काठमाडौं– नेकपा (एमाले) वरिष्ठ उपाध्यक्ष ईश्वर पोखरेललाई भोट माग्दै चर्चित अभिनेत्री करिश्मा मानन्धर र चलचित्र निर्देशक तथा निर्माता आकाश अधिकारी पनि घरदैलोमा सहभागी भएका छन्।
करिश्मा र आकाशले काठमाडौं क्षेत्र नम्बर ५ बाट प्रतिनिधिसभा सदस्य उम्मेदवार रहेका पोखरेलको चुनावी अभियानमा साथ दिएका हुन्। उनीहरु आइतबार बिहान काठमाडौं महानगरपालिका वडा नम्बर ३ बसुन्धारामा पोखरेलको घरदैलोमा सहभागी भएका थिए।
आफू पनि काठमाडौं क्षेत्र नम्बर ५ को स्थायी बासिन्दा भएको बताउँदै अभिनेत्री करिश्माले पोखरेलले यस क्षेत्रको विकासका लागि धेरै काम गरेको र जनताको माझमा भिजेको बताइन्। काठमाडौं क्षेत्र नम्बर ५ मा पोखरेलको विकल्प नभएको उनको भनाइ थियो।
देश विकासको लक्ष्य लिएर अगाडि बढेको एकमात्र पार्टी एमाले रहेको भन्दै करिश्माले एमालेले जिते मात्रै देशले काँचुली फेर्न सम्भव रहेको प्रतिक्रिया दिइन्।
‘नेपाली जनताले विकास के हो भन्ने कुरा राम्रो अनुभुति गर्न नपाएको बेलामा केपी शर्मा ओलीको नेतृत्वमा एमालेले जनतामा विकासको अनुभुति गराउन सफल भयो। त्यसैले यो पटकको भोट एमालेलाई’, उनले भनिन्।
घरदैलोका क्रममा वडा नम्बर ३ का जनताले एमाले वरिष्ठ उपाध्यक्ष पोखरेललाई स्वागत गर्दै जितको शुभकामना दिएका थिए। जनताको सद्भाव र विश्वासप्रति आफू नतमस्तक रहेको भन्दै पोखरेलले सदैव जनताको सुख दुख र विकासमा आफू सधैँ साथमा रहने प्रतिबद्धता व्यक्त गरे।
काठमाडौं क्षेत्र नम्बर ५ को प्रतिनिधि सभामा एमालेबाट पोखरेल तथा प्रदेशसभा ५ (१) मा नारायण सिलवाल र ५ (२) मा दीपक निरौला उम्मेदवार छन्।
पोखरेलको प्रतिस्पर्धीमा सत्ता गठबन्धनको तर्फबाट कांग्रेसका युवा नेता प्रदीप पौडेल छन्।
यता, अभिनेत्री करिश्मा भने गत वर्षको चैतमा एमालेमा प्रवेश गरेकी थिइन्। तर, चुनावमा टिकट नपाएपछि उनले असन्तुष्टि व्यक्त गरेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750673602.png)
-1749826086.png)
