काठमाडौं– आगामी शनिबार राष्ट्रपतिका लागि उम्मेदवारी मनोनयन हुनेछ। त्यसका लागि दलहरु आन्तरिक हिसाबकिताबमा लागेका छन्।
पुस १० को नाटकीय राजनीतिक परिदृश्यले प्रधानमन्त्री बन्न पुगेका माओवादी अध्यक्ष पुष्पकमल दाहाल ‘प्रचण्ड’ले नयाँ राष्ट्रपति सर्वस्वीकार्य हुनुपर्ने भन्दै राष्ट्रिय सहमतिको कुरा सार्वजनिक तहमा ल्याएका छन्।
यता सत्ता गठबन्धनको प्रमुख दल नेकपा एमाले भने पुस १० मा गरिएको सहमतिअनुसार नै हुनुपर्ने जोडमा छ। एमाले अध्यक्ष केपी शर्मा ओलीले राष्ट्रपतिको सन्दर्भमा पुस १० को सत्तारुढ दलबीच भएको सहमति अनुसार नै जानुपर्ने अडानमा छन्।
राष्ट्रपतिका लागि त्यतिबेलै सहमति भइसकेको भन्दै ओलीले माओवादीसहितका दलहरुको समर्थनमा एमालेको उम्मेदवारले नै राष्ट्रपति निर्वाचन जित्ने दाबी गर्दै आएका छन्।
आइतबार मात्रै ओलीले विराटनगर विमानस्थलमा पत्रकारहरुसँग कुरा गर्दै एमालेको उम्मेदवारलाई माओवादीले समर्थन गर्ने कुरामा कुनै शंका नभएको दाबी गरे। वर्तमान समीकरण बन्दा नै राष्ट्रपति एमालेले पाउने सहमति भएकाले १३ फागुनमा मात्रै एमालेका तर्फबाट राष्ट्रपतिको उम्मेदवार सार्वजनिक हुने बताए।
विराटनगरमा ओलीले यसो भनिरहँदा यता सुर्खेत पुगेका कांग्रेस महामन्त्री विश्वप्रकाश शर्माले भने राष्ट्रपतिमा कांग्रेसको उम्मेदवार निर्वाचित हुने दाबी गरेका छन्। संसद्मा ठूलो दल हुनुका नाताले पनि राष्ट्रपति कांग्रेसले नै पाउने उनको दाबी थियो।
नेपाली कांग्रेस सुर्खेतले आयोजना गरेको कार्यक्रममा उनले भने, ‘राष्ट्रपति कांग्रेसले उमेदवार बनाएको व्यक्ति बन्नुहुन्छ, त्यसमा कुनै शंका छैन।’
शर्माले अबको केही दिनमा पुरानै गठबन्धन ब्यूँतिने पनि दाबी गरे। हुन त कांग्रेस महामन्त्री शर्माले आइतबार गरेको दाबी नयाँ भने होइन। उनले सभामुखको निर्वाचनयता यो कुरा पटक–पटक दोहोर्याउँदै आएका छन्।
पुस १० मा एमालेसहित साना दलहरुको समर्थनमा प्रधानमन्त्री बनेका माओवादी अध्यक्ष प्रचण्डलाई पुस २६ गते नेपाली कांग्रेसले विश्वासको मत दिएपछि नेपाली राजनीति राष्ट्रपतिलाई लिएर तरंगित बन्न पुगेको छ।
पछिल्ले केही समय यता हेर्ने हो भने दलहरुको सम्पूर्ण शक्ति नै राष्ट्रपति निर्वाचनमा केन्द्रित भएको देखिन्छ। एमाले अध्यक्ष ओली र प्रधानमन्त्री प्रचण्डको दैनिक जसो भेटघाट र छलफल सँगै काग्रेस नेताहरुको पनि भेटघाट र छलफलहरु तीव्र देखिन्छ।
पछिल्लो अपडेट अनुसार आइतबार नेकपा एकीकृत समाजवादीका अध्यक्ष माधव नेपालले प्रधानमन्त्रीसँग छलफल गरेका छन्। नेपालले आइतबार नै एक सार्वजनिक कार्यक्रममा राष्ट्रपति निर्वाचनसँगै वर्तमान सत्तागठबन्धन भत्किने दाबी गरेका छन्।
आइतबार साँझ कांग्रेस सभापति शेरबहादुर देउवासहित कांग्रेसका नेताहरुले प्रधानमन्त्री प्रचण्डलाई भेटेका छन्। प्रधानमन्त्री प्रचण्डलाई भेट्न कांग्रेस सभापति देउवा, नेता रामचन्द्र पौडेल, उपसभापति पूर्णबहादुर खड्का, महामन्त्री गगन थापा र नेता कृष्णप्रसाद सिटौला बालुवाटार पुगेका थिए। आइतबारको भेटमा पनि राष्ट्रपति निर्वाचनकै विषयमा छलफल भएको नेताहरुले जनाएका छन्।
यसअघि गत बिहीबार र शुक्रबार प्रधानमन्त्री प्रचण्ड र एमाले अध्यक्ष ओलीबीच लागातार छलफल चलेको थियो। बिहीबार बालुवाटारमा छलफल भएको थियो भने शुक्रबार ओली निवास बालकोटमा। बिहीबार प्रधानमन्त्री प्रचण्डले एमाले अध्यक्ष ओलीसँग भेटेपछि कांग्रेस उपसभापति पूर्णबहादुर खडकासँग पनि भेटेका थिए।
पछिल्लो समय कांग्रेसका उपसभापति खड्कासहित महामन्त्री गगन थापा, नेताहरु रमेश लेखक र ज्ञानेन्द्रबहादुर कार्की लागातार संवादमा देखिन्छन्।
एमाले अलग्याउने कांग्रेसको नीति
नेपाली कांग्रेस १० पुसमा आफनो हातबाट फुत्केको सत्ता राष्ट्रपति निर्वाचनमार्फत् जसरी पनि फर्काउने रणनीतिमा छ। जसका लागि कांग्रेस माओवादी अध्यक्ष तथा प्रधानमन्त्री प्रचण्डलाई ५ वर्ष कै लागि भए पनि प्रधानमन्त्री स्वीकार तयार भएको देखिन्छ।
नेपाली कांग्रेसका प्रवक्ता डा प्रकाशशरण महतले राष्ट्रपतिमा सत्तारुढ दल माओवादी केन्द्रले आफ्नो उम्मेदवारलाई समर्थन गरेको खण्डमा कांग्रेसले पनि ५ वर्ष नै प्रधानमन्त्रीमा प्रचण्डलाई समर्थन गरेर अघि बढन सक्ने बताएका छन्।
उनले अहिलेको परिवेशमा नेपाली कांग्रेसकै उम्मेदवार राष्ट्रपतिमा सबैभन्दा स्वभाविक हुने भन्दै त्यसका लागि माओवादीसहित अन्यदलहरुसँग छलफल चलिरहेको पनि बतए।
प्रवक्ता महतले राष्ट्रपतिमा कांग्रेसतर्फको उम्मेदवारलाई समर्थन गर्दा नेपाली कांग्रेसले पनि प्रधानमन्त्री प्रचण्डलाई दिएको विश्वासको मतलाई पूर्णकालका लागि निरन्तरता दिन सक्नेबारेमा पनि पछिल्लो समयमा छलफल चलिरहेको खुलाए।
राष्ट्रपति निर्वाचनलाई लिएर प्रधानमन्त्री तथा माओवादीसँग छलफलमा रहेका कांग्रेस प्रमुख सचेतक रमेश लेखकले संघीय लोकतान्त्रिक गणतन्त्रात्मक व्यवस्थाको सुदृढीकरण, संविधानको रक्षा, संविधानको सार्थक कार्यान्वयनका मुद्दामा नेपाली कांग्रेसमाथि मात्र भरोसा गर्ने अवस्था रहेको भन्दै त्यसका लागि राष्ट्रपति पाउनेमा आफूहरु आशावादी भएको बताए।
‘राष्ट्रपतिका लागि हामी सकारात्मक र आशावादी छौं, कांग्रेस सबैभन्दा ठूलो राजनीतिक दल पनि हो। संसद्मा हामी सबैभन्दा धेरै संख्यामा छौं। सातै प्रदेशमा हामी सबैभन्दा ठूलो संख्यामा छौं। सबै राजनीतिक दलहरुभन्दा बढी हाम्रो मतभार छ’, उनले भने, ‘संघीय लोकतान्त्रिक गणतन्त्रात्मक व्यवस्थाको सुदृढीकरण, संविधानको रक्षा, संविधानको सार्थक कार्यान्वयनका मुद्दामा नेपाली कांग्रेसमाथि नै भरोसा गर्ने स्थिति छ। किनभने एमालेले त जुनसुकै बेला प्रतिनिधि सभा विघटन हुन्छ भनिसक्यो नि। जुनसुकै बेला संसद् विघटको चाहना राखेर अघि बढ्ने पार्टीले संविधानको रक्षा गर्दैन।’
लेखक यही कारण २५ फागुनमा हुने राष्ट्रपति निर्वाचनमा कांग्रेसका उम्मेदवार जित्नसक्ने आकलन आफूहरुको रहेको दाबी गर्छन्। नेपाली कांग्रेसका नेताहरुले सार्वजनिक रुपमा जे भने उनीहरु केन्द्रदेखि प्रदेशसम्मकै सत्तासहयात्राको पर्खाइमा छन्। जुन उनीहरुको अपेक्षा अनुसार राष्ट्रपति निर्वाचनमा सकारात्मक नतिजा आएपछि मात्रै सम्भव देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821305.jpg)
-1786602170.png)
