काठमाडौं– निर्वाचन आयोगले बारा क्षेत्र नम्बर ४ मा प्रतिनिधि सभा सदस्यका लागि नेकपा (एकीकृत समाजवादी)का उम्मेदवार कृष्णकुमार श्रेष्ठ र सोही क्षेत्र ४ (२)का लागि प्रदेश सभा सदस्यका लागि लोकतान्त्रिक समाजवादी पार्टी (लोसपा)का उम्मेदवार जितेन्द्र सोनललाई स्पष्टीकरण सोधेको छ।
निर्वाचनको स्थिर अवधि शुरु भइसकेको अवस्थामा प्रचारप्रसार जारी राखेको भन्दै आयोगले शुक्रबार स्पष्टीकरण सोधेको हो।
दुवै जनालाई एकै व्यहोराको पत्र लेख्दै आयोगले भनेको छः तपाईंले निर्वाचन आचारसंहिताविपरीत हुनेगरी मौन अवधिमा घरदैलो गरेकोबारे अन्नपूर्ण पोष्ट डटकममा समाचार प्रकाशन भएकोप्रति आयोगको ध्यानाकर्षण भई यो पत्र लेखिएको छ। निर्वाचन आचारसंहिता, २०७९ को दफा १७ को उपदफा (१) को खण्ड (क) मा “निर्वाचन प्रचारप्रसार लगायत कुनै पनि प्रकारका छलफल, अन्तरक्रिया, सभा सम्मेलन, कार्यशाला गोष्ठी आदि गर्न नपाइने” व्यवस्था छ। आचारसंहिताको सोही दफाको उपदफा (१) को खण्ड (ग) मा “कुनै पनि विधि, प्रक्रिया वा माध्यमबाट मत माग्न र निर्वाचन प्रचारप्रसार गर्न नहुने” व्यवस्था छ।
‘उपरोक्त बमोजिम तपाईंहरूले निर्वाचन आचारसंहिता, २०७९ को दफा १७ को उपदफा (१) को खण्ड (क) र खण्ड (ग) को विपरित हुने कार्य गर्नुभएको होइन भन्ने आधार कारण के छ? तपाईंबाट निर्वाचन आचारसंहिता, २०७९ को दफा १७ को उपदफा (१) को खण्ड (क) र खण्ड (ग) को विपरित हुने कार्य भएको ठहर भएमा तपाईंलाई निर्वाचन आयोग ऐन, २०७३ को दफा २३ को उपदफा (३) र (४) बमोजिमको कारबाही नहुनुपर्ने कारण के छ? पत्र प्राप्त भएको समयले १२ घण्टाभित्र आयोगको इमेल ठेगाना वा जिल्ला निर्वाचन कार्यालय बारामा प्राप्त हुने गरी लिखित स्पष्टीकरण पेश गर्न भनिएको छ,’ स्पष्टीकरणमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
