काठमाडौं– थापाथलीस्थित ‘द ब्रिटिस कलेज’ले यस वर्ष पनि ‘हल्ट प्राइज’को आयोजना गर्ने भएको छ। अघिल्लो संस्करण सफलतापूर्वक सञ्चालन गरेको ब्रिटिस कलेजले यस वर्ष पनि कार्यक्रमको आयोजना गर्न लागेको हो।
हल्ट प्राइज फाउन्डेशनद्वारा स्थापित यस कार्यक्रम उद्यमशीलता, नवप्रवर्तन, र स्टार्ट– अपहरूको क्षेत्रलाई प्रोत्साहन गर्ने उदेश्यले सञ्चालन हुँदै आएको छ। यस कार्यक्रममार्फत सहभागीहरूले आफ्ना सिर्जनात्मक विचारहरू निर्णायक मण्डलमाझ प्रस्तुत गर्न सक्नेछन्।
यस कार्यक्रममा मुख्यतः चार चरण हुनेछन्। जसमा अन–क्याम्पस, क्षेत्रीय, ग्लोबल एक्सेलेरेटर र ग्लोबल फाइनल रहेका छन्। यी चरणहरु पार गरेपछि निर्णायकहरूले विजेताको घोषणा गर्नेछन्। विजेताले लगानीका लागि १ मिलियन डलर प्राप्त गर्नेछन्। हल्ट प्राइज संयुक्त राष्ट्र संघमा आधारित कार्यक्रम हो जुन हरेक वर्ष विश्वविद्यालयस्तरका विद्यार्थीहरूका लागि दिगो विकास लक्ष्यहरूमा आधारित विभिन्न विषय वस्तुका लागि १२० देशमा आयोजना हुँदै आएको छ।
यस वर्षको विषय भने ‘रिडिजाइनिङ फेसन’ रहेको छ। यसअघि, हल्ट प्राइज फाउन्डेसनद्वारा केन्याको नैरोबीमा आयोजना भएको ‘सेन्ट्रल साउथ एशिया प्रोग्राम अफ द इयर’ कार्यक्रमको लागि ब्रिटिस कलेजले ग्रिशम तिवारी र सन्दीप यादवलाई छनोट गरी सहभागी हुन पठाएको थियो। द ब्रिटिस कलेज २०२२–२३ को हल्टप्राइजका लागि प्रज्वलिता विष्ट यस वर्ष पहिलो महिला क्याम्पस निर्देशकमा नियुक्त भएकी छिन्। उनीसँग दुई डीसीडी, सन्दीप यादव र सुजित ज्ञवालीसहित २० जनाको आयोजक समिति बनेको छ। समितिले कार्यक्रमको तयारी थालिसकेको छ।
तयारीस्वरुप भदौ २९ गते राष्ट्रिय बाल दिवसको अवसरमा सेन्ट जेभियर्स स्कुलका पूर्वविद्यार्थीहरूसँग यौन दुव्र्यवहारको शिकार भएका बालबालिकाहरूको हेरचाह गर्ने एनजीओलाई सामग्री प्रदान गर्ने उदेश्यले आर्थिक संकलनमा सहभागीता जनाएको थियो।
साथै, सेप्टेम्बर २७ मा विष्टको अध्यक्षतामा बसेको बैठकले आगामी कार्यक्रमको बारेमा छलफल गरि निर्णयसमेत गरेको छ। निर्देशक विष्टका अनुसार कार्यक्रममा सहभागी हुन इच्छुक ब्रिटिस कलेजका विद्यार्थीहरूले नोभेम्बरको मध्यसम्म आवेदन दिन सक्नेछन्। इच्छुक सहभागीले तीनदेखि पाँच सदस्यको टोली बनाउनु पर्नेछ। टोलीका सदस्य एउटै विश्वविद्यालयको हुनु पर्नेछ, तथापि, एकजना सदस्य भने अर्को संस्थाको पनि हुनसक्ने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
