काठमाडौं– प्रहरी प्रधान कार्यालयले आइतबार निकालेको प्रहरी उपरीक्षक (एसपी)को काज सरुवामा नेताका पीएसओ (पर्सनल सेक्युरेटी अफिसर) कै बोलवाला देखिएको छ।
सोमबार २३ एसपीको काज सरुवा निकाल्दा ८ जिल्लाका प्रहरी प्रमुखहरु फेरिएका थिए। ती ८ जिल्लाका इञ्चार्ज पाउनेहरु अधिकांश शक्तिकेन्द्र निकट रहेका देखिएका छन्। अझ आकर्षक मानिने जिल्लाहरुमा वर्तमानदेखि पूर्व प्रधानमन्त्रीका पीएसओहरु हाबी भएको देखिएको छ।
एसपीका लागि सबैभन्दा आकर्षक मानिने जिल्लामध्ये तराईको पर्सा हो। भारतसँगको मुख्य सीमानाका रहेको पर्सा ‘आर्थिक कमाइ’का हिसाबले निकै आकर्षक मानिन्छ। आकर्षक मानिने पर्साको इञ्चार्ज प्रधानमन्त्री शेरबहादुर देउवाका पूर्वपीएसओ कोमल शाहले पाएका छन्। प्रधानमन्त्री निकट रहेका शाह बालुवाटारकै रुचिमा पर्सा पुगेका हुन्।
यसअघि डीएसपीबाट एसपीमा बढुवा हुँदा पनि शाहले छलाङ मारेका थिए। गत असारमा प्रहरी प्रधान कार्यालयले ३६ जना डीएसपीलाई एसपीमा बढुवा गरेका थियो। विभिन्न ३ मितिमा डीएसपी बनेकाहरु आफ्नो ब्याचको पहिलो नम्बरमा हुँदा समेत छुट्दा उनै कोमल शाहले भने छलाङ मारेका थिए। डीएसपीसम्म २५ नम्बरमा रहेका शाह एसपी बढुवामा छलाङ मार्दै आफ्नो ब्याचमा दोस्रो नम्बरमा आएका थिए। त्यतिबेला उनी देवाकै पीएसओको रुपमा कार्यरत थिए। अहिले फेरि सरुवामा उनै शाह हाबी भएका छन्।
मध्य तराईको अर्को जिल्ला सर्लाहीको इञ्चार्ज पाउने नरेशराज सुवेदी पनि नेताकै पीएसओ भइसकेका व्यक्ति हुन्। माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल (प्रचण्ड) का पीएसओ सुवेदी शक्तिकेन्द्रकै ‘पावर’मा सर्लाही पुगेका हुन्। यसअघि उनी राष्ट्रिय प्रहरी प्रशिक्षण प्रतिष्ठान तालिम शाखा महाराजगञ्जमा कार्यरत थिए।
शक्तिकेन्द्रकै रोजाइमा तराईको अर्को आकर्षक जिल्लाको प्रमुख बनेका व्यक्ति हुन् एसपी विश्वराज खड्का । त्रिभुवन अन्तर्राष्ट्रिय विमानस्थल सुरक्षा कार्यालय, सानोगौचरमा रहेका खड्कालाई धुनषाको प्रहरी प्रमुख बनाएर पठाइएको छ। यसअघि उनले दरबारमार्ग वृत्त प्रमुखको जिम्मेवारी पाएका थिए।
पूर्वगृहमन्त्री खुमबहादुर खड्काका भतिजा समेत रहेका विश्वराज कांग्रेसका नेताहरुसँग राम्रो हिमचिम भएकै कारण विवादित हुँदा पनि पटक–पटक इञ्चार्ज पाइरहने अफिसर हुन्।
यसअघि महानगरीय प्रहरी वृत्त बालाजु र इलाका प्रहरी कार्यालय गजुरीमा रहँदा प्रहरी आचरण विपरीत काम गरको भन्दै प्रहरी प्रधान कार्यालयले खड्काको जिम्मेवारी खोसेको थियो।
ललितपुर परिसरमा कार्यरत रहँदा त १ लाख रुपैयाँ घुसकाण्डमा मुछिएपछि उनी कारबाहीमै परेका थिए। राष्ट्रिय अनुसन्धान विभागबाट नेपाल प्रहरीमा आएका अधिकृत हुन् खड्का।
अर्को आकर्षक जिल्ला बाँकेको कमाण्ड सम्हाल्ने अर्का पीएसओ हुन् सन्तोषसिंह राठौर। उनी प्रचण्डकै पूर्व पीएसओ हुन्। शक्तिकेन्द्रकै आशीर्वादका कारणलाई उनलाई बाँकेको प्रहरी प्रमुख बनाइएको छ।
काठमाडौं उपत्यका प्रहरी कार्यालय अन्वेषण तथा योजना विकास शाखामा दरबन्दी रहेर केन्द्रीय विशेष कार्यदलमा रहेका राठौर खुमलटारको पहुँचमा आकर्षक मानिने पश्चित तराईको जिल्ला बाँकेको इञ्चार्ज भएका हुन्।
यसअघि पनि राठौरले आकर्षक मानिने प्रहरी वृत्त सोह्रखुट्टेको इञ्चार्ज भएका थिए। राठौर यसअघि सर्लाही जिल्लाको इञ्चार्ज समेत भइसकेका व्यक्ति हुन्। शक्तिकेन्द्रको पहुँचमा आकर्षक मानिने ठाउँको इञ्चार्ज पाउँदै आएका राठौर सर्लाहीमा हुँदा विवादित बनेका थिए। २०७८ को दशैंमा एसपी राठौरसँगै सर्लाहीका सीडीओ, सशस्त्रका सर्लाही प्रमुखसहितको टोली सार्वजनिक स्थलमा बसेर तास खेलेको भिडिओ सार्वजनिक भएको थियो। उक्त विवादपछि उनी मधेस प्रदेश प्रहरी कार्यालयमा तानिएका थिए।
त्यसैगरी कैलालीको इञ्चार्जमा देबेन्द्रबहादुर पाल, सिन्धुलीको इञ्चार्जमा राजकुमार सिलवाल, सुर्खेतको इञ्चार्जमा योगेन्द्रसिंह थापा र झापाको इञ्चार्जको दुर्गाराग रेग्मीले पाएका छन्।
एसपी श्याककृष्ण अधिकारी र योगन्द्रसिंह थापाको भने इञ्चार्ज–टु–इञ्चार्ज सरुवा भएको छ। बाँकेको एसपी भएर काम गरेका अधिकारीलाई त्यहाँबाट अर्को इञ्चार्ज राजमार्ग सुरक्षा तथा ट्राफिक व्यवस्थापन कार्यालय बुटवल पठाइएको छ।
अधिकारीभन्दा अघिसम्म राजमार्ग सुरक्षा तथा ट्राफिक व्यवस्थापन कार्यालय बुटवलको इञ्चार्ज रहेका योगेन्द्रसिंह थापाले सुर्खेतको इञ्चार्ज पाएका हुन्। इञ्चार्ज–टु–इञ्चार्ज सुरुवा नगर्ने नीति विपरीत उनीहरुको भने इञ्चार्ज–टु–इञ्चार्ज सरुवा भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
