धनगढी– सुदूरपश्चिम प्रदेश सभाको बैठक यही साता आह्वान गर्ने तयारी भएको छ। अनिश्चित बनेको प्रदेश सभाको सातौ बैठक यही साताभित्र सञ्चालन गर्ने गरी सभामुख भीमबहादुर भण्डारीले छलफल अगाडि बढाउने बताएका छन्।
‘म मंगलबारमात्र धनगढी पुगेको छु। भोलि (बुधबार) सर्वदलिय बैठक बसाउँछु’ उनले भन, ‘पुस २० वा २२ गते बैठक सञ्चालन हुनेछ ।’ उनले प्रदेश सभा बैठकको पहिलो कार्यसूची नै मुख्यमन्त्री राजेन्द्रसिंह रावलको विश्वासको मत लिने हुने बताए।
‘सभामा अन्य कुनै विजनेस छैन। पहिलो कार्यसूची नै मुख्यमन्त्रीको विश्वासको मतबारे रहने छ,’ उनले भने।
पुस ३ मा बसेको बैठकमा सभामुख भण्डारीले पुस ११ गतेसम्मको बैठक स्थगित भएको सभामा जानकारी गराएका थिए। पुस ११ गते सभा सञ्चालन नहुँदै प्रदेश सभा सदस्यहरुको मोबाइलमा अर्को सूचना जारी नभएसम्मका लागि बैठक स्थगित भएको भन्दै सूचना पठाइएको थियो।
मुख्यमन्त्री रावलको विश्वासको मतको समयावधि सकिने समय नजिकिँदै गर्दा सभामुख भण्डारीले छलफल गरेर सभा आह्वान गर्ने बताए। सुदूरपश्चिम प्रदेशका मुख्यमन्त्री रावल मंसिर २७ गते मुख्यमन्त्री पदमा नियुक्त भएका थिए।
सत्ता गठबन्धनको आन्तरिक समस्याका कारण उनले तेस्रो साता पुग्नै लाग्दासमेत सभाबाट विश्वासको मत लिन सकेका छैनन्। उनले पुस २६ गतेभित्र विश्वासको मत लिइसक्नुपर्ने संवैधानिक व्यवस्था रहेको छ।
प्रदेश सभामा सत्ता गठबन्धनमा रहेको नागरिक उन्मुक्ति पार्टी माग र मुद्दा सम्बोधन नभएसम्म सरकारलाई समर्थन नगर्ने अडानमा रहेको छ। सो दलका प्रदेश सभा सदस्यहरु थारू आन्दोलनका अगुवा नेता रेश्म चौधरीसहित राजबन्दीहरु विनाशर्त रिहा हुनुपर्ने, टीकापुर घटनालाई राजनीतिक मुद्दा बनाइनुपर्ने भन्दै माग अघि सारेका छन्। यद्यपि, सत्तारुढ दलहरु यस मागप्रति गम्भीर नभएको उनीहरुको ठहर छ।
उन्मुक्ति पार्टीको साथ र सहयोग नपाउँदा मुख्यमन्त्री रावललाई विश्वासको मत लिन समस्या भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771727337.png)
-1764146706.png)
