काठमाडौं– आइतबार सम्पन्न प्रतिनिधि र प्रदेश सभा निर्वाचनको मतपरिणाम आउनेक्रम जारी छ। जारी मतगणनाको सुरुवाती मतपरिणाममा केही चर्चित र शीर्ष नेताहरू पछि परेका छन्।
नेकपा एमालेका वरिष्ठ उपाध्यक्ष ईश्वर पोखरेल काठमाडौं–५ मा नेपाली कांग्रेसका प्रदीप पौडेलसँगपछि परेका छन्। पौडेलले पोखरेलविरुद्ध सुरुवाती अग्रता लिएका छन्।
यस्तै, नेकपा एमालेका महासचिव शंकर पोख्रेल पनि वाम लोकतान्त्रिक गठबन्धनबाट नेकपा माओवादी केन्द्रकी रेखा शर्मासँग पछि परेका छन्। दाङ–२ मा महासचिव पोख्रेललाई माओवादीकी शर्माले सुरुवाती मतपरिणाममा पछि पारेकी हुन्।
यस्तै, जनता समाजवादी पार्टीका अध्यक्ष उपेन्द्र यादव पनि सप्तरी–२ मा जनमत पार्टीका अध्यक्ष सिके राउतसँग पछि परेका छन्। मतगणना अघि बढेसँगै राउतले लागातार यादवसँगको मतान्तर बढाउँदै लगेका छन्।
रूपन्देही–२ मा पनि राष्ट्रिय स्वतन्त्र पार्टीले सुरूवाती अग्रता लिएको छ। स्वतन्त्र पार्टीका गणेश पौडेलले एमाले उपाध्यक्ष बिष्णु पौडेललाई पछाडि पारेका छन्। तेस्रोमा राष्ट्रिय जनमुक्ति पार्टीका उम्मेदवार केशवबहादुर थापा (सूर्यवंशी) रहेका छन्। उनलाई सत्ता गठबन्धनको समर्थन छ।
झापा–३ मा राष्ट्रिय प्रजातन्त्र पार्टीका राजेन्द्र लिङ्देनले अग्रता कायम राखेका छन्। उनले नेपाली कांग्रेसका उम्मेदवार कृष्णप्रसाद सिटौलालाई पछि पारेका छन्।
यता काठमाडौं–१ को पछिल्लो मत परिणामअनुसार राष्ट्रिय प्रजातन्त्र पार्टीका रवीन्द्र मिश्र नेपाली कांग्रेसका प्रकाशमान सिंहलाई पछि पारेका छन्।
इलाम–२ को पछिल्लो मत अपडेट प्राप्त भएको छ। त्यहाँ कांग्रेसका डम्बर बहादुर खड्काले अग्रता लिएका छन्। एमालेका सुवास नेम्वाङ पछि परेका छन्। २०७४ को निर्वाचनमा यस क्षेत्रबाट नेम्वाङ विजयी भएका थिए।
रुपन्देही–१ मा स्वतन्त्र उम्मेदवार घनश्याम भुसाल सुरुवाती चरणमा तेस्रो स्थानमा छन्। रुपन्देही–१ मा जनमत पार्टी कैलाश गुरुङ पहिलो र एमालेका छविलाल विश्वकर्माले दोस्रो स्थानमा छन्।
ललितपुर–३ मा राष्ट्रिय स्वतन्त्र पार्टीकी डा. तोसिमा कार्कीले अग्रता बनाएकी छन्। नेकपा एमालेका उम्मेदवार अमृत खड्कालाई पछि पार्दै उनी अगाडि बढेकी हुन्।
सत्ता गठबन्धनका तर्फबाट उम्मेदवार बनेकी माओवादी केन्द्रकी पम्फा भुसाल तेस्रो स्थानमा छिन्।
काठमाडौं–७ मा सत्ता गठबन्धनकी उम्मेदवार मानुषी यमि भट्टराई तेस्रो स्थानमा छिन्। त्यहाँ एमालेका श्याम घिमिरे पहिलो स्थानमा छन् भने राष्ट्रिय स्वतन्त्र पार्टीका गणेश पराजुली दोस्रो स्थानमा छन्।
मकवानपुर–१ को पछिल्लो मत अपडेट प्राप्त भएको छ। त्यहाँ कांग्रेस उम्मेदवार डिना उपाध्यायले अग्रता लिएकी छन्। एमालेको चुनाव चिह्न सूर्य लिएर उठेका कमल थापाले उपाध्यायलाई पछ्याइरहेका छन्।
मोरङ–६ मा प्रतिनिधि सभातर्फ कांग्रेसका नेता डा. शेखर कोइरालाले सुरुआती अग्रता लिएका छन्। यस्तै नेकपा एमालेका लालबाबु पण्डितले कोइरालालाई पछ्याइरहेका छन्।
कास्की–२ मा राष्ट्रिय स्वतन्त्र पार्टीले अग्रता कायमै राखेको छ। स्वतन्त्र पार्टीका माधवप्रसाद कँडेललाई नेकपा एमालेकी विद्या भट्टराईले पछ्याइरहेकी छन्।
यता भक्तपुर–२ मा कांग्रेस उम्मेदवार दुर्लभ थापा क्षेत्रीले अग्रता लिएका छन्। उनले एमालेका महेश बस्नेतलाई पछि पारेका छन्।
उता चितवन–२मा राष्ट्रिय स्वतन्त्र पार्टीका उम्मेदवार रवि लामिछानेले पनि सुरुवाती मतगणनामा पछि परेका छन्।
उक्त क्षेत्रमा नेकपा एमालेका कृष्णभक्त पोखरेलले ६ सय ८४ मत ल्याएर अग्रता कायम गरेका छन्।
नेपाली कांग्रेसका उम्मेदवार उमेश श्रेष्ठले ४ सय ४९ मत ल्याएर दोस्रो स्थानमा छन् भने रविले १ सय १३ मत ल्याएर तेस्रो स्थानमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
