कास्की– काठमाडौंबाट पोखरा उडेको यती एयरलाइन्सको विमान आइतबार १० बजेर ५५ मिनेटमा पोखरामा दुर्घटनामा परेको छ।
एननाइन–एएनसी एटीआर–७२ वायुयान पोखरा विमानस्थलमा अवतरण गर्ने क्रममा पुरानो एअरपोर्ट र नयाँ एअरपोर्टको बीचमा रहेको सेती किनारामा दुर्घटनामा परेको यती एयरलाइन्सले जनाएको छ।
विमानमा संख्या ६८ यात्रु र चालक दलका ४ जना सदस्य रहेका थिए। हालसम्म दुर्घटनाको कारण पत्ता लाग्न सकेको छैन। मौसम र विमानस्थलको कारणभन्दा पनि विमानको ककपिटमा आएको खराबीका कारण दुर्घटना भएको हुन सक्ने प्राविधिक टोलीले जनाएको छ।
कास्की जिल्लाका प्रमुख जिल्ला अधिकारी टेकबहादुर केसीले विमान दुर्घटनास्थलमा आगो नियन्त्रण गर्ने प्रयास भइरहेको बताएका छन्। उनले नेपाल लाइभसँग कुरा गर्दै दुर्घटनाग्रस्त विमानबाट ३६ जनाको शव निकालिएको र अन्यको खोजी भइरहेको बताए।
उनले विमानमा सवार भएका धेरैजसोलाई जिवित उद्धार गर्ने सम्भावना न्यून रहेको बताए। नेपाली सेना, सशस्त्र प्रहरी र नेपाल प्रहरीसहित तीनवटै सुरक्षाकर्मी उद्धारमा परिचालन गरिएको थियो।
उनले घटनाको कारण अहिलेसम्म पत्ता नलागेको बताए। मौसम सफा रहेको तर विमान पुरानो विमानस्थलबाट नयाँमा बस्दै गर्दा दुर्घटना भएको प्रारम्भिक अनुमान गरिएको उनको भनाइ छ।
उक्त विमानमा १५ विदेशीसहित ६८ जना यात्रु सवार थिए। चार सदस्य चालक दल रहेका थिए। सेती नदीको खोँचमा दुर्घटनास्थल रहेकाले शव निकाल्न र घाइतेहरुको उद्धारमा कठिन भइरहेको उनले बताए।
डेमो उडान गरेको जहाज नै दुर्घटनामा
पोखरामा दुर्घटना भएको यती एअर लाइन्सको जहाज केही दिनअघि मात्रै पोखराकै अन्तर्राष्ट्रिय विमानस्थलमा डेमो उडान गरेको जहाज रहेको पाइएको छ।
पोखरा अन्तर्राष्ट्रिय विमानस्थलको उद्घाटन गरेका बेला काठमाडौंबाट एन ९–एएनसी एटीआर–७२ को जहाज डेमो उडान गरेको थियो।
सोही जहाज आइतबार बिहान दुर्घटनामा परेको हो। अवतरण गर्ने क्रममा पोखराको पुरानो एअरपोर्ट र नयाँ एअरपोर्टको बीचमा रहेको सेती किनारामा दुर्घटना परेको हो।
हेर्दा–हेर्दै प्लेन खस्यो–सहायक प्रमुख जिल्ला अधिकारी
आइतबार भएको दुर्घटनामा पर्नुअघि पोखराको आकाशमा पटक–पटक घुमेको र हल्लिरहेको प्रत्यक्षदर्शीले बताएको सहायक प्रमुख जिल्ला अधिकारी गुरुदत्त ढकालले बताए।
उनले हेर्दा–हेर्दै प्लेन पुरानो विमानस्थलवाट सेती नदीको खोँचमा खसेको र खसेलगत्तै आगोको मुस्लो निस्केको बताए। ‘प्लेन खसेलगत्तै एक्कासी ठूलो आगो लागे झै धुँवाको मुस्लो आयो,’ उनले भने, ‘लगत्तै हामीले उद्धारमा सक्रिय हुने सबैलाई निर्देशन दिएका छौं। अहिले दुर्घटनास्थलमा तीनवटै सुरक्षा निकायका साथै स्थानीयहरु पनि उद्धारमा सक्रिय रहेका छन्।’
दुई देशले चलाएपछि नेपाल भित्रिएको थियो विमान
पोखरामा दुर्घटना भएको यती एयरलाइन्सको विमान दुई देशले चलाइसकेपछि नेपाल भित्रिएको पाइएको छ। दुर्घटना भएको यतीको एन ९–एएनसी एटीआर–७२ को विमान यसअघि भारत र थाइल्याण्डमा चलाइएको पाइएको छ।
यो विमान सन् २०१७ मा भारतको किङफिसर एअरलाइन्सले चलाएको थियो। त्यसपछि सन् २०१३ देखि थाइल्याण्डको नोक एअरलाइन्सले चलाएको पाइएको छ। सन् २०१९ अप्रिलदेखि भने यो विमान यती एयरलाइन्सले चलाउँदै आएको थियो।
यथार्थ बुझ्न प्रधानमन्त्री त्रिभुवन विमानस्थलमा
पोखरामा भएको यती एयरलाइन्सको विमान दुर्घटनाको अवस्था बुझ्न प्रधानमन्त्री पुष्पकमल दाहाल प्रचण्ड त्रिभुवन विमानस्थल पुगेका छन्।
‘घटनालगत्तै सम्माननीय प्रधानमन्त्रीज्युले उद्धारमा जुट्न राज्य संयन्त्रलाई निर्देशन गर्नु भएको छ’, प्रचण्डका स्वकीय सचिव रमेश मल्लले फेसबुकमा जानकारी दिएका छन्,’ आजका सबै औपचारिक कार्यक्रम रद्द गरि प्रधानमन्त्रीज्यु अवस्था बुझ्न एयरपोर्ट पुग्नु भएको छ।’
प्रधानमन्त्रीले आजै (आइतबार) मन्त्रिपरिषदको आकस्मिक बैठक बोलाएको उनले लेखेका छन्।
यती एयरको सबैभन्दा ठूलो दुर्घटना
आइतबार बि0हान भएको दुर्घटना यती एयरलाइन्सको २५ वर्षे इतिहासमा सबै भन्दा ठूलो दुर्घटना हो। यध्यपी यो यती एयरको चौथो दुर्घटना हो।
उक्त एयरलाइन्सको पहिलो दुर्घटना सन् २००१ तिलिङ्टारमो डि एचसि ६/३०० जहाज दुर्घटना भएको थियो। त्यसको ३ वर्ष पछि अर्थात् सन् २००४ मा यती एयरलाइन्सको विमान लमजुङमा दुघर्टना हुँदा ३ जनाको ज्यान गुमाएका थिए। यस्तै सन् २००६ मा जुम्लामा यती एयरको दुर्घटना भएको थियो। उक्त दुर्घटनामा ९ जनाले ज्यान गुमाएका थिए।
यस्तै सन् २००६ मै यती एयरलाइसको विमान लुक्लामा दुर्घटना हुदा १९ जनाले ज्यान गुमाएका थिए। त्यही वर्ष यती डि एचसी ६/३१० विमान बाजुरा एयरपोर्टमा दुर्घटना भएको थियो।
आइतबार भएको यती एयरको प्लेन दुर्घटनामा सबैभन्दा धेरै मानवीय क्षति भएको छ। यो दुर्घटना नेपालको इतिहासमा दुर्घटना १०८औं हो।
यस्तो छ अन्तर्राष्ट्रिय विमान कम्पनीको दुर्घटना
नेपालमा पहिलो अन्तर्राष्ट्रिय हवाई दुर्घटना बाराको सिमरामा भएको थियो। सन् १९५५ मा कालिगा एयरको विमान दुर्घटना हुँदा दुई जनाले ज्यान गुमाएका थिए। यस्तै, सन् १९५६ र १९५८ भारतीय एयरलाइन्सका दुई विमान दुर्घटना भएका थिए। ती दुर्घटनामा ३४ यात्रुको ज्यान गएको थियो।
यस्तै, १९९२ मा थाई एयरको विमान दुर्घटना हुँदा ११३ जनाको ज्यान गएको थियो। सन् १९९२ मै पाकिस्तान एयरलाइन्सको विमान दुर्घटनामा प¥यो र १५७ जनाले ज्यान गुमाएका थिए।
सन् १९९० मा लुफ्थान्सा एयरको विमान दुर्घटनामा प¥यो र पाँच जनाले ज्यान गुमाएका थिए। सन् २०१४ मा अवतरणको क्रममा टर्किस एयरको विमान दुर्घटनामा मानवीय क्षति भएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788705448.jpeg)
-1786602170.png)
-1786513116.png)
-1788425345.png)
