समाचार

भूकम्पले बाजुराका २५ घर भत्किए, अन्य कहाँ के–कति क्षति?

शेरबहादुर ऐर मंगलबार, माघ १०, २०७९ १९:१८

धनगढी– बाजुराको हिमाली गाउँपालिकाको बिच्छ्यामा केन्द्रबिन्दु बनाएर गएको भुकम्पका सो जिल्लाका विभिन्न ठाउँका २५ घर भत्किएको जानकारी प्राप्त भएको छ।

भूकम्पका कारण जिल्लाभर भएको घटनाको विवरण संकलन कार्य भइरहेको जिल्ला प्रहरी कार्यालय बाजुराले जनाएको छ।

मंगलबार दिउँसो २ बजेर ४३ मिनेटमा बाजुराको हिमाली गाउँपालिकाको बिच्छया आसपास केन्द्रबिन्दु बनाएर ५.९ म्याग्नेच्युडको भूकम्प गएको थियो।

सो भूकम्पका कारण एक जनाको मृत्यु भएको छ। गौमुल गाउँपालिका वडा न २ की जमुना रोकायाको मृत्यु भएको जिल्ला प्रहरी कार्यालय बाजुराले जनाएको छ।

जंगलमा घास काटिरहेको बेला माथिबाट खसेको ढुगां लागेर उनको मृत्यु भएको जिल्ला प्रहरी कार्यालय बाजुराका प्रमुख सूर्य थापाले जानकारी दिए।

त्यसैगरी भेडा चराउन गएका गौमुल गाउँपालिका वडा नम्बर १ का एकजना घाइते भएका छन्।

जंगलमा भेडा चराउन गएका बेला माथिबाट पहिरो जाँदा ५० देखि ६० वटा भेडा मरेका र गाठालो गएका रामदल बोहरा घाइते भएको स्थानीयले बताएका छन्। उनको नजकिको स्वास्थ्य संस्थामा उपचार भइरहेको स्थानीय सुवास रोकायाले जानकारी दिए।

उता, जिल्ला प्रहरी कार्यालय बझाङका अनुसार भूकम्पमा परी एकजना घाइते भएको र जिल्लाका सबै पालिकाका कतिपय भौतिक संरचनामा क्षति भएको छ।

भूकम्पपछि सुरक्षित स्थानतर्फ भाग्न खोज्दा बझाङको जयपृथ्वी नगरपालिका वडा नं ११ का ५२ वर्षीय हरिकृण्ण जोशी घाइते भएका छन्। उनलाई उपचारका लागि धनगढी सिफारिस गरिएको छ।

भूकम्पको धक्काले सदरमुकाम चैनपुरमा रहेको कृषि ज्ञान केन्द्रको भवन, जिल्ला अस्पताल, केही होटल र निजी घरमा पनि क्षति भएको छ। कृषि ज्ञान केन्द्रको भवनमा सशस्त्र प्रहरी बस्दै आएका छन्। यस्तै सुर्मा गाउँपालिकामा रहेको प्रहरी चौकीको भवनमा पनि क्षति पुगेको जिल्ला प्रहरी कार्यालयका प्रवक्ता प्रहरी निरीक्षक रमेश अवस्थीले बताए।

भूकम्पका कारण जयपृथ्वी नगरपालिका, बुङगल नगरपालिका, सुर्मा, मष्टा, तलकोट, खप्तडछान्ना, थलारा र साइपाल गाउँपालिकास्थित थुप्रै निजी घर र विद्यालय, स्वास्थ्य चौकी जस्ता सार्वजनिक संरचनाहरुमा क्षति पुगेको विवरण आइरहेको प्रहरीले जनाएको छ।

‘ती ठाउँका दर्जनौँ घर भत्किएको खबर आइरहेका छन्। क्षतिको पूरै विवरण यकिन भइसकेको छैन’, प्रवक्ता अवस्थीले भने, ‘हाम्रा संयन्त्रमार्फत् क्षतिको विवरण संकलन गर्ने काम भइरहेको छ। मंगलबार बिहानदेखि भइरहेको वर्षा र हिमपातका कारण कतिपय ठाउँमा टेलिफोन सेवा अवरुद्ध भएकाले क्षतिको यकिन विवरण आउन समस्या भएको बताइएको छ।

भूकम्पको धक्काले थुप्रै घर चर्किएको स्थानीयहरूले बताएका छन्। मंसिरयता सुदूरपश्चिमका कतिपय स्थानमा थुप्रैपटक भूकम्पको धक्का महसुस हुने गरेको स्थानीयहरूले बताएका छन्।

गाउँमा थुप्रै घर चर्किएकाले भित्र बस्न पनि त्रास फैलिएको स्थानीयहरूको गुनासो छ। बाहिर भने हिउँ परिरहेकाले भाग्न कठिन भएको जयपृथ्वी नगरपालिका १, कैलाशकी इसरा सिंहले बताइन्।