काठमाडौं– सत्तारुढ नेकपा (माओवादी केन्द्र)का सांसद एवम् पूर्वमन्त्री शक्तिबहादुर बस्नेतले मन्त्रीहरुले संविधानको मूल्य र मान्यताविपरीत फेरि टिप्पणी गरे स्वीकार्य नहुने चेतावनी दिएका छन्।
सरकारका केही मन्त्रीहरुले संघीयताविरुद्ध अभिव्यक्ति दिइरहेका बेला उनको यस्तो धारणा राखेका हुन्। बुधबार प्रतिनिधि सभा बैठकमा विशेष समय लिएर बोल्दै सांसद बस्नेतले मन्त्रीहरुलाई संविधानको मूल्यभन्दा बाहिर गएर अभिव्यक्ति दिने काम फेरि नगर्न सचेत गराए। उनले सरकार संविधान कार्यान्वयन गर्ने निकाय भएकाले त्यसमा रहेका मन्त्रीहरुले त्यस्ता खालका गल्ती गर्न नहुने स्पष्ट पारे।
‘संसद्मा यो विषयमा बहस एक हदसम्म स्वीकार्य पनि छ। सडकमा यसको बहस एक हदसम्म स्वीकार्य पनि होला। हरेकले आ–आफ्नो मूल्य र मान्यतालाई स्वीकार गरेर अघि बढ्लान्। सरकार संविधानको कार्यान्वयन गर्ने संस्था क्याबिनेट र क्याबिनेटका सदस्यहरुले संविधान त्यसका मूल्यभन्दा बाहिर गएर गर्ने टिप्पणी हुन सक्दैन। र, यस्ता प्रकारका गल्तीहरु आगामी दिनमा नहुन। यस्ता कुरालाई सच्याइयोस् भन्ने कुरा सभामुख महोदयमार्फत राख्न चाहन्छु।’
सांसद बस्नेतले राजनीतिक दलहरुलाई आ–आफ्नो दृष्टिकोण स्थापित गराउने छुट भए पनि सरकारमा रहेका मन्त्रीहरुलाई जथाभावी बोल्ने अनुमति संविधानले नदिएको पनि स्मरण गए। उनले परिवर्तनकारी शक्तिहरुलाई स्वीकार गर्ने आँट नभएकाले पनि मुलुकमा व्यवस्था परिवर्तन भएपनि जनताको अवस्थामा भने परिवर्तन आउन नसकेको दाबीसमेत गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
