काठमाडौं– दुई दिने भ्रमणका लागि आइतबार साँझ काठमाडौं आइपुगेकी अमेरिकी उपविदेशमन्त्री भिक्टोरिया नुल्यान्ड उच्चस्तरीय भेट सकेर सोमबार भारत प्रस्थान गरेकी छन्। उनले भारत, श्रीलंका हुँदै कतार पुगेर आफ्नो भ्रमण टुंग्याउने कार्यतालिका छ।
नयाँ सरकार बनेपछिको पहिलो उच्चस्तरीय भ्रमणका रुपमा नेपाल आएकी नुल्यान्डले भेटमा तीन वटा विषयमा प्राथिकताका साथ चासो राखेको भेटमा सहभागी नेताहरूले बताएका छन्। मन्त्री नुल्यान्डले गत वर्षको अन्त्यमा नेपालको संसद्बाट पारित भएको अमेरिकी परियोजना एमसीसीको कार्य प्रगति, संक्रमणकालीन न्यायको बाँकी रहेको कामको अवस्था र नेपाल तथा अमेरिकाबीचको दौत्य सम्बन्धको ७५औं वर्षगाँठको उपलक्ष्यमा सहयोग र सम्बन्धको आदनप्रदानमा छलफल गरेको बताइएको छ।
विद्युतीय प्रसारण लाइन र सडक पूर्वाधार विस्तारमा करिब ५० करोड अमेरिकी डलर लगानी गर्ने उद्देश्यका साथ अघि बढेको एमसीसी परियोजना २०७८ को फागुन दोस्रो साता नेपालको संसद्बाट अनुमोदन भएको थियो। सोही परियोजनाको कार्य प्रगतीको विषयमा नुल्यान्डले भेटमा चासो राखेकी हुन्।
मन्त्री नुल्यान्डले सोमबार बिहान प्रधानमन्त्री पुष्पकमल दाहाल ‘प्रचण्ड’सँग भेट गरेकी थिइन्। भेटमा नुल्यान्डले एमसीसीको विषयमा चासो राख्दै कार्यान्वयनमा लाने विषयमा प्रधानमन्त्रीसँग जिज्ञासा राखेको प्रधानमन्त्रीको सचिवालयले जनाएको छ। जवाफमा प्रधानमन्त्रीले एमसीसी परियोजना संसद्बाट अनुमोदन भइसकेकोले त्यसको प्राविधिक पक्षमा काम भइरहेको र छिट्टै थप कार्यान्व्यनमा जाने विश्वास दिलाए।
यस्तै, मन्त्री नुल्यान्डले प्रधानमन्त्रीलाई तत्कालीन माओवादी नेतृत्वमा भएको युद्धमा राज्य र विद्रोही पक्षबाट भएको मानवअधिकार हनन् र वेपत्ताको विषयमा रहेको संक्रमणकालीन न्याय सम्बन्धमा पनि चासो राखेको प्रधानमन्त्रीको सचिवालयले बताएको छ। जवाफमा प्रधानमन्त्री प्रचण्डले यथाशीघ्र उक्त विषयलाई टुङ्ग्याउन सरकार प्रतिबद्ध रहेको बताएका थिए।
संक्रमणकालीन न्याय सम्बन्धीको विषय अघिल्लो संसद्बाटै टुङ्ग्याउनलाई विधेयक संसद्मा पेश भएको थियो तर उक्त विधेयक पारित हुन सकेको थिएन।
यस्तै, प्रधानमन्त्रीसँगको भेटमा मन्त्री नुल्यान्डले नेपाल र अमेरिकाबीच आपसी हित र सहयोग आदन प्रदान हुने विषयमा पनि छलफल गरेको प्रधानमन्त्री सचिवालयले बताएको छ।
प्रधानमन्त्रीपछि सत्ता साझेदार दलका प्रमुख नेता तथा एमाले अध्यक्ष केपी शर्मा ओलीलाई भेट्न उक्त पार्टीको संसदीय दलको कार्यालय सिंहदरबार पुगेर मन्त्री नुल्यान्डले एमसीसी र संक्रमणकालीन न्यायकै विषय दोहोर्याइन्। उक्त विषयलाई छिट्टै टुङ्ग्याउनलाई एमाले सहयोग गर्नु पर्नेमा मन्त्री नुल्यान्डले आग्रह गरेको भेटमा सहभागी एमाले एक नेताले बताएका छन्।
‘संक्रमणकालीन न्यायको विषयमा चासो देखाउनु भयो। यसलाई छिट्टो टुंगो लाउनुपर्ने र त्यसमा एमालेले सहयोग गर्नु पर्नेमा जोड दिनु भएको छ,’ नेपाल लाइभसँग कुरा गर्दै ती नेताले भने, ‘एमसीसी पनि बिनाअवरोध छिट्टै कार्यान्वयनमा जाओस् भन्नेमा अमेरिका चासो रहेको देखियो।’
यस्तै, मन्त्री नुल्यान्डले संसद्को ठूलो दल नेपाली कांग्रेसका सभापति तथा निवर्तमान प्रधानमन्त्री शेरबहादुर देउवालाई पनि भेटेकी छन्। सो भेटमा पनि सत्ता साझेदारका नेतासँग राखेको चासोको विषयलाई स्मरण गरेको सभापति देउवाको सचिवालयले बताएको छ।
यस्तै, द्विपक्षीय सम्बन्ध, लोकतन्त्र, विकास र सुशासनमा प्राप्त सहयोग अझ सुदृढ बनाउने विषयमा छलफल भएको सचिवालयले बताएको छ। जवाफमा देउवाले एमसीसीमा राष्ट्रिय सहमति रहेकोले त्यसको कार्यान्वयनको पक्षमम कुनै आशंका नगर्न आग्रह गरेको र नेपाललाई अमेरिकाबाट निरन्तर प्राप्त सहयोग र समर्थनको उच्च मूल्यांकन गर्दै आभार व्यक्त गरेको देउवा सचिवालयले जनाएको छ।
मन्त्री नुल्यान्डले परराष्ट्रमन्त्री बिमला राई पौड्यालसँग पनि भेटवार्ता गरकी छन्। त्यसलगत्तै काठमाडौंमा केही पत्रकारसँग अन्तरक्रिया गर्दै नुल्यान्डले आफ्नो नेपाल भ्रमणको उद्दश्यबारे स्पष्ट पारेकी थिइन्।
नुल्यान्डले पत्रकारहरूसँग शीर्ष नेतृत्वसँग संक्रमणकालीन न्यायको सम्बन्धमा आफूले चासो राखेको बताउँदै त्यस्ता विषय छिट्टै टुंगोमा पुर्याउने पर्नेमा जोड दिइन्। त्यस्तै, पत्रकारहरूसँग छलफल गर्दै नुल्यान्डले नेपालसँग आर्थिक सहकार्य गर्दा आफूहरूले त्यसमा कुनै भ्रष्टचार नहोस् भन्ने चाहेको बताएकी छन्।
उनले अमेरिका र नेपालबीच जनस्तरमा सम्बन्ध रहोस् भन्ने अमेरिकाको चाहना रहेकोले त्यसलाई हितमा राखेर आर्थिक सहकार्य थप बलियो बनाउने बताएकी छन्।
नुल्यान्डले आफ्नो भ्रमण टुंग्याउने क्रममा पत्रकारहरूसँग भनिन्, ‘नेपाल र अमेरिकाबीचको सम्बन्ध जनस्तरमा बलियो रहोस् भन्ने अमेरिकाको चाहना हो। यसले, हाम्रो लोकतान्त्रिक सम्बन्ध बलियो होस् भनेर अमेरिकाले नेपालसँग सहकार्यमा जोड दिएको हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
