काठमाडौं– प्रतिनिधिसभा सदस्य र प्रदेश सभा सदस्यको निर्वाचनको मतगणना जारी छ। १४ जना सांसदले भने निरन्तर विसं २०७०यता ह्याट्रिक गरिरहेका छन्। नेपाली कांग्रेसका ६, एमालेका ४, माओवादीका ३ र समाजवादीका १ जना निरन्तर संसदमा आइरहेका छन्।
उसो त ०४८ सालदेखि निरन्तर निर्वाचित हुने सांसद पनि छन्। उदयपुर–१ र रुपन्देही–२ मा मतगणना जारी छ। एमालेका विष्णु पौडेल र कांग्रेसका नारायण खड्काले निकाल्न सके भने यो सङ्ख्या १६ पुग्ने छ।
दुवैले अग्रता लिइराखेका छन्। पराजित भए ह्याट्रिकमा ‘ब्रेक’ लाग्नेछ।
नेपाली कांग्रेस
प्रतिनिधिसभा सदस्यका लागि काठमाडौं–१ बाट प्रकाशमान सिंह विजयी भए। सिंहले ७ हजार १ सय ४३ मत ल्याउँदा राप्रपाका रवीन्द्र मिश्रले ७ हजार १८ मत ल्याए।
उनी सत्ता गठबन्धनका साझा उम्मेदवार बनेका थिए। उनी ०४८ र ०५१ को प्रतिनिधि सभा निर्वाचनमा काठमाडौं–४ र काठमाडौं–३ मा पराजित भएका थिए। ०५२मा राष्ट्रिय सभा सदस्य भएका उनी ०६४, ०७० र ०७४को निर्वाचनमा काठमाडौं– १ बाट निर्वाचित भएका थिए। छैठौँ पटक उनी संसदमा पुगेका छन्।
काठमाडौं–४ बाट गगनकुमार थापा विजयी भए। थापाले २१ हजार ३ सय २ मत प्राप्त गर्दा एमालेका राजन भट्टराईले १३ हजार ८ सय ५५ मत प्राप्त गरेका छन्। उनी सत्ता गठबन्धनका साझा उम्मेदवार थिए।
उनी ०६४ सालको संविधान सभा निर्वाचनमा समानुपातिक सभासद भएका थिए। ०७० र ०७४ को निर्वाचनमा काठमाडौं–४ बाट प्रत्यक्ष निर्वाचित भएका थिए।
काठमाडौं–१० बाट राजन केसी निर्वाचित भए। राजनले १४ हजार ४ सय ४८ मत प्राप्त गर्दा एमालेका हिमेश केसीले ११ हजार ७ सय ८६ मत प्राप्त गरेका छन्। उनी ०७० र ०७४ को निर्वाचनमा काठमाडौं–१० बाट निर्वाचित भएका थिए।
नवलपरासी पूर्व–१ बाट सशांक कोइराला निर्वाचित भए। सशांकले २७ हजार १ सय २७ मत ल्याएर विजयी भए। एमालेका कृष्णप्रसाद पौडेलले २५ हजार ४७ मत ल्याएका छन्। कोइराला सत्ता गठबन्धनका साझा उम्मेदवार बनेका थिए। उनी ०६४ र ०७०को संविधान सभा निर्वाचनमा तत्कालीन नवलपरासी–१बाट निर्वाचित भएका थिए। प्रतिनिधि सभा निर्वाचन ०७४ मा भने नवलपरासी पूर्व– १ बाट निर्वाचित भएका थिए।
बर्दिया २बाट संजय कुमार गौतम निर्वाचित भए। गौतमले ३० हजार ६ सय ११ मत प्राप्त गरेका छन्। उनका मुख्य प्रतिस्पर्धी एमालेका लक्ष्मराज ज्ञवालीले भने २६ हजार १ सय ५५ मत ल्याएका छन्। गौतम सत्ता गठबन्धनका साझा उम्मेदवार बनेका थिए। ०७० को संविधान सभा निर्वाचनमा बर्दिया– २ र २०७४ को प्रतिनिधि सभा निर्वाचनमा बर्दिया– १ बाट निर्वाचित भए।
डडेल्धुराबाट प्रधानमन्त्री एवम् नेपाली कांग्रेसका सभापति शेरबहादुर देउवा विजयी भए। उनले २५ हजार ५ सय ३४ मत ल्याउँदा स्वतन्त्र उम्मेदवार सागर ढकालले १३ हजार ४२ मत ल्याए। देउवा सत्ता गठबन्धनका साझा उम्मेदवार बनेका थिए।
देउवा ०४८, ०५१, ०५६, ०६४, ०७० र ०७४ भएको निर्वाचनमा डडेलधुराबाट विजयी भएका थिए। उनी ०६४मा कञ्चनपुर–४ र ०७० मा कैलाली–६बाट पनि विजयी भएका थिए।
उनी सातौँ पटक संसदमा टेक्ने देउवा एक मात्र सांसद बनेका छन्।
एमाले
झापा–५बाट नेकपा एमालेका अध्यक्ष केपी शर्मा ओली भारी मतान्तरका साथ विजयी भएका छन्। ओलीले ४२ हजार ३ सय १९ मत ल्याएका छन्। उनका निकटतम् प्रतिस्पर्धी नेपाली कांग्रेसका खगेन्द्र अधिकारीले २३ हजार ७ सय ४३ मत ल्याएका छन्। ०४८, ०५१ र ०५६मा सम्पन्न प्रतिनिधि सभा निर्वाचनमा उनी झापा–६बाट निर्वाचित भएका थिए। ०६४मा झापा–७ बाट पराजित भएका उनी ०७० मा झापा–७ बाटै निर्वाचित भए।
०७४ मा तत्कालीन वाम गठबन्धनका साझा उम्मेदवार बनेका उनी झापा–५ बाट निर्वाचित भएका थिए।
अर्घाखाँचीबाट टोपबहादुर रायमाझी विजयी भएका छन्। रायमाझीले ४२ हजार ६ सय ७५ मत ल्याउँदा नेपाली कांग्रेसकी पुष्पा भुसालले ४० हजार ९ सय ४५ मत ल्याइन्। रायमाझी ०६४ र ०७० मा भएका दुवै संविधान सभा निर्वाचनमा अर्घाखाँची–१ बाट निर्वाचित भएका थिए। त्यस्तै, ०७४ मा सम्पन्न प्रतिनिधि सभा निर्वाचनमा अर्घाखाँचीबाट निर्वाचित भएका थिए।
गुल्मी–२ बाट गोकर्ण विष्टले २८ हजार ४ सय ७६ मतसहित निर्वाचित भएका छन्। उनकी निकटतम् प्रतिस्पर्धी एकिकृत समाजवादीकी रामकुमारी झाँक्रीले भने २६ हजार ४ सय ४२ मत ल्याएकी छन्। यहाँ पूर्व एमालेहरूबीच प्रतिष्पर्धा भएको हो। विष्ट ०५६को प्रतिनिधि सभा निर्वाचनमा गुल्मी–३, ०७० को संविधान सभा निर्वाचनमा गुल्मी–३ र ०७४ को प्रतिनिधि सभा निर्वाचनमा गुल्मी–२ बाट निर्वाचित भएका थिए।
०६४ को संविधान सभा निर्वाचनमा भने गुल्मी– ३ बाट पराजित भएका थिए।
बैतडीबाट एमालेका दमोदर भण्डारीले ३३ हजार ६ सय ११ मत ल्याएर विजयी भएका छन्। उनका निकटतम प्रतिस्पर्धी माओवादीका नरेन्द्रबहादुर कुँवरले ३२ हजार ८० मत प्राप्त गरेका छन्। भण्डारी ०६४मा बैतडी– १ र ०७४ मा बैतडीबाट निर्वाचित भएका थिए।
माओवादी
गोरखा–२ बाट नेकपा माओवादीका अध्यक्ष पुष्पकमल दाहाल विजयी भएका छन्। अध्यक्ष दाहालले २६ हजार १ सय ३ मत ल्याउँदा राष्ट्रिय स्वतन्त्र पार्टीका कविन्द्र बुर्लाकोटीले १२ हजार ६ सय ३७ मत ल्याएका छन्। प्रचण्ड सत्ता गठबन्धनका साझा उम्मेदवार बनेका थिए। प्रचण्ड ०६४ मा सम्पन्न पहिलो संविधान सभाको निर्वाचनमा काठमाडौं–१० र रोल्पा–२ बाट विजयी भएका थिए।
०७० मा सम्पन्न दोस्रो संविधान सभा निर्वाचनमा सिरहा– ५ बाट विजयी भएका थिए भने काठमाडौं– १० बाट पराजित भएका थिए। २०७४ को प्रतिनिधि सभा निर्वाचनमा चितवन–३ बाट निर्वाचन भएका थिए। त्यतिबेला उनी एमाले र माओवादी केन्द्रले बनाएको वाम गठबन्धनको साझा उम्मेदवार थिए।
जाजरकोट–१ बाट शक्ति बहादुर बस्नेत निर्वाचित भएका छन्। बस्नेतले ३४ हजार १ सय ५१ मत ल्याउँदा एमालेका निरजप्रसाद आचार्यले भने २५ हजार १ सय २० मत ल्याएका छन्। उनी सत्ता गठबन्धनका साझा उम्मेदवार बनेका थिए। बस्नेत ०७० र ०७४ मा जाजरकोट–१ बाट प्रत्यक्ष निर्वाचित भइसकेका छन्।
रुकुम पश्चिम–१ बाट माओवादीका जनार्दन शर्मा निर्वाचित भएका छन्। अर्थमन्त्री समेत रहेका शर्माले ३९ हजार ५ सय ४९ मत प्राप्त गरेका छन्। उनका निकटतम् प्रतिस्पर्धी एमालेका नन्दराम देवकोटाले १२ हजार ९ सय ६१ मत प्राप्त गरेका छन्। उनी सत्ता गठबन्धनका साझा उम्मेदवार बनेका थिए।
शर्माको संसदीय यात्रा ०६३ मा गठित अन्तरिम व्यवस्थापिका संसद्को सदस्य भएसँगै सुरु भएको हो। उनी ०६४ र ०७०को संविधानसभा तथा ०७४को प्रतिनिधि सभामा सदस्य भएका थिए।
एकिकृत समाजवादी
रौतहट–१बाट एकीकृत समाजवादीका अध्यक्ष माधवकुमार नेपाल विजयी भएका छन्। नेपालले ३३ हजार ५ सय २२ मत ल्याएका छन्। उनका निकटतम् प्रतिस्पर्धी एमालेका अजय गुप्ताले २६ हजार ९ सय २२ मत प्राप्त गरेका छन्। उनी काठमाडौं–२, ०७० मा काठमाडौ–२ रौतहट र ०७४ मा काठमाडौं २ बाट निर्वाचित भएका थए।
डोटी–१ बाट प्रेमबहादुर आले विजयी भएका छन्। आलेले २७ हजार २ सय १० मत प्राप्त गर्दा उनका मुख्य प्रतिस्पर्धी एमालेका गौरी ओलीले २३ हजार ४ मत ल्याएका छन्।
आले सत्ता गठबन्धनका साझा उम्मेदवार बनेका थिए। आले ०७० को संविधान सभा निर्वाचनमा डोटी–२ बाट निर्वाचित भएका थिए।
त्यस्तै, ०७४ को प्रतिनिधि सभा निर्वाचनमा डोटीबाट निर्वाचित भएका थिए। उनले वन तथा वातावरण हुँदै संस्कृति, पर्यटन तथा नागरिक उड्डयन मन्त्रीको जिम्मेवारी पनि सम्हालिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
