भक्तपुर– हरेक चार–चार वर्षमा भाडाको भवनमा सर्दै आएको बागमती प्रदेशस्तरीय यातायात व्यवस्था कार्यालय (सवारी चालक अनुमति पत्र) को आफ्नै भवन निर्माण कार्यको प्रारम्भमै जिल्ला समन्वय समितिले अवरोध गरेको छ।
बागमती प्रदेश सरकारको बजेटमा भक्तपुरको सूर्यविनायक नगरपालिका–७ गण्डुस्थित हाकेडाँडामा ११ रोपनी क्षेत्रफलमा सवारी चालक अनुमति पत्र वितरणदेखि बिलबुक नवीकरणसम्म एकै ठाउँमा गर्नेगरी कार्यालयको आफ्नै भवन निर्माणका लागि जमिन सम्याउने र माटो व्यवस्थापन गर्ने कार्य सुरु भएको छ।
तर, माटो सम्याउने र व्यवस्थापन गर्ने कार्य तत्काल रोक्न जिल्ला समन्वय समितिले नै निर्देशन दिएपछि अवरोध पुगेको भन्दै सूर्यविनायक नगरपालिकाले आपत्ति जनाएको छ।
एकसाता अगाडि नेकपा एमालेका पोलिटब्यूरो सदस्य पूर्व सांसद तथा पूर्वमन्त्री महेश बस्नेत, बागमती प्रदेश सरकारका भौतिक तथा यातायात मन्त्रालयका सचिव शंकर भण्डारी, बागमती प्रदेश सभा सदस्य किरण थापा, वडाअध्यक्ष रविन्द्र सापकोटालगायत प्राविधिक टोलीसहितको फिल्ड अनुगमनलगत्तै प्रदेश सरकारले भवन निर्माण प्रक्रिया तत्काल अगाडि बढाउन जमिन सम्याउन निर्देशन दिएपछि तीन दिनदेखि माटो व्यवस्थापनको काम सुरु भएको हो।
नेता बस्नेतको पहलमा प्रदेशका पूर्व मुख्यमन्त्री डोरमणि पौडेलकै पालामा तत्कालीन मन्त्रालयले १३ करोड बजेट विनियोजन गरी ठेक्का आह्वान गरेकोमा कौशिल बस्नेत निर्माण सेवा प्रालिले २०७८ माघ २७ गते ठेक्का सम्झौता गरे पनि विभिन्न कारणले रोकिएको भवन निर्माण कार्य सुरु हुन लाग्दा पुन: अवरोध आएको हो।
नेकपा एमालेका नेता बस्नेतले विगतमा पनि यातायात कार्यालय निर्माणमा अवरोध खडा गरेको र अहिले पनि केही तत्व त्यसरी नै कार्यालय निर्माण हुन नदिन लागिरहेको बेलामा बताए। उनले यसरी अवरोध आउन नहुने भन्दै कानुनसम्वत कुरालाई कसैले रोक्न नहुने धारणा राखे।
यता जिल्ला समन्वय समितिका प्रमुख ईश्वरबहादुर थापाले माटो तथा खानीको अनुगमन गर्ने निकाय आफ्नो मातहतमा रहेकाले जिससलाई जानकारी नै नगराई माटो झिक्ने र लैजाने काम गरेकाले रोकेको बताए।
उनले भने, ‘जिल्लामा धेरै ठाउँमा माटो, बालुवा खानीको उजुरी आइरहेका छन्, जिससलाई जानकारी नै नगराई काम गरे जुनसुकै ठाउँको भएपनि रोक्छौं, त्यसैले यो आफ्नै गाउँको भए पनि रोकेको हुँ, मैले नै प्रहरी, प्रशासनलाई रोक्न भनेको हुँ।’
सूनपा–७ का वडाध्यक्ष एवं नगरपालिकाका प्रवक्ता रविन्द्र सापकोटाले प्रदेश सरकारको विकासको कामलाई सघाउन स्थानीय शासन ऐन अन्तर्गत स्थानीय तहले प्रक्रिया पुर्याएर काम गर्दा पनि जिम्मेवार निकायबाट अवरोध आएको बताए। उनले भने, ‘बागमती प्रदेश सचिवबाट निर्देशन आएपछि जग्गा सम्याउन र बढी भएको माटो व्यवस्थापनका लागि वडा कार्यालयले स्थानीयको नाममा पाँचदिने सार्वजनिक सूचना जारी गरेको थियो, त्यसपछि नगरपालिकाको ऐन, नियम अन्तर्गत फागुन १५ गतेसम्म १० दिनका लागि नियमानुसार राजस्व लिएर माटो व्यबस्थापनका लागि ठेक्का लगाएका छौं, नियम संगत काम गर्दा जिसस प्रमुखले फिल्डमै गएर रोक्न खोज्नु भएछ, जगातीको डिएसपीले सबै गाडी र डोजर समातेर ल्याउन निर्देशन दिनुभएछ, यसमा हामीले आपत्ति जनाएका छौं।’
जिल्ला समन्वय प्रमुख, प्रमुख जिल्ला अधिकारी र प्रहरीलाई नियमसंगको सबै कागज पठाएपछि काम सुरु भएको बताउँदै यातायात कार्यालयको भवन निर्माण गर्न नदिने केही तत्वले विगतमा जस्तै चलखेल गरिरहेको उनले आरोप लगाए। भवन निर्माण स्थलको स्वायल टेष्ट (माटो परीक्षण) समेत गरेर काम सुरु गरेको बताए।
यसबारेमा प्रमुख जिल्ला अधिकारी खगेन्द्र रिजालले भने, ‘जथाभावी माटो उत्खनन् गरेको भन्ने उजुरी आयो, त्यसैले अधिकार प्राप्त निकाय नगरपालिकासँग बुझ्यौं, नियम संगत नै रहेको थाहा पायौं, नियमसंगत भएका काममा हाम्रो अवरोध रहँदैन।’
भक्तपुरमा हाल सवारी चालक अनुमतिपत्र वितरण सम्बन्धी सम्पूर्ण कार्य गर्नेगरी मध्यपुरथिमिको राधेराधेमा भाडाको साँघुरो घरमा कार्यालय सञ्चालन भइरहेको छ भने सल्लाघारीस्थित अर्को भाडाको घरमा सवारी धनीपुर्जा बिलबुक नवीकरण, धुवा पासलगायतका काम हुँदै आएको छ। भवन निर्माणसँगै दुबै एकै ठाउँमा आफ्नै भवनमा बस्ने र सरकारको भाडामा जाने खर्च कटौती हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1753263770.jpg)
-1764146706.png)
