इस्तानबुन- अर्मेनिया र टर्कीबीचको सीमाना मार्ग ३५ वर्षपछि पहिलो पटक खोलिएको छ। भूकम्पबाट क्षतविक्षत भएको टर्कीएलाई मानवीय सहायता परिचालनका निम्ति उक्त बाटो खोलिएको सरकारी अधिकारीले बताएका छन्।
औषधि, खाद्य पदार्थ र पानी बोकेका पाँच वटा ट्रक एलिकन सीमाबा टर्की आइ पुगेका अर्मेनियासँग वार्ता गरेका टर्कीका विशेष दूत सेरदार किलिकले सामाजिक सञ्जालमा उल्लेख गरेका छन्। उनले अर्मेनियाली राष्ट्रिय सभाका उपाध्यक्ष रुबेन रुबिन्यानप्रति कृतज्ञता व्यक्त गरेका छन्।
गत सोमबारको सात दशमलव आठ म्याग्निच्युडको भूकम्पले टर्की र सिरियामा हालसम्म करिब २५ हजार मानिसले ज्यान गुमाएका छन् भने हजारौँ घाइते भएका छन्। प्राकृतिक विपत्तिलाई दृष्टिगत गरी उक्त बाटो खोलिएको बताइएको छ। यसअघि उक्त बाटो सन् १९८८ मा आर्मेनियाली भूकम्प पीडितलाई सघाउन खोलिएको थियो। त्यस बेला झण्डै ३० हजार अर्मेनियालीको ज्यान गएको थियो।
टर्की र अर्मेनियाबीच औपचारिक कूटनीतिक सम्बन्ध स्थापना भएको छैन। यद्यपि सन् २०२१ को डिसेम्बरमा दुवै देशले पारस्परिक सम्बन्धलाई सामान्य बनाउन विशेष दूत नियुक्त गरेका छन्। दुवै देशका साझा सीमाना सन् नब्बेको दशकदेखि बन्द छन् । गत वर्षदेखि दुवै मुलुकले व्यावसायिक उडान भने सञ्चालन गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।