काठमाडौं– गएराति स्विट्जरल्याण्डविरुद्ध ६– १ को सानदार जित निकाल्दै पोर्चुगल कतारमा जारी विश्वकप फुटबलको क्वार्टरफाइालमा प्रवेश गर्दा एकजना युवा खेलाडीले सनसनी मच्चाए। उनी थिए २१ वर्षीय गोन्कालो रामोस।
विश्वकपमा पहिलोपटक सुरुवाती ११ मा स्थान बनाएका रामोसले सनसनीपूर्ण ह्याट्रिक गरेपछि चर्चामा छन्। जारी विश्वकपमा ह्याट्रिक गर्ने उनी एक्लो खेलाडी हुन्।
कप्तान क्रिस्टियानो रोनाल्डोलाई बेन्चमा राखेर रामोसलाई अवसर दिँदा मुख्य प्रशिक्षक फर्नान्डो सान्तोेसको आलोचनासमेत भएको थियो।
तर, १७ औँ मिनेटमा नै गोल गर्दै रामोसले पोर्चुगललाई अग्रता दिलाएपछि आलोचना गर्नेहरू झस्किए। उनी यतिमै रोकिएनन्। उनले ५१ र ६७ औँ मिनेटमा गोल गर्दै ह्याट्रिक पूरा गरे। त्यसपछि खेल पोर्चुगलले ६–१ को फराकिलो अन्तरले जित्यो।
रामोस विश्वकपको सुरुवाती ११ मा पहिलोपटक परेर ह्याट्रिक गर्ने जर्मनीका मिरोस्लाभ क्लासपछि दोस्रो खेलाडी बनेका छन्।
विश्वकपको नकआउट चरणजस्तो माथिल्लो स्तरमा सनसनीपूर्ण ह्याट्रिक गरेका रामोस सन् २००१ जुन २० मा मा पोर्चुगलको ओल्हाओमा जन्मिएका थिए। उनी बेन्फिकाको ‘बी’ टिमहुँदै सिनियर टोलीमा आएका हुन्। जारी च्याम्पियन्स लिगमा समूह विजेता बन्दै बेन्फिका अन्तिम १६ मा पुगेको छ, यसमा रामोसको पनि उल्लेख्य योगदान छ।
सन् २०२० देखि बेन्फिकाको सिनियर टिममा स्थान बनाएका रामोसले ४५ खेलबाट २० गोल गरिसकेका छन्।
क्लब स्तरमा उच्च प्रदर्शन गरेपछि २० सेप्टेम्बरमा रामोस नेसन्स लिगको खेलबाट राष्ट्रिय टोलीमा परेका थिए।
राफा सिल्भाले सन्यास लिएपछि उनको विकल्पका रुपमा रामोसलाई बोलाइएको थियो।
त्यसपछि रामोसले विश्वकप टोलीमा स्थान बनाए। १७ नोभेम्बरमा नाइजेरियाविरुद्ध ४–० को जित निकाल्दा उनले पोर्चुगलका लागि पहिलो खेल खेलेका थिए। तर, उनले डेब्यू खेलमै एक गोल र एक असिस्ट गर्दै सनसनी मच्चाए।
रामोसले पोर्चुगलका लागि चार खेल खेल्दा चारै गोल गरिसकेका छन्।
यसअघि रामोसले विभिन्न उमेर समूहको पोर्चुगलको राष्ट्रिय टोलीमा खेलिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1765768760.png)
-1763721444.png)
-1765273665.jpg)
