ओनसरीलाई ९३ वर्षका बृद्धले आशिर्वाद दिँदै भने– जितेपछि फेरि आउनु है

राजनीति

नेपाल लाइभ बुधबार, कात्तिक ३०, २०७९ ०९:०१

काठमाडौं– पूर्वसभामुख एवं माओवादी स्थायी समिति सदस्य ओनसरी घर्तीलाई ९३ वर्षीय बृद्धले जितको शुभकामना दिँदै माला लगाइदिएका छन्।

काठमाडौं–२ बाट सत्ता गठबन्धनकी साझा उम्मेदवार घर्तीलाई चुनावी घरदैलोका क्रममा शंकरापुर नगरपालिका–१ नाङ्लेभारे चापाबोटका ९३ वर्षीय देवदत्त दंगालले आशिर्वाद दिएका हुन्।

ओनसरी गठबन्धनका तर्फबाट काठमाडौं–२ (ख) उम्मेदवार एकीकृत समाजवादीका नेता भरतप्रसाद फुयाँलसहित चुनावी घरदैलोका क्रममा काठमाडौंको विकट नाङ्लेभारे पुगेकी थिइन्।

ओनसरी घरदैलोमा आएको सुनेपछि दंगाल आफैं फूलको माला बोकेर सडकमा उभिएका थिए। आफ्नो स्वागतमा बृद्ध उभिएको देखेपछि घर्तीले परैबाट गाडी साइड गर्न चालकलाई भनिन्।

गाडीबाट ओर्लिएर नमस्कार गर्दै उनी दंगाल भएतिर गइन्। दंगाल दम्पतिले सयपत्री फूलको माला लगाएर घर्तीलाई जितको शुभकामना दिए। ‘यो ठाउँको विकासका लागि तिमिले जित्नुपर्छ नानी, मलाई विश्वास छ तिमिले जित्छौ। छरछिमेक सबैतिर मैले तिमिलाई भोट दिनुपर्छ भनेको छु’, दंगालले भने।

काठमाडौं भए पनि बत्तीमुनिको अँध्यारो सरह आफ्नो ठाउँ पछि परेकोमा उनले दुखेसो पोखे। आफूहरुको पुस्ताले धेरै सास्ती खेप्नु परे पनि नाती/पनाती पुस्ताका लागि विकास गरिदिएको हेर्ने इच्छा रहेको दंगालले बताए।

४६ वर्षीया ओनसरीले आफ्ना बाबुभन्दा पाका उमेरका बृद्धको स्वागत र आशिर्वादबाट खुसी हुँदै आफ्नो गलामा लगाएको माला दंगाललाई लगाइदिइन् र आशिर्वाद लागोस् भनिन्।

उनले आफूले चुनाव जितेपछि काठमाडौं–२ को विकासबाहेक अरु कुरामा ध्यान नदिने भन्दै आश्वस्त पार्न खोजिन्। ‘विकासकै लागि यहाँ आएकी हुँ। हामीले यो क्षेत्रको विकासका लागि धेरै योजना बनाएका छौं, मौका पाएँ भने काम गरेर देखाउँछु।’ ओनसरी गाडी चढ्नै लाग्दा बृद्धले भने, ‘जितेपछि फेरि आउनू है।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

आजका लागि यस्तो छ विदेशी मुद्राको विनिमय दर

ट्रम्पको आश्वासनपछि अमेरिकामा चल्न थाल्यो टिकटक

आजको मौसम: तराईमा हुस्सु, कर्णालीका केही ठाउँमा हिमपातको सम्भावना