निर्वाचन विशेष

चुनावी अभियानका लागि सुदूरपश्चिम केन्द्रित हुँदै दलहरु

शेरबहादुर ऐर शुक्रबार, कात्तिक १८, २०७९ १३:५१

धनगढी– आगामी मंसिर ४ गते हुने प्रदेश तथा प्रतिनिधि सभाको चुनावी अभियानका लागि प्रमुख दलहरुले सुदूरपश्चिम प्रदेशलाई ‘सुरुवाती केन्द्र’ बनाएका छन्। निर्वाचन आयोगले कात्तिक १७ गतेदेखि चुनावी सभा, सम्मेलनहरु आयोजना गर्न खुला गरेपछि प्रमुख दलका शीर्ष नेताहरु सुदूरपश्चिम केन्द्रित भएका हुन्।

सत्ता गठबन्धनसँगै विपक्षि गठबन्धनले पनि सुदूरपश्चिमबाट देशव्यापी चुनावी प्रचार सुरु गर्न थालेका छन्। सत्ता गठबन्धनको नेतृत्वकर्ता दल नेपाली कांग्रेसका सभापति एवम् प्रधानमन्त्री शेरबहादुर देउवा बुधबारदेखि नै सुदूरपश्चिममा छन्। गृहजिल्ला डडेलधुराबाट प्रतिनिधि सभा सदस्यको उम्मेदवार रहेका देउवा केही दिन यतैका चुनावी सभामा व्यस्त रहनेछन्।

विपक्षी गठबन्धनको नेतृत्वकर्ता दल नेकपा एमालेका अध्यक्ष केपी शर्मा ओली पनि सुदूरपश्चिम पुगेका छन्। एमालेले सुदूरपश्चिमको दार्चुलाबाट आफ्नो चुनावी अभियानको सुरुवात गर्दैछ।

बुधबार सुदूरपश्चिम पुगेका प्रधानमन्त्री देउवाले बिहीबार डडेलधुरा सदरमुकाम अमरगढीमा आयोजित बृहत् चुनावी सभालाई सम्बोधन गरे। कात्तिक २२ गतेसम्म डडेलधुरामै रहने देउवाले त्यहाँ रहँदा ७ वटा चुनावी सभालाई सम्बोधन गर्ने कार्यतालिका रहेको नेपाली कांग्रेस सुदूरपश्चिम प्रदेश कार्यसमितिका महामन्त्री नरनारायण शाह (मनु)ले बताए। ‘सभा सम्मेलन गर्न आयोगको अनुमति पाएपछि केन्द्रीय पार्टी सभापति डडेलधुरा पुग्नुभएको हो,’ महामन्त्री मनुले भने, ‘त्यसबाहेक पनि जिल्ला जिल्लामा चुनावि सभा आयोजना गर्ने तालिका रहेको छ। २२–२३ गते तिर गठबन्धनको संयुक्त चुनावी सभा पनि सञ्चालनका लागि तयारी गर्दै छौं।’

एमाले अध्यक्ष ओली भने बिहीबार धनगढी पुगे। शुक्रबार दार्चुलाबाट चुनावी अभियान सुरु गर्ने ओलीले त्यही दिन बैतडी र कञ्चनपुरका सभालाई पनि सम्बोधन गर्ने कार्यतालिका छ। अध्यक्ष ओलीले शुक्रबार नै बैतडी र कञ्चनपुरमा आयोजना हुने चुनावी सभालाई पनि सम्बोधन गर्ने कार्यतालिका रहेको एमाले सुदूरपश्चिम प्रदेश कमिटीका सचिव धर्मराज पाठकले जानकारी दिए।

एमाले शुक्रबार ३ जिल्लामा पहिलो चरणका चुनावी सभालाई सम्बोधन गरेर फर्किने कार्यक्रम छ। तर, एमाले प्रदेश कमिटीले भने अन्य ठाउँका चुनावी सभामा पनि ओलीले सम्बोधन गर्नेगरी तयारीमा जुटेको पाठकले बताए।

‘अर्को सभा कहिले र कहाँ गर्ने भन्ने निश्चित भएको छैन,’ सचिव पाठकले भने, ‘तर कैलाली लगायत केही पहाडी जिल्लामा बृहत् चुनावी सभा आयोजनाका लागि छलफल भइरहेको छ, ती सभामा पनि सम्भवतः अध्य ओलीनै आउनुहुन्छ।’

नेकपा माओबादी केन्द्रका केन्द्रीय सदस्य लक्षिराम आचार्यले चुनावी सभालाई सम्बोधन गर्न पार्टी अध्यक्ष पुष्पकमल दाहाल (प्रचण्ड) आउने भए पनि कहाँ र कहिले कार्यक्रम गर्ने भन्ने निश्चित नभएको बताए।

‘आज (शुक्रबार) हाम्रो प्रदेशस्तरीय छलफल हुँदैछ,’ आचार्यले भने, ‘सो छलफलपछि अध्यक्षले कुन–कुन ठाउँमा सम्बोधन गर्ने भन्ने टुङ्गो लाग्ने छ।’

प्रारम्भिक चरणमा कम्तीमा एउटा जिल्लामा एउटा सभाको आयोजना गर्ने बारेमा छलफल केन्द्रित रहेको उनले बताए। यद्यपि गठबन्धनका अन्य दलसँग पनि छलफल गरेर बृहत् आमसभा तय गरिने आचार्यले जानकारी दिए।

नेकपा एकीकृत समाजबादी पार्टीले अछामबाट चुनावी सभाको सुरुवात गर्ने कार्यतालिका रहेको छ। एकीकृत समाजवादीका सुदूरपश्चिम प्रदेश अध्यक्ष हर्कबहादुर सिंहका अनुसार कार्तिक १९ गते (शनिबार) अछामको साँफेबगरमा हुने चुनावी सभामा नेकपा एसका केन्द्रीय उपाध्यक्ष प्रमेश हमालले सम्बोधन गर्नेछन्। हमालले नै २० गते अछामकै रामारोसनमा, २१ गते बझाङको चैनपुरमा, २२ गते बैतडीको खोड्पेमा र डडेलधुरामा तथा २३ गते डोटीको बान्डुग्रीसैन वा तल्कोटमा हुने चुनावी सभालाई सम्बोधन गर्ने कार्यतालिका रहेको छ।

त्यसबाहेक कैलाली कञ्चनपुरमा पनि चुनावी सभा आयोजना गरिने प्रदेश अध्यक्ष सिंहले बताए। कैलाली, कञ्चनपुरका हुने चुनावी सभामा पार्टी अध्यक्ष माधवकुमार नेपाललाई पनि ल्याउने बारेमा छलफल भइरहेको उनले जानकारी दिए।