सिक्दै, कमाउँदै कार्यक्रम प्रभावकारी

श्रम-रोजगार

रासस मंगलबार, फागुन ९, २०७९ १६:५०

म्याग्दी– म्याग्दीको मालिका गाउँपालिका–७ बिमको किसानी प्राविधिक शिक्षालयमा सञ्चालित सिक्दै, कमाउँदै कार्यक्रम प्रभावकारी बनेको छ। विद्यालयमा सैद्धान्तिकसँगै व्यावहारिक ज्ञान सीपका साथै विद्यार्थीले पशुपक्षीपालन र तरकारी खेती गरेर आम्दानी गरेका हुन्।

बाली र पशु विज्ञान विषयका डिप्लोमा तहको पठनपाठन सञ्चालन गरेको शिक्षालयका प्रमुख करन कँडेलले सिक्दै र कमाउँदै कार्यक्रम प्रभावकारी बनेको बताए। ‘विद्यार्थीलाई सैद्धान्तिकका साथै व्यवहारिक हिसाबले खेती र पशुपालनमा सहभागी गराउँदा सिक्न सहज भएको छ,’ उनले भने, ‘प्रयोगात्मक अभ्यासका लागि गरेको पशुपक्षीपालन र तरकारी खेतीबाट आम्दानी पनि गरेका छन्।’

पशु र बालीविज्ञान विषय पढ्ने विद्यार्थीले आलु, बन्दा, काउली, च्याउ खेतीका साथै हाँस, कुखुरा, बाख्रा, खरायो र बङ्गुर पालेका छन्। एक सयभन्दा बढी विद्यार्थीले सामूहिक रुपमा तरकारी र पशुपक्षीपालन गरेका हुन्। स्थानीय जातको कुखुरापालनबाट खर्च कटाएर ४० हजार आम्दानी भएको किसानी माविको सिक्दै कमाउँदै कार्यक्रमका संयोजक सामेल पाण्डेले बताए।

प्रयोगात्मक अभ्यासका लागि मौसमी र बेमौसमी तरकारी विद्यार्थीले आफै उपयोग गर्न पाएका छन्। उत्पादन भएको तरकारी, पशुपक्षी बिक्री वितरणको काम विद्यार्थी आफैंले गर्छन्। बिम गाउँका साथै दरवाङ र बेनीसम्म तरकारी, खसी, बङ्गुर, कुखुरा र हाँस बिक्री हुने गरेको छ।

गोठ र खेतबारीमा प्रयोगात्मक अभ्यास गर्दा शिक्षकले पढाएको सिक्न र बुझ्न तथा सम्झन सजिलो हुने विद्यार्थी सन्ध्या सुवेदीले बताइन्।

१५ रोपनीमा आलु रोपेका विद्यार्थीले हाल केन्य र गोब्रे जातको च्याउ उत्पादन गरेका छन्। विद्यालयले बीउ, मल र विषादीको व्यवस्थापन गरेको छ। तरकारी र पशुपक्षी बिक्रीको आम्दानी खर्च कटाएर विद्यार्थीले बाँड्ने गरेका छन्।

तरकारी खेती र पशुपक्षीपालनका लागि विद्यालयलाई युवा स्वरोजगार कोषले पाँच लाख उपलब्ध गराएको थियो। यसवर्ष गण्डकी प्रदेशको सामाजिक तथा स्वास्थ्य मन्त्रालयले पाँच लाख विनियोजन गरेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।