काठमाडौं– राष्ट्रिय मानवअधिकार आयोगले स्वतन्त्र र भयरहित वातावरणमा निर्वाचन सम्पन्न गर्नका लागि भूमिका निर्वाह गर्न सबैलाई आह्वान गरेको छ। मानवअधिकार आयोगले देशका विभिन्न ठाउँमा अनुगमन गरेपश्चात् निर्वाचनको पूर्वसन्ध्यामा निर्वाचनलाई निष्पक्ष, स्वतन्त्र र भयरहित वातावरणमा सम्पन्न गर्न आग्रह गरेको हो।
आयोगले शनिबार एक विज्ञप्ति जारी गर्दै आइतबार हुने निर्वाचनबारे उच्चस्तरीय अनुगमन टोलीसहित ३२ वटा टोलीले सातै प्रदेशका ६७ जिल्लामा मतदानपूर्वको मानवअधिकार अवस्थाको अनुगमन गरी प्रारम्भिक जानकारी लिएको जनाएको छ।
आयोगले गरेको प्रारम्भिक अनुगमनअनुसार बाँकेको नेपालगञ्ज र भोजपुरमा बम विष्फोट हुँदा ३ जना घाइते भएका, दार्चुलाको नौगाड गाउँपालिकामा सत्ता गठबन्धन र एमाले कार्यकर्ताबीच झडप हुँदा एकजना गम्भीर घाइते भएको, चितवनको भरतपुरमा स्वतन्त्र उम्मेदवार र कांग्रेसका उम्मेदवारको सवारी साधनमा आक्रमण गरिएको लगायतका घटनाहरू भएको विज्ञप्तिमा उल्लेख गरेको छ।
यस्तै, दाङ, प्युठान, रसुवा, नुवाकोट, रामेछाप, डोटी, काठमाडौं लगायतका ७२ जिल्लामा ठूला दलका उम्मेदवारले नै निर्वाचन गतिविधिमा आचारसंहिता विपरित बालबालिकालाई प्रयोग गरेको जनाइएको छ।
आयोगका प्रवक्ता डा टीकाराम पोखरलेका अनुसार दलहरूले बालबालिकालाई टिकटक बनाउन लगाउने, प्रचारप्रसारका क्रममा नाचगानमा प्रयोग गर्ने, विद्यालयमा प्रचार सामग्री टाँस्न लगाउने गरेको सूचना अनुगमनका क्रममा प्राप्त भएको जनाएका छन्।
आयोगले मतदाता नामावलीमा नाम नभएका कारण कारागारमा रहेका कयौंै कैदीबन्दी मतदानबाट बञ्चित रहने जनाएको छ ।
मानवअधिकार आयोगले निर्वाचनमा असहमति जनाएका समूहका कार्यकताले जाजरकोट, रुकुम, रोल्पा, सल्यान लगायतका जिल्लामा स्थानीय नागरिकलाई मतदान नगर्न दबाब दिँदै सभा तथा कार्यक्रम गरिरहेको अनुगमनबाट देखिएको विज्ञप्तिमा उल्लेख गरिएको छ।
निर्वाचन आचारसंहिता उलंघन गर्दै निर्वाचन प्रचारप्रसार र बालबालिकाको प्रयोग विषयलाई नियमन र नियन्त्रण गर्न निर्वाचन आयोगको भूमिकाको आयोगले प्रसंशा गरेको छ ।
आयोगले मतदाताको अधिकारको कदर गर्दै भयरहित वातावरणमा निर्वाचन सम्पन्न गर्न, राजनीतिक दल तथा तिनका भ्रातृ संगठन, सरकार, नागरिक समाज, पर्यवेक्षक, सञ्चारकर्मीलगायत सबै सर्वसाधारणको महत्वपूर्ण भूमिका रहने उल्लेख गर्दै निर्वाचन आचारसंहितामा ध्यान दिन आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1788274741.jpg)
-1786602170.png)
-1786513116.png)
