काठमाडौं– नेकपा (क्रान्तिकारी माओवादी) का महासचिव मोहन वैद्यले नयाँ क्रान्तिको तयारीका लागि मंसिर ४ गतेको निर्वाचन बहिस्कार गरेको दाबी गरेका छन्।
बुधबार काठमाडौंस्थित शान्तिबाटिकामा नेकपा (क्रान्तिकारी माओवादी), नेकपा (मशाल), नेकपा (बहुमत) र माओवादी कम्युनिस्ट पार्टी, नेपालको संयुक्त आयोजनामा गरिएको निर्वाचन बहिस्कार सभामा बोल्दै उनले नयाँ क्रान्तिको तयारीका लागि निर्वाचन बहिष्कार गरिएको स्पष्ट पारे।
वैद्यले विद्यमान राज्यव्यवस्थाको अन्त्य गर्दै जनवादी राज्यसत्ता र वैज्ञानिक समाजवाद ल्याउन जरुरी रहेको बताए। उनले नयाँ क्रान्तिको तयारी गर्न क्रान्तिकारी कम्युनिस्टहरू एकताबद्ध हुनुपर्ने बताए।
‘यो सत्ता र व्यवस्थाका विरुद्ध यी दलहरूले जुन विचारधाराका कुरा गर्छन्, त्यसका विरुद्ध संघर्ष गरेर नेपालमा नयाँ जनवादी राज्यसत्ता हुँदै वैज्ञानिक समाजवाद ल्याउन जरुरी छ। त्यहाँ नपुगिकन समस्याको हल हुनेवाला छैन। त्यसकारणले अब हामीले नयाँ क्रान्तिको तयारी गर्नुपर्छ’, उनले भने, ‘तर नयाँ क्रान्तिको तयारी गर्नका निम्ति सच्चा क्रान्तिकारी कम्युनिस्टहरू एकताबद्ध भएर जान जरुरी छ। संगठनलाई बलियो बनाउनु पर्छ। यो पुरानो संसदीय व्यवस्थाका विरुद्ध नयाँ जनवादी, वैज्ञानिक समाजवादी संसदीय व्यवस्थाको स्थापनाको निम्ति दृढतापूर्वक अगाडि बढ्न जरुरी छ।’
महासचिव वैद्यले राज्यका तीनवटै अंग कार्यपालिका, व्यवस्थापिका र न्यायपालिका असफल भइसकेको बताए। शक्ति पृथकीकरणको सिद्धान्त भनिएको भएपनि तीन अंगबीच शक्ति सङ्घर्ष चलिरहेको टिप्पणी गरे।
‘राज्यका तीनवटै अंग असफल भइसकेका छन्। कार्यपालिका, व्यवस्थापिका र न्यायपालिकामा झगडै–झगडा छ। शक्ति पृथकीकरणको सिद्धान्त भनेर संसदीय व्यवस्थामा भनियो, तर के भने शक्ति संघर्षको सिद्धान्त हो’, उनले भने, ‘आपसमा लडेको छ, लडेको छ। गर्नु केही होइन। त्यसकारण कार्यपालिका, व्यवस्थापिका र न्यायपालिका सब असफल छ।’
वैद्यले निर्वाचन आयोगले आफूहरूलाई दमन गरिरहेको बताए । आफूहरू निर्वाचनको बहिष्कारको पक्षमा रहेको बताउँदै उनले आचारसंहीता नलाग्ने जिकिर गरे। उनले शान्तिपूर्ण तरिकाले प्रचारप्रसार गर्दा अवरोध भएको भन्दै सत्ता गठबन्धनका नेता पुष्पकमल दाहाल प्रचण्डमाथि आक्रोश पोखे।
प्रचण्डहरूले प्रतिगमनको विरुद्धमा लडेको दाबी गरेपनि उनीहरूले आफूहरूमाथि प्रतिगमन गरेको टिप्पणी वैद्यले गरे। उनले जनताको मौलिक अधिकारलाई खोसेर कुन प्रतिगमनका विरुद्ध लड्ने हो भनी प्रश्नसमेत गरे।
‘ठाउँ–ठाउँ पूरै दमन गरिराखेको छ, यसको कारण के हो? निर्वाचन आयोग के हो र को हो? त्यसको आचारसंहिता के हो? हामी बहिष्कारवादीलाई आचारसंहिता किन लाग्ने?’ उनले प्रश्न गरे, 'प्रचण्डजीहरू भन्नुहुन्छ प्रतिगमनका विरुद्ध संघर्ष गरिरहेको, यहाँभन्दा ठूलो प्रतिगमन के हो? जनताको मौलिक अधिकारलाई खोस्ने, अनि कुन प्रतिगमनका विरुद्ध लड्ने हो? प्रतिगमन त उहाँहरूले नै गरिरहनु भएको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786875010.jpg)
-1786602170.png)
-1786513116.png)
