काठमाडौं- केन्द्रदेखि प्रदेशसम्मको सत्ता अवसर गुमाएपछि पार्टीभित्र रक्षात्मक बन्न पुगेका कांग्रेस सभापति शेरबहादुर देउवाले आउँदो वैशाख पहिलो हप्तामा पार्टीको नीति महाधिवेशन बोलाउने गृहकार्य थालेका छन्।
मंसिर ४ मा सम्पन्न प्रतिनिधि सभा र प्रदेश सभा निर्वाचनमा सबैभन्दा ठूलो दल भएता पनि कांग्रेस सत्ताबाहिर पुगेपछि देउवा आलोचित हुँदै आएका छन्।
माओवादी केन्द्रका अध्यक्ष पुष्पकमल दाहाल ‘प्रचण्ड’ एमालेसँग मिलेर प्रधानमन्त्री बनेपछि कांग्रेसका संस्थापन इतर पक्षको निशानामा देउवा परेका छन्। त्यसैले उनी पछिल्लो समय सार्वजनिक रुपमा मौन देखिएका छन्। यद्यपि, पार्टीमा आफू निकट नेताहरूसँग भने आगामी रणनीतिका तय गर्नलाई लगातार छलफलमा रहेको देखिन्छ।
सत्ताबाट बाहिरिएको तात्तातो परिस्थितिका बीचमै सभापति देउवाले निर्वाचन समीक्षा गर्नका लागि पुस २२ गतेलाई केन्द्रीय समिति बैठक बोलाएका छन्। केही दिनसम्म चल्ने आकलन गरिएको बैठकका सन्दर्भमा रणनीति अख्तियार गर्न संस्थापन पक्ष र इतर पक्षका नेताहरू जुटेका छन्।
देउवामाथि संस्थापन इतर पक्षका नेताहरू आक्रामक देखिएका छन्। त्यसमा पनि दुई महामन्त्री एक साथ सभापति देउवाविरुद्ध देखिएपछि पार्टीभित्र देउवालाई अप्ठ्यारो पर्ने आकलन एकथरीको छ। जसको छनक महामन्त्रीद्वय गगन थापा र विश्वप्रकाश शर्माले शनिबार मात्रै संयुक्त अपिल जारी गरेर दिएका छन्।
थापा र शर्माले शनिबार राष्ट्रिय मेलमिलाप दिवसको अवसर पारेर निकालेको वक्तव्यमा पार्टीको आन्तरिक मामिला बारेमा गम्भीर समीक्षा गरेर मात्रै अगाडि बढ्न आग्रह गरेका छन्। उनीहरूले पछिल्लो केही समययता विकसित घटनाक्रमलाई ढाकछोप गरेर अल्मल्याउने चलखेलमा नलाग्न पनि सबैमा अपिल गरेका छन्।
तर, पार्टी सभापति देउवा र उनी पक्षका नेताहरू निर्वाचन समीक्षाको नाममा बैठकलाई केही दिन अलमल गर्दै असन्तुष्टि सेलाउने रणनीतिमा छन्। जसरी देउवाले २०७४ को निर्वाचनपछि डेढ महिनाभन्दा बढी समय केन्द्रीय समिति बैठकलाई लम्ब्याएर असन्तुष्टलाई गलाएका थिए। २०७४ को निर्वाचनमा कांग्रेस पराजय भएपछि बसेको बैठकमा देउवाले आफूप्रतिको असन्तुष्टिलाई 'म्यानेज' गरेका थिए। जिल्ला सभापतिहरूको भेला र महासमिति बैठकमा पनि सोही रणनीति अख्तियार गरेका थिए।
अहिले महामन्त्रीद्वयसहित संस्थापन इतर पक्षका केही नेताहरूले पार्टीको १४औँ महाधिवेशनलगत्तै गर्ने भनिएको नीति महाधिवेशनको माग गर्न थालेका छन्। महामन्त्री विश्वप्रकाश शर्माका अनुसार, यसअघि नै केन्द्रीय समिति बैठकले नीतिगत निर्णय गर्दै कसरी नीति महाधिवेशन गर्ने भन्ने कार्ययोजना बनाउन पार्टी कार्यालयलाई भनेको थियो। उनका अनुसार, पार्टीले बनाएको उक्त कार्ययोजना आउँदो केन्द्रीय समिति बैठकमा प्रस्तुत हुने छ। र, त्यसपछि कसरी र कहिले नीति महाधिवेशन गर्ने भन्ने निर्णय केन्द्रीय समिति बैठकले गर्ने छ।
कांग्रेसले पहिलो पटक नीति महाधिवेशन गर्न लागेको हो। त्यसको कार्ययोजना नभएकाले यसअघिको बैठकबाट त्यो बनाउन पार्टी कार्यालयलाई निर्देशन दिएको हो।
महामन्त्री थापा र शर्मा दुवैले सार्वजनिक रुपमा अबको केन्द्रीय समिति बैठकबाट नीति महाधिवेशन गर्नेगरी निर्णय गराउन आफूहरूले माग गर्ने बताएका छन्। महामन्त्रीहरूको उक्त माग सम्बोधन सम्बोधन गर्ने गरी सभापति देउवा आउँदो वैशाख पहिलो हप्ता नीति महाधिवेशन गराउन तयार रहेको उनी निकटका एक नेता बताउँछन्।
१४औँ महाधिवेशनमा महाधिवेशन प्रतिनिधिहरूमा सभापति देउवा पक्षको वर्चस्व रहेकाले इतर पक्ष जति नै आक्रामक भएता पनि फरक नपर्ने मनस्थितिमा छन्। अर्कोतिर, केन्द्रदेखि प्रदेशसम्म पार्टी प्रतिपक्ष बन्न लागेको बेला देउवाविरुद्ध पार्टीमा जनमत निर्माण गर्न सकिन्छ कि भन्ने ध्येयमा इतर पक्ष देखिन्छ।
इतर पक्ष यो विषय केन्द्रीय समितिमा पनि आक्रामक रुपमा उठाउने रणनीतिमा देखिएका छन्। तर, केन्द्रीय समितिमा पनि सभापति देउवा पक्षको ७० प्रतिशतभन्दा बढी प्रतिनिधि भएकाले इतर पक्षको प्रस्तुति कति सशक्त हुन्छ भन्नेचाहिँ निश्चित छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
