काठमाडौं– राष्ट्रिय प्रजातन्त्र पार्टी (राप्रपा)का समानुपातिक तर्फका उम्मेदवार उद्धब पौडेलले आसन्न निर्वाचनमा आफ्नो पार्टीले प्रतिनिधि सभाको प्रत्यक्षतर्फ नै २० सिटभन्दा बढी सिट जित्ने दाबी गरेका छन्।
राप्रपाको कार्यसम्पादन समितिका सदस्यसमेत रहेका पौडेलले सोमबार एक विज्ञप्ति जारी गर्दै राप्रपाले यो निर्वाचनमा चमत्कारिक परिणाम निकाल्ने दाबी गरेका छन्।
‘राप्रपाले यसपटक प्रत्यक्षमा २० भन्दा बढी सिट जित्छ। काठमाडौं उपत्यकामै पनि पहिलोपटक जित निकाल्दैछ, समानुपातिकमा राप्रपा पहिलो दल बन्छ। आगामी संसद्मा राप्रपा निर्णायक र हस्तक्षेपकारी शक्तिको रुपमा आउनेछ’, उनले भनेका छन्।
पौडेलले इतिहासको सम्मान, धर्म, संस्कृति, परम्पराको संरक्षणको आवाज उठाउने एकमात्र पार्टी राप्रपा भएकाले जनताले राप्रपाको अजेन्डा मन पराएको दाबी गरेका छन्।
चलचित्रकर्मीसमेत रहेका पौडेलले विराटनगरको उपप्रधानपञ्चबाट राजनीति सुरु गरेका थिए।
विज्ञप्तिको पूर्णपाठ:
आदरणीय पत्रकार साथीहरू,
हामी प्रतिनिधिसभा र प्रदेशसभाको निर्वाचनको संघारमा छौं, राप्रपाले प्रतिनिधिसभाको १४२ र प्रदेशसभाको २८६ निर्वाचन क्षेत्रमा उमेदवारी दिएको छ। हामी उच्च मनोबलका साथ निर्वाचनमा होमिएका छौं । म स्वयं पनि प्रतिनिधिसभा तर्फ समानुपातिक उमेदवार छु, पत्रकार साथीहरूबाट सदा झैं माया, स्नेह र हौसलाको अपेक्षा राखेको छु ।
१. म विराटनगरमा जन्मिएँ, हुर्किएँ, किशोरावस्था विराटनगरमा बिताएँ । जीवनमा केही गर्नुपर्छ भन्ने हुटहुटीले मलाई राजधानी काठमाडौं पु¥यायो । चलचित्र क्षेत्रमा चार दशक निरन्तर क्रियाशील भएँ, नेपाली चलचित्र क्षेत्रको विकास, रोजगारी सिर्जना र देशको राष्ट्रिय कोषमा न्युन भएपनि योगदान दिन सकेकोमा मलाई सन्तोष र गर्वको अनुभूति हुन्छ । विगत एक दशकदेखि निरन्तर राजनीतिक क्षेत्रमा सक्रिय छु। विराटनगरको उप प्रधानपञ्चबाट शुरु भएको मेरो राजनीतिक करियर चलचित्र क्षेत्रबाट अवकाश लिएपछि पुनः शुरु गरेको हुँ । मलाई विराटनगरले जन्म मात्रै दिएन, मेरो परिचय दिलायो, विराटनगरले मलाई लगाएको गुन र ऋण तिर्न बाँकी छ त्यसैले विराटनगरबाट नवीन अध्याय शुरु गर्दैछु । समृद्ध विराटनगर मेरो सपना मात्रै होइन संकल्प पनि हो ।
२. यथास्थितिबाट देश अघि बढ्न सक्दैन । क्रान्ति, परिवर्तन र आन्दोलनका नाममा हामीले धेरै वर्ष खेर फाल्यौं । तीस, चालिस वर्षअघि हामी सरह रहेका देशहरू अहिले विकास र आर्थिक दृष्टिकोणबाट धेरै अगाडि गइसके । हामी अझै पनि गरिबी, पछौटेपन, रोग, भोक, अशिक्षाको न्युनतम मापदण्डको सेरोफेरोमा छौं । यस्तो किन भयो ? के नेपालमा विकास, समृद्धि सम्भव छैन ? राप्रपाले बदल्न सम्भव छ भन्ने जागरणका साथ यो निर्वाचनलाई एउटा अवसरको रुपमा लिएको छ र आम मतदातालाई परिवर्तनको पक्षमा मतदान गर्न आव्हान गर्दछ ।
३. राप्रपाले यो निर्वाचनमा चमत्कारिक परिणाम निकाल्दैछ । सबै अनुमान र सतही सर्वेक्षण गलत सावित हुनेछन् । पुराना शक्तिहरुमाथि मतदाताको भरोसा टुटेको र नयाँ समुहसंग विश्वास पैदा नभइसकेको अवस्थामा यो निर्वाचन हुन गइरहेको छ । मतदाताको निर्विकल्प छनौट राप्रपा हो, राप्रपाले शासकीय स्वरुप, शिक्षा, स्वास्थ्य, न्याय, रोजगारी सिर्जना, पूर्वाधार निर्माण, विकास, समृद्धि जस्ता विषयमा जनता सामु भरपर्दो विकल्प अगाडि सारेको छ । इतिहासको सम्मान, धर्म, संस्कृति, परम्पराको संरक्षणको आवाज उठाउने एकमात्र पार्टी राप्रपा हो, जनताले राप्रपाको एजेन्डा मन पराएका छन् ।
राप्रपाले यसपटक प्रत्यक्षमा बीस भन्दा बढी सिट जित्छ, काठमाडौं उपत्यकामै पनि पहिलोपटक जित निकाल्दैछ, समानुपातिकमा राप्रपा पहिलो दल बन्छ । आगामी संसदमा राप्रपा निर्णायक र हस्तक्षेपकारी शक्तिको रुपमा आउनेछ ।
४. हामीले घोषणापत्र मै लेखेका छौं– राप्रपा सत्ता केन्द्रीत होइन आफ्नो मुद्दा केन्द्रीत हुनेछ । तर सरकारको नेतृत्व गर्ने अवसर आयो भने जनादेशको सम्मान गर्दै राप्रपा सरकारमा जान्छ र नेतृत्व गर्छ । हाम्रो पार्टीका अध्यक्ष राजेन्द्र लिङ्देन पार्टीको आन्तरिक प्रतिस्पर्धामा समेत नेतृत्व परिवर्तन र पुस्तान्तरणको एजेन्डा सहित अध्यक्ष निर्वाचित भएर आउनुभएको छ । ठूला भनिने दल र नेताहरूको गलत नीति, गलत शैली, अकर्मण्यताका कारण आम युवा वर्गमा राजनीतिप्रति वितृष्णा जागिरहेको बेला राप्रपामा नेतृत्व परिवर्तन भएपछि आशा पलाएको मात्रै छैन युवाहरु राजनीतिमा समाहित हुने लहर चलेको छ । स्थानीय तहको निर्वाचन र अहिलेको निर्वाचनमा युवा उमेदवारीको आकर्षण राजेन्द्र लिङ्देनले राप्रपाभित्र नेतृत्व परिवर्तनका लागि गरेको संघर्ष र सफलताबाट सिर्जना भएको हो र यो निर्वाचनबाट सिङ्गो देशले नै नेतृत्व परिवर्तन चाहिरहेको अवस्था छ । आम जनसमुदायले राजेन्द्र लिङ्देनको नेतृत्व देख्न चाहिरहेका छन् । स्वभाविक रुपले राप्रपाले देशको नेतृत्व गर्ने अवस्था आउँदा अध्यक्षले नेतृत्व गर्ने हो, पार्टीले राजेन्द्र लिङ्देनलाई प्रधानमन्त्रीको रुपमा अघि बढाउँछ । अबको प्रधानमन्त्री राजेन्द्र लिङ्देन हुन् ।
५. देशको मुहार बदल्न मतलाई मनसंग जोडौं । राप्रपाको हलो चिन्हमा मतदान गरी विराटनगरको सेवा गर्ने अवसर प्रदान गर्नुहुन हार्दिक अपिल गर्दछु ।
उद्धब पौडेल
राप्रपा नेता, कार्यसम्पादन समितिका सदस्य
प्रतिनिधि सभातर्फको समानुपातिक उमेदवार, राप्रपा ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750758352.png)
-1750673602.png)
-1749826086.png)
