काठमाडौं– नेपालकै अग्रणी लजिस्टिक्स कम्पनी उपायले आफ्ना सेवाहरु विस्तार गर्ने क्रममा प्रविधि र पूर्वाधारमा लगानी गर्ने योजना अनुरुप विराटनगरमा ‘उपाय स्टेशन’ सञ्चालनमा ल्याएको छ।
करिब ३ बिगाको क्षेत्रफलमा फैलिएको उपाय स्टेसनमा ड्राइभर पार्टनरहरुलाई विश्राम केन्द्र, ७० भन्दा धेरै ट्रकहरु पार्क गर्न मिल्ने व्यवस्था, लुगा धुने र नुहाउने स्थान, ट्रक मर्मत केन्द्र र सहुलियत क्यान्टिनको सुविधा उपलब्ध छ।
पूर्वपश्चिम राजमार्गको टंकीसिनवारीमा अवस्थित उपाय स्टेशन नेपालकै पहिलो विश्राम केन्द्र हो। त्यस स्टेशनमा सामान भण्डारण र वितरणको पनि व्यवस्था गरिएको छ। उपायले नेपालको सातैवटा प्रदेशमा उपाय स्टेशन खोल्ने योजना राखेको छ।
फागुन ५ गते उपाय स्टेशन विराटनगरको उद्घाटन गर्दै उपायका सञ्चालक तथा सहसंस्थापक रन्जीव श्रेष्ठले उपायको ३ सेवाहरुका बारेमा विस्तृत चर्चा गरे। उनले पहिलो सेवामा प्रविधिको मद्दतबाट दुईपांग्रेदेखि २१ टनको ट्रकसम्मको गाडी नेपालका ठूला सहरमा बुक गर्न मिल्ने सुविधा रहेको बताए।
दोस्रो सेवामा साना पार्सल, त्तच् कोड र सबै खाले सामान नेपालभरि प्रत्यक ग्राहकको घरदैलोमा पुर्याउने र त्यसैगरी अन्तर्राष्ट्रिय मापदण्डको सुविधासम्पन्न गोदाम व्यवस्थापन, भण्डारण र माग अनुसारको वितरणको सुविधा प्रदान गर्ने उपायको तेस्रो सेवामा पर्ने श्रेष्ठले बताए।
‘प्रविधिको माध्यमबाट ढुवानी व्यवसायलाई डिजिटाइज र सहजीकरण गर्दै समस्त लजिस्टिक क्षेत्रको सुदृढीकरण गर्ने योजना उपायको रहेको छ’, उनले भने।
पूर्वाधार विकासको सन्दर्भमा, उपायले नेपालका ६० भन्दा बढी सहरमा आफ्ना शाखा फैलाएको छ र आगामी वर्षहरुमा आफ्ना शाखा, फ्रेन्चाइज साझेदार, उपाय स्टेसन र अन्तर्राष्ट्रियस्तरको भण्डारण केन्द्रमार्फत नेपालका सातै प्रदेशहरुमा सेवाहरु विस्तार गर्ने लक्ष्य राखेको छ।
उपाय एक नाफामूलक संस्थामात्र नभइ सम्पूर्ण लजिस्टिक क्षेत्र र ड्राइभर पार्टनरहरुको जीवनस्तर उकास्ने तथा सामाजिक मूल्य प्रभाव सिर्जना गर्न उत्सुक रहेको बताएको छ।
‘तसर्थ, डोल्मा इम्प्याक्ट फन्डजस्ता हाम्रा लगानीकर्ता र यूकेएड/स्विसकन्ट्याक्टजस्ता विकास साझेदारको सहयोगमा उपायले ड्राइभर पार्टनरहरुका लागि रोजगारीका अवसरहरु सिर्जना गरेर र पूर्वाधार सुविधा तथा प्राविधिक दक्षताको तालिम प्रदान गरेर उनीहरुको जीवनस्तर उकास्ने जिम्मा लिँदै आएको छ’, श्रेष्ठले भने, ‘डिजिटल नेपालको ढुवानी मेरुदण्ड बन्ने उपायको उद्देश्य रहेको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
