काठमाडौं– राजधानी रहेको काठमाडौं महानगरपालिकाका जनप्रतिनिधि झोलुङ्गे पुल छिटो निर्माणको माग गर्दै ‘सस्पेन्सन ब्रिज डिभिजन’ धाउन थालेका छन्।
काठमाडौं महानगरपालिका–१९ का वडाध्यक्ष राजेशकुमार श्रेष्ठसहित वडा सदस्य चन्द्रमान डङ्गोल, दिनेशमान जोशी, रेणुकमल शाही र रञ्जिता परियार पुल माग गर्न डिभिजनको कार्यालय पुल्चोक पुगे। महानगरपालिकाको बीचमा पर्ने कङ्केश्वरी मन्दिरस्थित विष्णुमती नदीमाथिको करिब दुई सय वर्षअघि बनेको पुल लच्केर करिडोरको सडकमा गुड्ने सवारी छुन थालेपछि दुई महिनाअघि निकालिएको थियो।
सवारीसाधनले लच्किएको पुलमा ठोक्किएर दुर्घटना हुने जोखिम बढेपछि पुल निकालिएको हो। यस बीचमा विसं २०७४ देखि सात पटकसम्म वडा कार्यालयले पुल मर्मत गरेर सञ्चालन गरेको वडा सदस्य डङ्गोलले बताए। पटक–पटक मर्मत गर्दा पनि पुल लच्किन नछाडेपछि नयाँ पुल नआए पनि पुरानो पुल झिक्न बाध्य हुनुपरेको जनप्रतिनिधिको भनाइ छ।
पुल निकालेपछि स्थानीयवासीलाई विष्णुमती आवतजावत गर्न असहज भएका कारण छिटो निर्माणको माग गर्दै डिभिजन धाउनुपरेको उनले बताए। पटक–पटक पुल लच्किएपछि गत वर्ष नै डिभिजनले नयाँ निर्माणका लागि बोलपत्र आह्वान गरेको थियो। कर्चेन कन्स्ट्रक्सन काठमाडौंले पुल निर्माणको ठेक्का पाएको जनाइएको छ। हाल स्थलगतरूपमा कुनै काम नभए पनि फलामको काम कारखानामा सकिएको जानकारी डिभिजनमा निर्माण व्यवसायी कम्पनीले गरेको पनि वडाध्यक्ष श्रेष्ठले गराए।
पुल निर्माणमा समय लाग्दा विश्व सम्पदा सूचीमा सूचीकृत हनुमानढोका दरबार क्षेत्र र स्वयम्भू क्षेत्र आवतजावत गर्ने पर्यटकका लागि पनि असहज भएको छ। यस क्षेत्रका व्यापार व्यवसाय पनि ठप्प भएको स्थानीय व्यवसायी रणबहादुर श्रेष्ठको गुनासो छ। झोलुङ्गे पुल निर्माण गर्ने जनशक्ति कम भएकाले पनि निर्माण कम्पनीलाई पुल बनाउन समय लागेको हो। आगामी घोडेजात्रामा यस क्षेत्रमा कङ्केश्वरीको भव्य जात्रा हुन्छ। त्यसबेलासम्म पुल बनाइसक्न स्थानीवासीले माग गरेका छन्।
करिब दुई सय वर्षअघि यो पुल निर्माण गर्दा काठैकाठबाट पुल निर्माण गरिएको बाबुबाजेबाट सुनेको जानकारी पनि वडाध्यक्ष श्रेष्ठले दिए। असनका अष्टनारायण र पञ्चनारायण मानन्धरले निजी लगानीमा काठ पुल निर्माण गरिदिएको जनाइएको छ। २०४२ सम्म त्यो पुलको स्वामित्व पनि मानन्धर गुठीसँग नै थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
