काठमाडौं– सिन्धुलीको ‘मिनि नगरपालिका’को चुनाव मानिने जिल्लाकै सबैभन्दा ठूलो खानेपानी तथा सरसफाई उपभोक्ता संस्थाको चुनावमा एमाले विजयी भएको छ। एमालेबाट अध्यक्षको पदमा उम्मेदवारी दिएका घनश्याम देवकोटा विजयी भएका हुन्।
जिल्लाकै सबैभन्दा ठूलो सिद्धेश्वर खानेपानी तथा सरसफाई उपभोक्ता संस्थामा देवकोटा कांग्रेस–मोआवादी गठबन्धनका उम्मेदवारलाई पराजित गर्दै विजयी भएका हुन्। उनले गठबन्धनका साझा उम्मेदवार कांग्रेसका सुरज मिश्र (शेखर) लाई पराजित गरे।
देवकोटाले १ हजार ६२ मत ल्याएर विजयी हुँदा मिश्रले ७८१ मत ल्याए। स्वतन्त्र उम्मेदवार लोकविक्रम थापाले भने ४०१ मत ल्याए। कुल खेसेको मतमध्ये ९८ मत बदर भएको थियो।
अध्यक्षसहित ५ खुल्ला सदस्य र ३ महिला सदस्यको लागि निर्वाचन भएको थियो। सदस्यहरुमा पनि एमालेकै वर्चश्व देखिएको छ।
सदस्यहरूमा एमालेका शारदा ढकाल (चौलागाईं), सुमना थापा, इन्द्र बहादुर भुजेल, दशरथ कुमार थापा र कपिल कुमार श्रेष्ठ विजयी भए। गठबन्धनका सदस्य पदका उम्मेदवार चन्द्रकला खड्का र लवदेव जोशी विजयी भए। सदस्यमा स्वतन्त्र उम्मेदवार विज्ञान ढकाल पनि विजयी भए।
सिद्धेश्वर खानेपानी तथा सरसफाई उपभोक्ता संस्थामा सिन्धुलीको कमलामाई नगरपालिकाका ४, ५ ,६ र ७ वडाहरूका कुल २ हजार ८ सय ९३ उपभोक्ता रहेका छन्। गत शनिबार भएको निर्वाचन २ हजार ३ सय ४२ मत खसेको थियो।
जितसँगै देवकोटाले सबैसँग समन्वय गरेर आफू अघि बढ्ने बताएका छन्। आफ्नो कार्यकालमा उक्त संस्थालाई थप उचाईमा पुर्याउन सक्दो पहल गरिने पनि उनले बताए।
‘यो जित सम्पूर्ण उपभोक्ताहरुको हो। संस्थालाई थप चुस्त र क्रियाशील बनाएर नयाँ उपभोक्ताको हितमा काम गरिने छ’ देवकोटाले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767959997-1767968077.jpg)
-1764146706.png)
