काठमाडौं– तपाईंले बलिउड फिल्म ‘कला’ हेर्नुभयो?
यतिबेला चर्चा कमाइरहेको फिल्ममा नयाँ अनुहारका अब्बल कलाकार भेट्नुहुनेछ। बलिउडका सशक्त कलाकार इरफान खान मृत्युपर्यन्त पनि अभिनयका कारण सधैं सम्झनामा छन्। ‘कला’ फिल्म हेरिसकेपछि तपाईंले थाहा पाउनुहुनेछ– उनका छोरा बाबिल खान पनि अभिनयमा प्रचुर सम्भावना बोकेका कलाकार हुन्।
तर उनले इरफानका नामका कारण फिल्ममा अवसर पाएका भने हैनन्। रोचक कुराचाहिँ ‘कला’मा बाबिलको अडिसन लिएर छनोट हुँदासम्म बाबिल इरफानको छोरा हो भन्ने कुरा निर्देशकलाई थाहा थिएन। यसर्थ उनले आफ्नै कठोर संघर्षबाट फिल्म उद्योगमा पाइला टेके।
बाबिल खान र तृप्ति डिमरी अभिनित उक्त फिल्म डिसेम्बर १बाट नेटफिल्क्समा रिलिज भयो। फिल्मको निर्देशन अन्विता दत्तले गरेकी हुन्। फिल्म रिलिज पछि तृप्ति र बाबिलको अभिनयको निकै तारिफ भइरहेको छ।
कसरी छनोट भए बाबिल?
एक कुराकानीमा अन्विताले बाबिललाई फिल्मका लागि कसरी छनोट गरिन् भनेर बताएकी थिइन्।
टाइम्स अफ इन्डियाको समाचारअनुसार अन्विताले फिल्ममा जगनको क्यारेक्टरका लागि नयाँ अनुहारको खोजी गरिरहेको बताएकी छन्।
धेरै अडिसन हेरेपछि पनि उनले सही विकल्प पाइरहेकी थिएनन्। कोही पात्रको उमेरभन्दा ठूलो थिए त कोहीको अनुहारमा निर्दोषिता थिएन।
अन्विता पात्रअनुसार कुनै पनि कलाकारसँग सहमत हुन सकिनन्। अनि उनले बाबिलसँगको भेटबारे बताइन्।
सबै अडिसनपछि एकदिन अन्विताका सहायक निर्देशकले बाबिलबारे बताए। उनीहरू दुवै सँगै स्कुलमा पढ्थे। तर, बाबिललाई यो फिल्ममा रुचि छ कि छैन भन्नेबारे उनलाई केही थाहा थिएन।
यसपछि बाबिलले यसका लागि अडिसन दिएका थिए। उनलाई देखेर अन्विताले यो क्यारेक्टरका लागि बाबिलको नाम तय गरिन्।
अन्विताले बाबिलको कलाबाट आफू निकै प्रभावित भएको बताइन्। त्यतिबेलासम्म उनीहरूलाई बाबिल को हो भन्ने पनि थाहा थिएन।
बाबुको नाम लिएर अघि बढ्न चाहँदैनन् बाबिल
स्व. अभिनेता इरफान खानका छोरा भए पनि बाबिल आफ्नो प्रतिभाका आधारमा अगाडि बढ्ने कोसिस गरिरहेका छन्।
'कला' रिलिज हुनुअघि उनले एक अन्तर्वार्तामा आफू निरन्तर अडिसन दिइरहेको र त्यसमा पटक–पटक असफलता पनि पाइरहेको बताएका थिए।
उनले आफ्नो बुबाको नाम प्रयोग गरेर आफ्नो करियरमा अगाडि बढ्न नचाहेको बताएका थिए। तिनले यसलाई आफ्नो सिद्धान्तविपरीत ठान्छन्।
यस्तो छ बाबिल र तृप्तिको फिल्म 'कला'
फिल्मको कथा सन् १९४० को दशकको हो। यो फिल्म उर्मिला मञ्जुश्री (स्वस्तिका मुखर्जी) र उनकी छोरी कला (तृप्ति डिमरी) को जटिल सम्बन्धको वरिपरी घुमेको छ।
उर्मिला आफ्नी छोरी कलालाई आफ्नो साङ्गीतिक विरासतलाई अगाडि बढाउन चाहन्छिन्, तर उर्मिला कलामा विश्वास गर्दिनन् ।कलाले आमाको मन जित्ने भरमग्दुर प्रयास गर्छिन्।
कथामा ट्विस्ट तब आउँछ जब रहस्यमयी गायक जगन (बाबिल) यसमा प्रवेश गर्छन्।
बाबिलका फिल्मी करिअर
बाबिलसँग यशराज फिल्म्सको पहिलो वेब सिरिज 'द रेलवे मेन' पनि छ, जुन भोपाल ग्यास त्रासदीमा आधारित हुनेछ। आर माधवन र के के मेनन पनि यसमा सहभागी छन्।
उनी सुजित सिरकारको 'उमेश क्रोनिकल्स' मा पनि देखिनेछन्। यो फिल्ममार्फत अमिताभ बच्चनसँग काम गर्ने बाबिलको सपना पूरा हुने भएको छ।
उनले फरहान अख्तरको सिरिज 'फ्राइडे नाइट प्लान'मा पनि आफ्नो उपस्थिति जनाउन लागेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914053.png)
-1764146706.png)
-1775812183.jpg)
-1779545841.jpg)
