गठबन्धनभित्र देखिएका समस्या समाधान गर्न पहल गर्ने सत्ता गठवन्धनको सचिवालयको निर्णय

राजनीति

नेपाल लाइभ बिहीबार, कात्तिक २४, २०७९ १८:१३

काठमाडौं– सत्ता गठबन्धनको निर्वाचन परिचालन समितिको सचिवालयले निर्वाचनका क्रममा देखिएका समस्या समाधान गर्न पहल गर्ने निर्णय गरेको छ।

बिहीबार नेपाली कांग्रेसको केन्द्रीय कार्यालय, सानेपामा बिहीबार बसेको बैठकले यस्तो निर्णय गरेको हो।

कांग्रेससहित नेकपा (माओवादी केन्द्र), नेकपा (एकीकृत समाजवादी), लोकतान्त्रिक समाजवादी पार्टी र राष्ट्रिय जनमोर्चाका निर्वाचन परिचालन समितिमा आवद्ध नेताहरूको संयुक्त बैठक बसेर निर्वाचन परिचालनमा देखिएको समस्या समाधान गर्न पहल गर्ने निर्णय गरेको हो।

केन्द्रीय सदस्य तथा कांग्रेसको निर्वाचन परिचालन सचिवालय समिति संयोजक अम्बिका बस्नेतको अध्यक्षतामा बसेको बैठकले चुनावी अभियानमा देखिएका समस्या समाधान गर्दै जाने विषयमा छलफल गरेको छ।

बैठकबारे जानकारी दिँदै नेपाली कांग्रेसका नेतासमेत रहेका निर्वाचन परिचालन सचिवालय समितिका सह–संयोजक दिव्यमणि राजभण्डारीले गठबन्धनका समस्या समाधान गर्दै धेरै भोट प्राप्त गर्नेगरी चुनावी अभियानमा जाने विषयमा छलफल भएको बताए।

उनले स्थानीयदेखि केन्द्रीय स्तरसम्मका पार्टी सदस्यहरूलाई चुनावमा परिचालन गर्ने सम्बन्धमा सहमति भएको उल्लेख गरे। ‘गठबन्धनमा केही समस्या देखिए भने ती समस्यालाई निराकरण गर्दै जाने र राम्रो भोट ल्याउन समझदारीमा चुनावमा जानका लागि छलफल भयो’, उनले भने, ‘एकआपसमा सहकार्य गर्ने विषयमा छलफल भयो। नियमित छलफल गर्ने र समस्या निराकरण गर्ने र अगाडि बढ्ने प्रतिवद्धता भयो। टोल, वडादेखि राष्ट्रिय स्तरसम्म सबै साथीहरूलाई क्रियाशील गराउने, सबै साथीलाई चुनाव परिचालनमा जुटाउने र अगाडि बढाउनुपर्ने भन्नेमा हामीले सन्देश दिएका छौँ।’

माओवादी केन्द्रका नेता महेश्वर दाहालले कतिपय ठाउँमा अझैपनि बागि उम्मेदवार रहेकाले त्यो फिर्ता गराउने विषयमा छलफल भएको बताए। त्यस्तै, गठबन्धनका नेता, कार्यकर्ताहरू नै चुनावमा सक्रिय नभएको भन्दै उनले त्यस्ता समस्या समाधानका लागि गठबन्धनमा छलफल अघि बढेको बताए।

बैठकमा कांग्रेसकान तर्फबाट नेताहरू अम्बिका बस्नेत, दिव्यमणि राजभण्डारी र सुरेश आचार्यको सहभागिता थियो भनेमाओवादी केन्द्रबाट महेश्वर दाहाल, गोविन्द आचार्य र विष्णु सापकोटाको सहभागिता थियो।

त्यसैगरी, एकीकृत समाजवादीबाट लक्ष्मण केसी, लोकतान्त्रिक समाजवादी पार्टीबाट दामोदर आचार्य र राष्ट्रिय जनमोर्चाबाट हिमलाल पुरीको उपस्थिति रहेको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

स्ववियु निर्वाचन चैत ५ गते हुने

स्वास्थ्य बीमा सुधारका लागि स्वास्थ्यमन्त्री प्रदीप पौडेलद्वारा आन्तरिक थालनी, कार्ययोजना बनाउने प्रक्रिया सुरु

रविसहित ७ जनालाई थुनामा राख्न माग गर्दै उच्चमा निवेदन