बुटवल–
घटना १
२०७८ चैत २३ गते रुपन्देही प्रहरीले सैनामैना नगरपालिका पानबारीका ४० वर्षीय राजकुमार विश्वकर्मालाई पक्राउ गर्यो। विश्वकर्माले ३५ वर्षीय बोल्न नसक्ने महिलालाई मादक पदार्थ सेवन गरी आफ्नै घरको गोठमा लगी बलात्कार गर्दैगर्दा उनकी श्रीमतीले देखेपछि प्रहरीमा उजुरी दिएकी थिइन्। प्रहरीले सोही उजुरीका आधारमा विश्वकर्मालाई पक्राउ गरेको थियो। अहिले विश्वकर्मा पुपर्क्षका लागि थुनामा छन्।
घटना २
गत जेठ १५ गते ६ वर्षीया बालिकालाई बलात्कार गरेको आरोपमा प्रहरीले बालिका बाबुलाई पक्राउ गर्यो। तिलोत्तमाका २६ वर्षीय ति व्यक्तिले जेठ १० गते छोरी सँगै टिभी हेरेर बसेको अवस्थामा बलात्कार गरेको भनेर उनकै श्रीमतीले उजुरी दिएकी थिइन्। उनी पनि अहिले पुपर्क्षका लागि थुनामा छन्।
घटना ३
गत साउन २७ गते ६ वर्षीया बालिकालाई बलात्कार गरेको आरोपमा प्रहरीले रुपन्देहीको सुद्धोधन गाउँपालिका बाट एक जना युवकलाई पक्राउ गर्यो। २० वर्षीय सुनिल परियारले घरमै खल्दै गरेकी बालिकालाई चकलेट किनिदिने प्रलोभन देखाएर बलात्कार गरेको बालिकाकी आमाले दिएको उजुरीका आधारमा सोही दिन प्रहरीले परियारलाई पक्राउ गरेको थियो। अहिले परियार पुपर्क्षका लागि थुनामा छन्।
यी रुपन्देही जिल्लामा विगत एक वर्षमा भएका बलात्कारका यी प्रतिनिधिमुलक घटना हुन्। जिल्लामा पछिल्लो एक वर्षमा गैर राज्यपक्षबाट मानवअधिकार उल्लंघनका घटना बढेको पाइयो।
अनौपचारिक सेवा केन्द्र (इन्सेक) रुपन्देहीले गरेको एक अध्ययन प्रतिवेदनले रुपन्देही जिल्लामा महिला तथा बालबालिकाहरु माथि हुने मानवअधिकार उल्लंघनका घटनाहरु धेरैनै बढ्दै गएको बताएको छ।
जिल्लामा बलात्कार, यौन दुर्व्यवहार, लैङ्गिक र घरेलु हिंसा, बहुबिवाह, शरीर बन्धक तथा अपहरणका घटनामा उल्लेख्य वृद्धि भएको पाइएको छ। इन्सेक रुपन्देहीकी प्रतिनिधि रिमा विसीले पछिल्लो एक वर्षको अवधिमा जिल्लामा राज्यपक्षबाट भएका मानवअधिकार उल्लंघनका घटनामा कमी हुँदै गए पनि गैर राज्य पक्षबाट बढ्दै गएको बताइन्।
इन्सेकको प्रतिवेदन अनुसार रुपन्देही जिल्लाको १ वर्षको अभिलेखमा ६ सय ५५ वटा घटना भएका छन्। जसमा सबैभन्दा बढी घरेलु हिंसाका रहेका छन्। मादक पदार्थ सेवन गरि कुटपिट, शारीरिक तथा मानसिक यातना, शंका–उपशंका, घर निकालालगायतका घरेलु हिंसाका घटना ५ सय ५१ रहेका छन्।
यस्तै बालिका बलात्कार ३४, बालिका यौन दुर्व्यवहार १२, बालबिवाह १, महिला बलात्कार २६, महिला बलात्कार प्रयास १४, बहुविवाह ५, अपहरण तथा शरीर बन्धक र जबरजस्ती गर्भपतन १/१, पारिवारिक हत्या ८, मानव बेचबिखन तथा ओसारपसार २ र एउटा कुटपिट गरेर गर्भपतन भएका छन्।
रुपन्देहीका प्रमुख जिल्ला अधिकारी भरतमणि पाण्डेले गैर राज्यपक्ष बाट हुने मानव अधिकार उल्लंघनका घटना न्यूनीकरणमा नागरिक समाजले महत्वपूर्ण भूमिका निभाउन सक्ने बताए। पाण्डेले घरेलु हिंसा, महिला हिंसालगायत गैर राज्यपक्ष बाट हुने मानवअधिकार उल्लंघनका घटनाहरु प्रशासन, प्रहरी र जनप्रतिनिधि तथा नागरिक एक भएर काम गर्न सके न्यूनीकरण गर्न सकिने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
