काठमाडौं– उनीहरूको पहिलो भेट पानीपोखरीस्थित वालनट बिस्ट्रोमा भएको थियो। प्रायः एकै समय देखिने ती दुई एकआपसमा चाहिँ अपरिचित थिए।
वल्लो टेबलमा कफी पिउँदै बसेका केटासँग पल्लो टेबलमा बसेकी केटीको आँखा जुध्यो। अर्को दिन मुस्कानबाट सम्बन्धको सुरुवात भयो।
त्यसपछि ‘हाइहेल्लो’।
उनीहरूले आपसमा परिचय साटे। टेबलमा बसेर कफीगफ थाले। सम्बन्ध विस्तारै प्रेममा बदलियो। र प्रेम चार महिनापछि विवाहमा।
रेस्टुरेन्टका सञ्चालक आकाश पौडेल त्यो प्रसङ्ग कहिल्यै भुल्दैनन्। रेस्टुरेन्टमा बुनिएको ती जोडीको सुन्दर प्रेमकथा उनी ‘ओखरभट्टी’मा बसेर साथीहरूलाई सुनाइरहन्छन्।
ओखर र आँपका बोटहरू, रंगीचंगी फुल्ने फूलहरू रेस्टुरेन्टका दृश्यहरूको सधैं साक्षी भइरहन्छन्। प्रेमीहरू आउने र सौन्दर्यका कुरा गर्ने, कविहरू आउने र कविताको कुरा गर्ने, कलाकार आउने र सिर्जनाका कुरा गर्ने। आकाशको ‘ओखरभट्टी’ जीवन्त लाग्ने यी दृश्यहरू थपिरहन चाहन्छ।
आकाश फिल्मकर्फी हुन्। उनी सधैं नयाँ स्वादका कथाहरूको खोजी गर्छन्। उनको प्रयत्न पनि नयाँ स्वाद पस्कनुमै छ, चाहे फिल्ममा होस् वा रेस्टुरेन्ट।
हामी उनीसँग घरी फिल्मका कुरा गर्छौं, घरी रेस्टुरेन्टका। दुवैका कथाहरू छन्। तर आकाशको चाहना हो, दुवैलाई एउटै गाँठोले जोड्नु।
हरेक मान्छेसँग अलग अलग कथा हुन्छ। कथा सेयरिङको हब बनाउने रहर थियो आकाशलाई। कोलाहलले भरिएको सहरभित्र पनि जङ्गलजस्तो शान्त स्थान बनाउने चाहना थियो। त्यो ठाउँ, जहाँ मान्छेहरू एकअर्कामा खुसी ‘सेलिब्रेट गरुन्, दुःख सेलिब्रेट गरुन्।
वालनट बिस्ट्रो त्यही रहरको मूर्त स्वरुप हो।
‘मलाई वालनट बिस्ट्रोमा वेभसिरिज बनाउन मन छ। जस्तो कि यहीँ कसैको प्रेम हुन्छ, र ब्रेकअप पनि,’ आकाश बुन्दै गरेको योजना सुनाउँछन्। उनको रेस्टुरेन्टमा जति पटक मानिस जान्छन्, उति पटक नयाँ अनुभूति गर्छन्। ‘साना बिरुवा हुर्कँदै गइरहेका हुन्छन्, रुखका पातहरूले रङ फेरिरहेका हुन्छन्,’ उनी भन्छन्।
उसो त वरिपरी उभिएका रूखहरूले जङ्गलमा पुगेको भान दिन्छन्।
आकाश सन् २००७ मा बेलायत गएका थिए। तर एक वर्ष भन्दा बढी टिकेनन्। नेपालमै फर्किए। फर्केपछि उनले दुई वटा योजनाको खाका मस्तिष्कमा कोरे।
एउटा फिल्म, अर्को रेस्टुरेन्ट।
युकेबाट फर्केपछि उनी फिल्म पढ्न ओस्कार कलेज भर्ना भए। सँगसँगै रेस्टुरेन्टको ‘रोडम्याप’ पनि कोरिरहे। ‘काठमाडौंमा १ हजार रेस्टुरेन्ट छ भने ९ सय ९९ छाडेर मेरोमा ग्राहक किन आउने भनेर जवाफ खोजिरहेँ। भेटिएपछि काम सुरु गरेँ,’ आकाश भन्छन्।
आकाशको योजनाले सन् २०१९मा मात्र पूर्णता पायो। तर ३ करोड लगानी गरेर सञ्चालन गरिएको रेस्टुरेन्ट सुरु भएको केही महिनामै कोभिड महामारी फैलियो। ‘फिल्म बनाउने मान्छेले जस्तोसुकै चुनौती पनि झेल्न सक्ने रहेछ। मैले कोभिडको सामना गर्दा अनुभूत गरेँ,’ आकाश सुनाउँछन्।
त्यतिबेला आफू जोगिएर रेस्टुरेन्ट जोगाउनुपर्ने चुनौती थियो आकाशमा। वरिपरी हस्पिटलहरू थिए, डाक्टरहरूले उनलाई सहयोग गरे। सिंगो लकडाउनमा मानिसहरू थुनिइरहेको बेला उनको रेस्टुरेन्ट भने चलिरहेको थियो।
कोभिडपश्चात् वालनट बिस्ट्रोमा नेपाली दाल, भात, तरकारी निकै चल्यो। उनले एउटा सर्त बनाएर खानाको प्रचार गरेका थिए। सर्त थियो, सन्तुष्ट भए पैसा तिरौं, मन नपरे नतिरौं।
जति ग्राहकहरू आए, दोहोर्याएरै आउन थाले।
खानासँगै मामाघरे नुडल्स, पोलपाल चिकेन, मायालु सलाद, पिरो पिज्जा, खप्तड आलु लगायत अर्गानिक खानाहरूका स्वाद ग्राहकलाई पस्कन्छन् आकाश।
सानो लाइब्रेरी छ, रेस्टुरेन्टमा। आफूसँग भएको किताब त्यहाँ राखेर मन परेको नयाँ लैजान मिल्ने सुविधा। त्यसरी दिनदिनै नयाँ किताब फेरिएका हुन्छन् लाइब्रेरीमा।
०००
रेस्टुरेन्ट त आकाशले पेटका लागि सुरु गरे, तर मनका लागि सिनेमा बनाउने धोको भने ठूलै छ उनीसँग।
उनी थुप्रै सिनेमा हेर्थे। सिनेमा हेर्दाहेर्दै आकाशलाई पनि आफ्नो कथा भन्न मन लाग्यो। त्यही मनलाई तिखार्न उनी नेपाल फर्किएर फिल्म कलेज भर्ना भएका थिए।
०७३ सालमा उनीरूको टिमले ‘कथा ०७२’ निर्माण गर्यो। आमाछोराको सम्बन्धमाथि बनेको फिल्म भूकम्पको परिवेशमा खिचिएको थियो। फिल्मका निर्देशक प्रवीन स्याङ्बो र आकाश मिलेर लोकल सिनेमा प्रोडक्सन हाउस सुरु गरेका थिए।
सिन्धुपाल्चोकको पाँचपोखरीको यात्रा कठिन र रोचक दुवै थियो उनीहरूको लागि। ‘फिल्मको सुटिङबाट फर्कँदा मेडिटेसन गरेर फर्किएजस्तो भएको थियो,’ उनी सम्झन्छन्।
फिल्म ०७५मा रिलिज भयो। तर, व्यापार निकै कमजोर। यद्यपि, फिल्मले ‘फिल्म लिट्रेसी’ भएका दर्शकहरूको मन जित्यो। विभिन्न फेस्टिभलहरूमा सहभागी भयो र प्रशंसित पनि।
उनीहरूकै टिमले बनाएको फिल्म ‘चिसो एस्ट्रे’को पनि हाल उस्तै रह्यो।
तर ‘ऐना झ्यालको पुतली’ले भने देश विदेशमा ठूलो चर्चा कमायो। उनी फिल्मको निर्माता मध्येको एक थिए। फिल्मले बक्स अफिसमा ठूलो सफलता त चुमेन, तर फेस्टिभल र गम्भीर दर्शकहरूको निकै प्रशंसा बटुल्यो।
आकाश अब आफैं फिल्म निर्देशन गर्ने तयारीमा छन्। उनलाई कमर्सियल फिल्म बनाउनु छ। ‘हाम्रो टिमले अहिलेसम्म मासको लागि फिल्म बनाएको रहेनछ। अब मासको लागि मीठो प्रेम कथा भन्नुछ,’ उनी भन्छन्।
उनले नयाँ बन्ने फिल्मको स्क्रिप्ट तयार पारिसके। अब छिट्टै सुटिङमा जाने तरखरमा छन् आकाश।
उनी जे कर्म गर्छन्, त्यसलाई फिल्मसँगै जोड्छन्। आकाशको १२ रोपनी जग्गा बुढानिलकण्ठमा छ। उनी त्यो जग्गाको प्रयोग गरेर लोकल सिनेमाको उद्यान खोल्न चाहन्छन्। ‘त्यस्तो उद्यान, भित्र स्क्रिप्ट लिएर कोही छिर्यो भने निस्कँदा फिल्म लिएर फर्कियोस्,’ आकाश योजना सुनाएर दंग पार्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
