भारतबाट तरकारीको आयात रोक्न कृषिमन्त्रीसँग भरतपुरकी मेयर दाहालको अनुरोध

कृषि

नेपाल लाइभ शनिबार, माघ २१, २०७९ १७:२३

काठमाडौं– भरतपुर महानगरपालिकाकी मेयर रेनु दाहालले कृषिमन्त्री ज्वालाकुमारी साहसँग तरकारीको आयात बन्द गर्न आग्रह गरेकी छिन्।

राष्ट्रिय व्यवसायिक पशुपालन तथा दूध उत्पादन कृषक समाजको अधिवेशनमा सहभागी भएकी कृषि तथा पशुपंक्षीमन्त्री साहसँग मेयर दाहालले आयात रोकिदिन आग्रह गरेकी हुन्।

किसानले सडकमा तरकारी फालेर विरोध गरेकोप्रति महानगरको ध्यानकर्षण भएको भन्दै उनले किसानहरुले उत्पादन बढाइरहेको अवस्थामा स्थानीय उत्पादनले बजार नपाउनेगरी समस्या भएको बताइन्।

मेयर दाहालले केन्द्रले नीतिगत रूपमा निर्णय गरेर आयात रोकिदिए उत्पादनलाई आत्मनिर्भर बनाउन, बजारीकरण गर्न महानगरले काम गर्ने बताइन्।

भारतबाट तरकारीको आयात बढेपछि स्थानीय उत्पादनले बजार नपाएको भन्दै चितवनका किसानहरूले शुक्रबार नारायणगढमा राजमार्गमै तरकारी फालेका थिए।

यहाँका किसानहरू उत्पादित तरकारीको उचित मूल्यप्राप्तिको ज्ञारेन्टी गर्न माग गर्दै आन्दोलनमा उत्रिएका छन्। प्रधानमन्त्री पुष्पकमल दाहाल प्रचण्डले पनि बिहान कृषि मन्त्री साहलाई फोन गरेर किसानको समस्या समाधान गर्न आग्रह गरेका थिए।

मन्त्री साहले किसानहरूले उठाएका मागहरुलाई सम्बोधन गर्न प्रयास गर्ने बताएकी छन्। दूध, तरकारी, फलफूल, माछाको उत्पादनलाई कसरी बढाउने भन्नेमा मन्त्रालय पनि छ तर प्रकृयामा धेरै समस्या, झमेलाहरू छन्,’ मन्त्री साहले भनिन्, ’मन्त्रालयले किसानलाई सहजीकरण गर्नेगरी काम गर्छ।’

उनले तरकारी किसानले भोगेका समस्या समाधान गरी किसानलाई राहत हुनेगरी काम गर्ने बताइन्। कैयौं कुराहरु बिग्रिएको अवस्थामा रहेकाले सुधारका लागि सबैले आ–आफ्नो ढंगबाट काम गर्नुपर्ने मन्त्री साहको भनाइ छ।

उनले भनिन्, ‘म मन्त्री भएँ भनेर सबै दोषजति मन्त्रीतिर थुपार्दिने, राम्रा कामको जस चाहिँ आफू लिने परिपाटी कहिलेसम्म राख्ने? अब राजनीति भन्दा माथि उठेर काम गर्नुपर्‍यो।’ मन्त्री साहले यो महिनाभित्रमा दूधको समस्या हल गर्ने प्रतिबद्धता पनि जनाइन्।

यस्तै राष्ट्रिय व्यवसायिक पशुपालन तथा दूध उत्पादन कृषक समाजका अध्यक्ष आनन्द निउरेले दूध र दुग्ध पदार्थ आयातलाई पूर्णरूपमा बन्देज गर्न, दूधमा थप प्रति लिटर १४ रुपैयाँ किसानले पाउनेगरी मूल्यवृद्धि गर्न, किसान परिचयपत्र तथा किसान वर्गीकरण तथा जमिन करार ऐनको शीघ्र कार्यन्वयनलगायतका २६ वटा मागहरू मन्त्रीसमक्ष राखेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

विदेशी मुद्राको विनिमय दर: बुधबार कुनको कति?

वडाको कामसँगै किबी खेतीमा व्यस्त बागलुङका वडाध्यक्ष थापा

आज देशका अधिकांश भागमा मौसम सफा रहने