काठमाडौं– विसं २०७४ सालको प्रतिनिधिसभा सदस्यको निर्वाचनमा कैलाली-१ मा तत्कालीन राष्ट्रिय जनता पार्टीका तर्फबाट रेशम चौधरी निर्वाचित भए। त्यतिबेला चौधरी अदालतको फरार सूचीमा थिए। ्
३२ हजार ३ सय ४१ मत ल्याएर विजयी बनेका चौधरीले वामगठबन्धनकी साझा उम्मेदवार समेत रहेकी निकटतम प्रतिद्वन्दी एमालेकी मदन कुमारी शाहलाई २० हजार ९ सय ३५ मतान्तरले पछि पारेका थिए।
१४ फागुन २०७४ मा जिल्ला अदालत कैलालीले कर्तव्य ज्यान मुद्दामा थुनामा राख्ने आदेश दिएपछि चौधरीलाई जेल चलान गरियो।
चुनाव जितेको १३ महिनापछि सांसद चौधरीले पद तथा गोपनीयताको शपथ ग्रहण गरे। तत्कालीन सभामुख कृष्णबहादुर महराले उनलाई १९ पुस २०७५मा सिंहदरबारमा शपथ खुवाए। डिल्लीबजारस्थित सदर खोरमा जेल जीवन बिताइरहेका चौधरीलाई सिंहदरबार झिकाएर शपथ खुवाइएको थियो। सांसदको लोगोसहित चौधरीलाई पुनः कारागार पठाइएको थियो।
आजीवन कारावासको फैसला सुनापश्चात् चौधरी हाल जेलजिवन बिताइराखेका छन्। यद्यपि विरासत जोगाउन र थरुहट आन्दोलनको एजेण्डा स्थापित गर्न चौधरीको संघर्ष जेलभित्रबाट पनि जारी छ।
१९ पुस २०७८ मा चौधरीको श्रीमती रञ्जिता श्रेष्ठको अध्यक्षतामा नागरिक उन्मुक्ति पार्टी स्थापना भयो। उनै रञ्जिता आगामी ४ मंसिरमा हुने प्रतिनिधिसभाको निर्वाचनमा कैलाली-१मा उम्मेदवार बनेकी छन्। ‘रेशमजी जेलमा हुनुहुन्छ। उहाँको विरासत जोगाउन र थारुहटको आन्दोलनको एजेण्डा स्थापित गर्ने जिम्मेवारी मेरो काँधमा आइपर्यो । त्यसकारण म चुनावमा उम्मेदवार उठेँ,' रञ्जिता भन्छिन्।
टीकापुर नगरपालिकाका पूर्वमेयर नेकपा एमालेका उम्मेदवार तपेन्द्रबहादुर रावल र पूर्वमन्त्रीसमेत रहेका नेपाली कांग्रेसका उम्मेदवार रामजनम चौँधरीसँग रञ्जिताको रोचक प्रतिष्पर्धा देखिनेछ। निर्वाचन आयोगको विवरण अनुसार यो क्षेत्रमा ११ जना उम्मेदवार चुनावी प्रतिस्पर्धामा छन्।
रञ्जिता पहिलो पटक चुनावी मैदानमा उत्रँदैछिन्। रञ्जिताको लागि यो चुनाव ठूलो चुनौती पनि हो। यद्यपि स्थानीय तहको निर्वाचन र जनताको विश्वासका कारण आफू विजयी हुने दाबी रञ्जिताको छ। तर नेकपा एमालेका उम्मेदवार र गठबन्धका साझा उम्मेदवारसँग प्रतिष्पर्धा गर्नुपरेकाले रञ्जिता आफूले निकै मिहिनेत गर्नुपरेको बताउँछिन्।
'टीकापुर घटना आपराधिक हैन'
रञ्जिता घरदैलो कार्यक्रममा जनताहरू उत्साहित भइरहेको र आफूले माझ सकारात्मक प्रतिक्रिया पाइरहेको बताउँछिन्। 'पाँच वर्ष यहाँका जनता प्रतिनिधिविहीन भए। म रेशमजीको ठाउँमा अभिभावक बन्न आएँ,' उनी भन्छिन्।
यतिबेला उनको पहिलो एजेण्डा टीकापुर घटनालाई राजनीतिक घटनाका रुपम स्थापित गराउनु छ।
७ भदौ २०७४ मा थरुहट आन्दोलनको क्रममा एसएसपी लक्ष्मण न्यौपाने सहित ६ सुरक्षाकर्मी र १ बालक मारिएका थिए। उक्त घटनाका मुख्य अभियुक्त भनिएका रेशम चौधरीले जेल जीवन बिताइरहेका छन्। यो घटनालाई आपराधिक नभएर राजनीतिक घटनाका रुपमा स्थापित गराउने एजेण्डा नागरिक उन्मुक्त पार्टीको छ।
उनले दलको प्रमुख एजेण्डाहरू सुशासन, समृद्ध र पहिचान रहेको बताएकी छन्। यस क्षेत्रको विकासमा लागि मुख्यत: शिक्षा, स्वास्थ्य, कृषि, खेलकुद, सडक, विपद् व्यवस्थापन, संस्कृति र पर्यटन प्रमुख रहने उनको दाबी छ।
उनी दिगो विकासका लागि आफूले पहल गर्ने बताउँछिन्। ‘यसले आर्थिक वृद्धि, सामाजिक न्याय प्राप्त गर्न, वातावरणीय व्यवस्थापनको अभ्यास र सुशासनलाई सुदृढ गर्ने ढाँचा प्रदान गर्छ,’ उनी भन्छिन्।
सञ्चारकर्मीबाट राजनीतिकर्मीको यात्रा
टीकापुर घटना हुनुअघि रञ्जिता सञ्चारकर्मी थिइन्। टीकापुरमा फुलबारी एफएम यसैको संस्करण भुरी गाउँ र वर्दियामा थियो। त्यहाँ तीन वटा एफएम सञ्चालनमा थिए। रेशम थरुहट आन्दोलनमा होमिएका बेला रञ्जिता एफएममा व्यस्त थिइन्। उनलाई राजनीतिमा आउने खास रुचि थिएन।
यदि रेशम चौधरी जेल हुन्थेनन् भने रञ्जिता सायदै सक्रिय हुन्थिन् राजनीतिमा। ७ फागुन २०३९ मा काठमाडौंको क्षेत्रपार्टीमा जन्मिएकी रञ्जिताको पृष्ठभूमि पनि राजनीतिक हैन। २९ भदौ २०५५ मा बालदिवसको दिन पहिलो पटक उनको रेशमसँग भेट भयो। भेटको दुई महिनापछि उनीहरूले विवाह गरे।
रञ्जिताको काँधमा अहिले पार्टीको नेतृत्व पनि छ। नागरिक उन्मुक्ति पार्टी घोषणाको ९९ दिनपछि भएको स्थानीय तहको चुनावमा उनको पार्टीले कैलालीका ४ वटा पालिका जित्न सफल भयो। त्यसकारण उनी जनताले आफू र पार्टीलाई विश्वास गरेको ठान्छिन्।
संसद पुगे टीकापुर घटनाको प्रतिवेदन सार्वजनिक गर्न माग
उनी संसदमा पुगेपछि टीकापुर घटनाको प्रतिवेदन सार्वजनिक गर्न दबाब दिने बताउँछिन्। ‘आयोगका प्रतिवेदनमा पनि अहिलेसम्म सार्वजनिक गरिएको छैन। हाम्रो दलले सार्वजनिक गराउन दबाब दिनेछ,' उनी भन्छिन्।
यो क्षेत्रमा टीकापुर नगरपालिका, जोशीपुर नगरपालिका, जानकी गाउँपालिकाका वडा १, ३, ४, ६ र ७ र भजनी नगरपालिकाको वडा ६ र ८ छन्। यहाँका चारै पालिकामा नागरिक उन्मुक्ति पार्टिले स्थानीय तहमा जित हासिल गरेको छ।
स्थानीय तहका निर्वाचनमा वडाध्यक्षले पाएको मत केलाँउदा मात्र पनि नागरिक उन्मुक्ति पार्टी सबैभन्दा अगाडि छ।
कांग्रेस र माओवादीको मत जोड्दा भने गठबन्धन थोरै मतले अगाडि देखिन्छ।
यो क्षेत्रमा वडाध्यक्षमा नागरिक उन्मुक्तिले १७ हजार १ सय ९३ मत पाएको थियो । कांग्रेसले ११ हजार ६ सय ४२, एमालेले १० हजार ३ सय ३२, माओवादीले ६ हजार ९ सय ५७, राप्रपाले ४ हजार ६, जनता समाजवादी पार्टीले २ हजार ३ सय २ र एकीकृत समाजवादीले २ हजार २ सय ३२ मत पाएका थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751372795.jpg)
-1751267101.jpg)
-1751273553.jpg)
-1749826086.png)
