दाङको टरिगाउँ विमानस्थलमा आजदेखि सीता एयरले उडान भर्दै

पर्यटन-उड्डयन

नेपाल लाइभ शुक्रबार, माघ १३, २०७९ ०९:००

टरिगाउँ विमानस्थलमा नेपाल एयरलाइन्सको जहाज

तुलसीपुर– दाङको तुलसीपुर–१२ टरिगाउँस्थित विमानस्थलमा निजी विमानले पनि सेवा दिने भएका छन्। त्यसका लागि निजी विमान कम्पनी सीता एयरले आज (शुक्रबार) परीक्षण उडान गर्ने भएको छ।

तुलसीपुर उपमहानगरपालिकाका उपप्रमुख स्यानी चौधरीका अनुसार दिउँसो १ बजे सीता एयरको १९ सिटे विमानले परीक्षण उडान भर्ने भएको हो। ‘शुक्रबारदेखि निजी विमान पनि बस्ने भएको छ, सीता एयरले उडान भर्दैछ,’ उनले भनिन्, निजी विमान उडान सुरु भएपछि भाडा पनि सस्तो हुने हाम्रो अपेक्षा छ।’

ठूलो संघर्षपछि तुलसीपुरमा निजी विमानले सेवा दिन थालेको चौधरीले बताइन्।

अहिले धावनमार्गको डीपीआरको काम भइरहेको र त्यो सकेपछि तत्काल हालको धावनमार्गलाई विस्तार गरेर निजी कम्पनीका ठूला जहाजले पनि उडान भर्न सक्नेछन्।

तुलसीपुर उपमहानगरपालिकाले उपप्रमुख स्यानी चौधरीको नेतृत्वमा समिति नै बनाएर विमानस्थल विस्तारका लागि पहलकदमी अगाडि बढाएको छ।

हाल नेपाल वायु सेवा निगमको १९ सिटे ट्वीनअटर हप्तामा ४ दिन तुलसीपुरमा उडान भर्ने गरेको छ। आइबार, मङ्गलबार, बिहीबार र शनिबार उडान हुने गरेको हो।

हाल टरिगाउँमा इन्धन डिपो स्थापना भइ सञ्चालनमा पनि आइसकेको छ। तर भाडा भने घट्न सकेको छैन।

हाल दाङबाट काठमाडौंको न्यूनतम ८ हजार आठ सय १० र काठमाडौंबाट दाङको भाडा न्यूनतम ९ हजार बढीदेखि अधिकतम १२ हजारभन्दा बढी रहेको छ।

निजी विमान सञ्चालन भएसँगै भाडा घट्ने अपेक्षा गरिएको छ। साथै हाल रहेको ७५० मिटर लम्बाइ र ३० मिटर चौडाइ रहेको धावनमार्ग पनि विस्तार गर्न सकेमा ठूला जहाज बस्ने र भाडा पनि सस्तो हुने उपप्रमुख चौधरीको भनाइ छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सम्पदालाई न्यायोचित रुपमा प्रयोग गर्नुपर्छ : उपप्रधानमन्त्री सिंह

आचरसंहिता उल्लङ्घन गर्ने अनलाइन कालोसूचीमा

फ्रान्सले युक्रेन बिना नै युद्धबारे छलफलका गर्न चाहेको रूसी दावी