ओली व्यवस्था मास्न राजावादी र विखण्डनकारी बोकेर हिँडेका छन् : पुन

राजनीति

नेपाल लाइभ शनिबार, कात्तिक २६, २०७९ १०:४३

रोल्पा– नेकपा माओवादी केन्द्रका उपमहासचिव वर्षमान पुन अनन्तले केपी ओली अझै संविधान, लोकतन्त्र र व्यवस्था मास्ने अभियानमा सक्रिय रहेको बताएका छन्।

ओलीले राजावादी र विखण्डनकारीहरुको अपवित्र गठबन्धन बोकेर चुनावमा भोट माग्दै हिFडेको आरोप पुनले लगाए। आफूहरुले विगतमा ओलीबारे गर्दै आएको टिप्पणी उनको चुनावी गठबन्धनमा रहेका दल र व्यक्तिहरुका अनुहार र चरित्रबाट प्रष्ट भएको पुनको भनाइ थियो।

‘आज फेरि प्रतिगामी सोच राख्नेहरु, संविधानमाथि पटक–पटक प्रहार गर्नेहरु चुनावी गठबन्धनका नाममा जुर्मुराईरहेका छन्। लोकतान्त्रिक वाम गठबन्धनविरुद्ध अपवित्र खालको गठबन्धन बनेको छ’, गृहजिल्ला रोल्पाको सुलैचौधरमा लोकतान्त्रिक वाम गठबन्धनको चुनावी कार्यक्रमलाई सम्बोधन गर्दै पुनले भने, ‘पटक–पटक संविधान च्यात्नेहरु, प्रतिगमनको प्रयास गर्ने, लोकतन्त्रमाथि चुनौती खडा गर्नेहरु, हिजोका राजावादीहरु, मधेशलाई अलग राज्य बनाउन चाहनेहरु, विभिन्न खाले विखण्डनवादी र साम्प्रदायिक सोच राख्ने शक्ति तथा व्यक्तिहरुको प्रतिगामी मोर्चा जनताविरुद्ध खडा गरिएको छ। हामी मंसिर ४ मा यसलाई परास्त गर्नैछौं।’

पुनले केपी ओलीले जनताले स्थायित्व र विकासका लागि ०७४ को निर्वाचनमा दिएको जनमतमाथि अपमान गर्दै दुईपटकसम्म प्रतिनिधिसभा विघटन गरेपछि त्यसको प्रतिवादका लागि गठवन्धन निर्माण गरेको बताए। राज्यका सबै संयन्त्र आफ्नो नियन्त्रणमा लिने तथा संविधान र व्यवस्थामाथि हमला गरेर ओलीले निर्वाचित तानाशाह बन्न खोजेपछि उनलाई रोक्न गठबन्धन निर्माण गरिएको चर्चा पुनले गरे।

उनले पछि परेका जनसमुदायलई राज्यको मुलप्रवपाहमा ल्याउने, कानुनका नजरमा कोही पनि नागरिक उचनिच नहुने व्यवस्था गणतन्त्रका कारण भएको उल्लेख गरे। सबैले बराबर अधिकारसहित बाँच्न पाउने व्यवस्थाविरुद्ध लागेकाहरुलाई मत नदिन पुनले मतदातालाई अपिल गरे।

पुनले दुई छिमेकी भारत र चीन तथा पश्चिमा मित्र राष्ट्र तथा विकास साझेदार मुलुकहरुसँग समानताका आधारमा मैत्रीपूर्ण सम्बन्ध स्थापित गर्ने गठबन्धनको साझा नीति रहेको चर्चा पनि गरे।

‘हामी कहिले उत्तरतिर, कहिले दक्षिणतिर, कहिले पश्चिमतिर ढल्किने गरेको बिरासतबाट माथि उठेर सन्तुलित र स्वतन्त्र परराष्ट्र नीति अपनाउने छौं। कुनै कोही पनि सैन्य गठबन्धनमा बस्ने छैनौं। तर, विकास, व्यापार र अवसरका लागि सबै मित्रहरुसँग सहयोग लिनेछौं। यसमा हामी गठबन्धनमा भएका दलहरुका बीचमा समानता छ’, उनले भने।

पुनले चुनाव आउन १० दिन बाँकी छँदा गठबन्धनका पक्षमा देशभर उभार आएकाले दुई तिहाई बहुमत गठबन्धनले प्राप्त गर्ने आधार देखिएको दाबी गरे।

संघीय सरकार र सातै प्रदेश सरकार गठबन्धनको हुने भन्दै उनले कम्तिमा पाँच वर्ष राजनीतिक स्थायित्व, सुशासन र समृद्धिका लागि गठबन्धनले काम गर्ने प्रतिबद्धता जनाए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

एकीकृत समाजवादी ३२ लाख रुपैयाँ घाटामा,के के छन् मुख्य आम्दानीको स्रोत ?

संसदको हिउँदे अधिवेशन माघ १८ देखि बोलाउने तयारी

कोलम्बियामा सशस्त्र झडपमा परी चार दिनमा ८० जनाको मृत्यु, हजारौँ विस्थापित