काठमाडौं– प्रधानमन्त्री शेरबहादुर देउवा बसेको डडेल्धुराको रातो गुराँस रिसोर्टमा कार्यकर्ताको भीड लागेपछि विवाद शुरु भएको छ। प्रतिनिधि सभाको निर्वाचन अघिको मौन (स्थिर) समयमा रिसोर्टमा कार्यकर्ताको भीड लागेपछि विपक्षी दलहरूले पैसा वितरण वा चलखेल भएको आरोप लगाएका छन्।
बिहीबार डडेल्धुरा पुगेका देउवा उक्त रिसोर्टमा बसेका थिए। शुक्रबार उक्त रिसोर्टमा एकाएक भीड लागेको देखिन्छ। उक्त रिसोर्टमा पुगेका पत्रकारहरूलाई भित्र प्रवेश दिइएको थिए। एक कार्यकर्ताले पत्रकारले बाहिर कार्यकर्ताको भिड लागेको फोटो र भिडियो खिच्न लागेपछि आफू प्रधानमन्त्रीलाई भेट्नमात्र आएको भनेका छन्। गाउँका समस्या देशको प्रधानमन्त्रीलाई भेट्न र कुरा राख्न आएको भन्दै गलत समाचार नहाल्न उनले चेतावनी दिएको देखिन्छ । उनले समाचार के कस्तो लेख्छन् आफूलाई थाहा भएको भनेका छन्।
के भन्छन् मुख्य निर्वाचन अधिकृत?
डडेल्धुरा निर्वाचन कार्यालयका मुख्य निर्वाचन अधिकृत बालकृष्ण वाग्लेले प्रधानमन्त्री देउवा बसेको होटलमा भीड जम्मा भएको स्वीकार गर्दै अहिले उक्त भीड हटाइएको बताए।
‘बेलुका ५ बजे मलाई पनि प्रधानमन्त्री देउवा बसेको होटलमा भीड लागेको जानकारी आएको थियो’, उनले भने, ‘प्रधानमन्त्री बसेको रिसोर्टमा ठूलो भीड लागेकाले यस्तो गर्न पाइन्छ कि पाइँदैन भनेर उजुरी आएपछि आफूले अनुगमन गर्न पठाएको र रिसोर्टको गेटमा बाहिर भीड देखिएपछि आवश्यक एक्सन लिएको छु।’ उनले तत्कालै प्रमुख जिल्ला अधिकारी र सुरक्षा निकायलाई यसबारेमा आफूले जानकारी गराएको र आफूलाई रिर्पोटिङ गर्न निर्देशन गरेको बताए।
प्रधानमन्त्रीलाई भेट्न पाइन्छ कि भनेर आएको भनेर कार्यकर्ताले भनेको जानकारी आफूले पाएको निर्वाचन अधिकृत वाग्लेले बताए। तत्कालै उक्त कुराको जानकारी प्रमुख जिल्ला अधिकारीलाई टेलिफोन सम्वाद गरेर रिर्पोटिङ छ कि छैन भनेर सोधेको पनि उनले जानकारी दिए।
‘मौन अवधिमा भेट्नै नपाउने भन्ने होइन। तर कार्यकर्तालाई प्रलोभन दिन पाइँदैन,’ उनले भने। प्रजिअले आफैँ टिम लिएर पठाएको जानकारी आफूले पाएको उनले बताए। ‘प्रहरीले सडक साँघुरो भएर भीड देखिएको र प्रधानमन्त्री आएकाले हेर्न आएको देखिएको दाबी गरिएको छ’, उनले स्पष्ट पारे।
प्रधानमन्त्रीले कसैलाई नबोलाएकाले उनीहरू किन आए जानकारी नभएको वाग्लेले बताए। पछि प्रहरीले सबै भीड हटाएको प्रहरीले आफूलाई पनि रिर्पोटिङ गरेको र पैसा वितरण भएको अहिलेसम्म कुनै उजुरी वा प्रमाण फेला नपरेको उनले दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
