। जसअनुसार सिंहको जन्म मिति २०२४ जेठ २२ गते हुन्छ।
तर शैक्षिक प्रमाणपत्र लगायत अन्य कागजातमा तथा सिट रोलमा भने सिंहको जन्म मिति २०२५ पुस १६ गते उल्लेख छ। सोही जन्म मितिको आधारमा उनले २०५० सालमा प्रहरी निरीक्षक भर्नाका लागि आवेदन दिएका थिए।
प्रहरी नियमावलीको व्यवस्थाअनुसार जन्म मितिको अन्तर १ वर्षभन्दा बढीको देखिएमा वर्षमात्रै उल्लेख भएको प्रमाणपत्र अनुसार उमेर गणना हुनुपर्ने हुन्छ।
जसअनुसार उनको जन्म मिति २०२४ जेठ २२ गते कायम हुन्छ। उक्त जन्म मितिलाई आधार मान्दा सिंहको प्रहरी सेवा प्रवेश नै अवैधानिक हुन्छ।
अर्कोतर्फ भने ५५ वर्ष पूरा भएपछि एसएसपी अनिवार्य अवकाशमा जाने प्रावधान नियमावलीमा छ। सिंह गत जेठ २२ गते ५५ वर्ष पूरा भएको देखिन्छ। त्यसपछि अवकाशमा जानुपर्ने उनी अवकाशमा नगइ १ महिनापछि डीआईजीमा बढुवा भएका थिए। अवकाशमा गइसकेका व्यक्ति डीआईजी भएको पाइएपछि प्रहरी किताबखानाले अवकाश पत्र थमाउने तथा बर्खास्तसम्म गर्ने सक्ने अवस्था हुन्थ्यो।
बर्खास्त भएको अवस्थामा निवृत्तिभरण तथा अन्य सेवा सुविधा समेत नपाउने भएकाले त्यस अगावै सिंहले राजीनामा दिएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
