बैतडी– नेकपा एमाले बैतडीले पञ्चेश्वर गाउँपालिकाका अध्यक्ष गोरखबहादुर चन्दलाई साधारण सदस्य समेत नरहनेगरी पार्टीबाट निष्कासन गर्ने निर्णय गरेको छ। जिल्ला सदरमुकाममा बसेको नेकपा एमालेको सातौँ जिल्ला कमिटी बैठकले अध्यक्ष चन्दलाई कारबाहीका लागि प्रदेश कमिटीलाई सिफारिस गर्ने निर्णय भएको जिल्ला अध्यक्ष सुरेन्द्र पालले बताए।
उनले भने,‘पञ्चेश्वर गाउँपालिकाका अध्यक्षले मंसिर ४ गते सम्पन्न प्रतिनिधि सभा र प्रदेश सभाको निर्वाचनमा पार्टीका उम्मेदवारलाई हराउन भूमिका खेलेको देखियो।’ छानबिन समितिले अनुसन्धान गरेर बुझाएको प्रतिवेदनअनुसार चन्द ‘दोषी’ देखिएको पालले बताए।
जिल्ला कमिटीको बैठकले पार्टीको साधारण सदस्यसमेत नरहने गरेर निष्कासन गर्न प्रदेश कमिटीलाई सिफारिस गरेको हो। एमालेका सुदूरपश्चिम प्रदेश कमिटी सचिवालय सदस्यसमेत रहेका चन्दलाई पालिका अध्यक्षबाट समेत पदमुक्त गर्न निर्वाचन आयोगलाई सिफारिस गर्न प्रदेश कमिटीलाई आग्रह गरिएको एमाले बैतडीले जनाएको छ।
छानबिनका लागि जिल्ला कमिटी सचिव तथा दोगडाकेदार गाउँपलिका अध्यक्ष चक्र कार्कीको संयोजकत्वमा ३ सदस्यीय समिति गठन गरिएको थियो। समितिको सदस्यमा पार्टीका जिल्ला सचिवालय सदस्य नरेश पाण्डे ‘निर्मल’ र सिगास गाउँपालिका इञ्चार्ज योगेन्द्र अवस्थी रहेका थिए।
छानबिन समितले गाउँपालिका अध्यक्ष चन्दलाई पार्टी विधानको धारा ८० को उपधारा १, २, ३, ४, ५, ७ र १२ अनुसार पार्टी हितविरुद्ध काम गरेको निष्कर्ष निकालेको छ। प्रदेश सभा निर्वाचनमा बैतडी प्रदेश सभा क्षेत्र नम्बर (२) बाट एमालेका नेता लीलाधर भट्ट उम्मेदवार थिए। नेपाली कांग्रेसका शिवराज भट्टसँग उनी पराजित भएपछि पार्टीभित्रबाटै अन्तर्घात भएको भन्दै एमाले बैतडीले छानबिन समिति गठन गरेको थियो।
चन्दको प्रश्न: जनतालाई पनि कारबाही हुन्छ?
अन्तर्घात गरेको आरोपमा कारबाहीका लागि सिफारिसमा परेपछि गाउँपालिका अध्यक्ष चन्दले मतदातलाई पनि कारबाही हुनुपर्ने भन्दै कारबाहीको सिफारिसप्रति व्यंग गरेका छन्। कारबाही नै गर्ने हो भने आफूलाई नभइ जनतालाई कारबाही हुनुपर्ने उनको टिप्पणी छ।
चन्दले आफूमाथि पूर्वाग्रह राखेर कारबाही निर्णय भएको बताएका छन्। ‘प्रदेश सभा निर्वाचनमा दोस्रोपटक उम्मेदवार बन्नु भएका लीलाधर भट्टलाई पञ्चेश्वरबाट बढी भोट गए पनि पूर्वाग्रह राखेर कारबाही गरिएको छ,’ चन्दले भने। कारबाहीको निर्णयविरुद्ध आफू अदालत जाने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
