ईफाप्काको ४५ औँ सम्मेलन माल्दिभ्समा सुरु

अर्थ समाचार

नेपाल लाइभ बिहीबार, मंसिर १, २०७९ २१:०८

काठमाडौं– एशियाली तथा पश्चिम प्रशान्त क्षेत्रका निर्माण सङ्गठनको छाता सङ्गठन (ईफाप्का) को ४५ औँ सम्मेलन माल्दिभ्सको राजधानी मालेमा सुरु भएको छ।

‘संरक्षण सहित निर्माण—अझ सम्मुन्नत विश्व निर्माण गरौँ’ भन्ने नारासहित सुरु भएको सम्मेलनमा ईफाप्कामा आबद्ध १९ मुलुकका निर्माण व्यवसायीको सहभागिता छ। सम्मेलनलाई नेपाली प्रतिनिमिण्डलको तर्फबाट सम्बोधन गर्दै नेपाल निर्माण व्यवसायी महासङ्घका अध्यक्ष रवि सिंहले गोर्खा भूकम्प र कोभिड—१९ का कारण जोखिममा परेको नेपाली निर्माण उद्योगले विस्तारै गति लिइरहेको जानकारी दिए।

नेपालमा नौ सय मेगावाटको अरुण दोस्रो र माथिल्लो कर्णालीजस्ता जलविद्युत् परियोजना, दुई हजार ६८० मिटर लामो सुरुङ मार्गजस्ता महत्वपूर्ण परियोजना निर्माणाधीन अवस्थामा रहेको उनले जानकारी दिए। नेपालले सन् २०३० सम्ममा मध्यम आय भएको राष्ट्रको रूपमा स्तरोन्नति भई दिगो विकास लक्ष्य हासिल गर्ने प्रतिबद्धता अध्यक्ष सिंहले जनाए।

मौसम परिवर्तनको असर सामना गर्ने नेपाल पनि एक प्रमुख राष्ट्र भएको प्रसङ्ग उल्लेख गर्दै उनले हरित पूर्वाधारको विकासलाई नेपालले प्राथमिकता दिएको जानकारी गराए। पूर्वाधार विकासमार्फत आर्थिक विकास प्रक्रियाप्रति नेपालका राजनीतिक दलको बलियो प्रतिबद्धता रहेको र सोहीअनुसार ऐन नियम तर्जुमा भइरहेको उनको भनाइ थियो।

रुस—युक्रेन युद्धबाहेक जग्गा प्राप्तिमा हुने झमेला, ‘साइट क्लियरेन्स’को समस्या, निर्माण सामग्रीको अभाव, मूल्यवृद्धि, दक्ष तथा प्राविधिक जनशक्तिको अभावलगायतका आन्तरिक समस्या नेपाली निर्माण उद्योगले सामना गर्नुपरिरहेको उनले अवगत गराए।

नेपालमा हाल १७ हजारभन्दा बढी निर्माण कम्पनी दर्ता भइसकेको र १५ लाखभन्दा बढी यस उद्योगमा आबद्ध रहेको तथ्याङ्क उनले प्रस्तुत गरे। ४६ औँ ईफाप्का सम्मेलन डेढ वर्षभित्रमा दिगो पूर्वाधारमा साझेदारी भन्ने नाराका साथ काठमाडौंमा आयोजना हुने जानकारी पनि उनले गराए। ४५ औँ सम्मेलनको समाप्तिसँगै महासङ्घका अध्यक्ष सिंह नै ईफाप्काको अध्यक्षसमेत हुनेछन्।

ईफाप्का महासचिवको जिम्मेवारी भने महासङ्घका सल्लाहकार वीरेन्द्र पाण्डेले सम्हाल्नेछन्। सन् १९५६ मा स्थापना भएको ईफाप्कामा हाल नेपालको तर्फबाट देशभरका निर्माण व्यवसायीको छाता सङ्गठन महासङ्घ आबद्ध रहेको छ। नेपालले सन् १९९३ मा ईफाप्काको सदस्यता लिएको हो। ईफाप्काको ३० औँ सम्मेलन पनि सन् १९९९ मा नेपालमा भएको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

वीरगञ्ज नाकाबाट ७ महिनामा भित्रियो एक खर्ब ४ अर्बको पेट्रोलियम पदार्थ

इन्स्पेक्टर सन्तोषी मृत्यु प्रकरण : इन्स्पेक्टर जोशी पक्राउ

काठमाडौंबाट रामेछाप भएर ओखलढुंगा जाँदै गरेको बस धुलिखेलमा दुर्घटना