मधेसमा माओवादीको हँसिया हथौडा जोगाउने महेन्द्र राय

राजनीति

नेपाल लाइभ आइतबार, मंसिर ११, २०७९ १०:३०

काठमाडौं– डा बाबुराम भट्टराईले उपेन्द्र यादवसँग ‘सम्बन्ध विच्छेद’ गरी नयाँ दल, नेपाल समाजवादी पार्टी (नेसपा) गठन गर्दा महेन्द्र राय यादव पनि सँगै आए।

मधेस केन्द्रित दलको प्रभावशाली नेता बाबुराम भट्टराईको पछि लाग्दा उनको राजनीतिक भविष्यलाई लिएर पनि टिप्पणी हुन थाल्यो। मधेसमा खासै प्रभाव नभएका डा भट्टराईलाई नेतृत्व मानेर अगाडि बढ्दा उनको राजनीतिक भविष्य के हुन्छ? भनेर विश्लेषण हुन थाल्यो।

तर, उनै यादवले मधेस प्रदेशमा नेकपा माओवादी केन्द्रको चुनाव चिह्न जोगाएका छन्। नेसपाले प्रदेश तथा प्रतिनिधि सभा निर्वाचनमा माओवादीको चुनाव चिह्नबाट प्रतिस्पर्धामा जाने निर्णय गरेको थियो। जसअनुसार यादव माओवादीको चुनाव चिह्न गोलाकार भित्रको हँसिया हथौडा लिएर सर्लाही क्षेत्र नम्बर २ बाट प्रतिनिधि सभा सदस्यको उम्मेदवार बने।

माओवादी केन्द्रले मधेस प्रदेशका ४ क्षेत्रमा उम्मेदवारी दिएकामा सबै क्षेत्रको परिणाम आउँदा यादव मात्रै निर्वाचित भएका हुन्। सर्लाही २ बाट सत्ता गठबन्धनकै सहयात्री दल लोकतान्त्रिक समाजवादीका वरिष्ठ नेता राजेन्द्र महतोलाई पराजित गर्दै राय निर्वाचित भएका हुन्। रायले २३ हजार ५२९ मत पाउँदा महतोले २१ हजार ५१८ मत प्राप्त गरे।

मधेस प्रदेशमा माओवादीले धनुषा–१, महोत्तरी–१, सिरहा–३ र सर्लाही–२ मा उम्मेदवारी दिएको थियो। धनुषा–१ मा पार्टीका उपमहासचिव मातृका यादव जनता समाजवादी पार्टीका दीपक कार्कीसँग पराजित भएका छन्। महोत्तरी–१ मा उपमहासचिव गिरिराजमणि पोखरेल नेकपा (एमाले) नेता लक्ष्मी महतो कोइरीसँग र सिरहा–३ मा विश्वनाथ साह एमाले नेता लीलानाथ श्रेष्ठसँग पराजित भए।

विसं २०७४ मा राष्ट्रिय जनता पार्टीबाट सोही क्षेत्रबाट निर्वाचित राय अहिले पनि माओवादी होइनन्। उनी बाबुराम भट्टराई नेतृत्वको नेपाल समाजवादी पार्टीको अध्यक्ष हुन्।

विसं २०६२/६३ अघिसम्म एमालेबाट राजनीति गरेका राय सो पार्टीको केन्द्रीय सदस्य समेत बने। सोही पार्टीबाट २०५१ को मध्यावधि निर्वाचन र २०५६ को प्रतिनिधिसभा सदस्य निर्वाचनमा उम्मेदवार बनेर सर्लाहीबाट निर्वाचित भए।

तर २०६२/६३ को आन्दोलनपछि एमाले परित्याग गरी तराई–मधेस लोकतान्त्रिक पार्टी स्थापना गरेर त्यसको महासचिव बने। राजनीतिक घटनाक्रमले मधेसवादी दल जुट्न र फुट्न थालेपछि उनी तमलोपा परित्याग गरी तराई मधेस सद्भावना पार्टी हुँदै राष्ट्रिय जनता पार्टीको अध्यक्षमण्डलको सदस्यसमेत भए।

पछि राष्ट्रिय जनता पार्टी र सङ्घीय समाजवादी फोरम एकीकरण गरी बनेको जनता समाजवादी पार्टी हुँदै अहिले नेपाल समाजवादी पार्टीको अध्यक्ष छन्।

राय २०६४ र २०७० को संविधान सभा सदस्य निर्वाचनमा पनि सर्लाही–४ बाट विजयी भएका थिए। संविधान निर्माणपछिको पहिलो आमनिर्वाचन २०७४ मा पनि उनी सर्लाही–२ बाटै निर्वाचित भए। उनी २०५४ मा राज्यमन्त्री, २०६४ मा सिँचाइमन्त्री, २०६७ मा उद्योगमन्त्री र २०७४ को निर्वाचनपछि कृषि तथा पशुपक्षी विकासमन्त्री बनेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

पर्सामा रवि लामिछानेको बयान सकियो

एनपीएलमा पहिलोपटक जनकपुरको ब्याटिङ लाइन कोल्याब्स, १२ ओभरमै अलआउट, सुदूरको चौथो जीत

सामान्य लक्ष्य पाएको जनकपुरले सस्तैमा गुमायो पाँच विकेट, अनिल शून्यमा आउट हुँदा आशिफ पनि चार रन मात्र बनाउँदै पेभिलियन फर्किए