निर्वाचन विशेष

सुदूरपश्चिम प्रदेश : २०४८ मै चुनाव लडेका ४ उम्मेदवार मैदानमा

शेरबहादुर ऐर बिहीबार, कात्तिक १७, २०७९ ०७:११

धनगढी– मंसिर ४ गते हुने प्रतिनिधि तथा प्रदेश सभा निर्वाचनमा सुदूरपश्चिम प्रदेशबाट २०४८ सालमै चुनाव लडेका ४ जना उम्मेदवार प्रतिस्पर्धा गर्दैछन्।

प्रधानमन्त्री तथा नेपाली कांग्रेसका सभापति शेरबहादुर देउवा, नेकपा एमालेका केन्द्रीय सचिव तथा पूर्वमन्त्री लेखराज भट्ट, पूर्वमन्त्री रामजनम चौधरी र उद्योग, वाणिज्य तथा आपूर्ति मन्त्री दिलेन्द्रप्रसाद बडु पहिलोपटक प्रतिस्पर्धा गरेको ३१ वर्षपछि पनि चुनावी मैदानमा छन्। २०४८ सालको निर्वाचनमा देउवा, बडु र चौधरी विजयी भएका थिए भने भट्ट पराजित भएका थिए।

प्रधानमन्त्री तथा कांग्रेस सभापति शेरबहादुर देउवा उमेरले पाका हुन्। जो डडेल्धुराबाट यसपल्ट पनि चुनाव जितेमा सात पटक सांसद बन्नेछन्। देउवा डडेल्धुराबाट पहिलो पटक सांसद बन्दा ४४ वर्षका थिए।

दार्चुलाबाट दिलेन्द्रप्रसाद बडु कांग्रेसबाट प्रत्यक्षमा उम्मेदवार छन्। उनी २०४८ सालदेखि सोही निर्वाचन क्षेत्रमा उमेदवार बनेका छन्। २०५६ सालको आम निर्वाचनमा बडु प्रतिनिधि सभामा निर्वाचित भएका थिए। २०७४ सालमा समानुपातिक तर्फबाट प्रतिनिधिसभा सदस्य बनेका बडु यस पटक प्रत्यक्षतर्फ निर्वाचनमा होमिएका छन्।

२०७० र ०७४ सालको चुनावमा लगातार जित हात पारेका नेकपा एमालेका गणेश सिंह ठगुन्ना बडुसँग प्रतिस्पर्धामा छन्।

२०६४ सालको निर्वाचनमा तत्कालीन कैलाली- ५ (हालको निर्वाचन क्षेत्र नम्बर ४) मा नेकपा माओवादी केन्द्रबाट विजयी बनेका भट्ट २०७० सालमा नेपाली कांग्रेसका उम्मेदवार दीर्घराज भाटसँग पराजित भएका थिए।

२०७४ सालमा कैलाली- ४ बाट नेपाली कांग्रेसका सुनिल भण्डारीलाई हराउँदै बाम-गठबन्धनबाट प्रतिनिधि सभामा भट्ट विजयी भएका थिए। उनी अहिले प्रतिनिधि सभामा सत्ता गठबन्धनबाट नेपाली कांग्रेसका उम्मेदवार वीरबहादुर बलायरसँग प्रतिस्पर्धा गर्दैछन्।

कैलाली- २ बाट २०४८ सालमा सांसद बनेका थिए पूर्वमन्त्री रामजनम चौधरी। पाँच पटक सांसद बनेका चौधरी छैटौं पटक पनि सांसद बन्ने दाउमा रहेका छन्। उनी २०७४ सालको प्रतिनिधि सभा निर्वाचनमा भने पराजित भएका थिए।

२०७४ को चुनावमा कैलाली- ३ मा बाम गठबन्धनसँग हारेका पूर्वमन्त्री चौधरीलाई कांग्रेसले यस पटक कैलाली- १ मा उम्मेदवार बनाएको हो। गठबन्धनको बलमा २०७४ को हारलाई जितमा बदल्ने योजनाका साथ चौधरी कस्सिएका छन्।

उनी २०७४ को निर्वाचनमा कैलाली- ३ बाट बाम गठबन्धनका तर्फबाट माओवादीका उम्मेदवार गौरीशंकर चौधरीसँग पराजित भएका थिए। अहिले गौरीशंकर माओवादी त्यागेर एमालेमा छन्।

रामजनम २०४८ देखि २०७० सम्म अपराजित नेता हुन्। उनले २०४८, २०५१ र २०५६ मा कैलाली- २ मा कांग्रेसबाट प्रतिनिधि सभा सदस्य निर्वाचन जिते। २०५१ मा एमालेको लहर चलेको बेला पनि उनले जित हात पारे। २०६४ मा चुनाव लड्दा जित सुनिश्चित नहुने बुझेपछि विजय गच्छदारको पार्टीमा प्रवेश गरेर समानुपातिक कोटाबाट सभासद चुनिएका थिए चौधरी।

२०७० सालमा दोस्रो संविधान सभा चुनावमा मधेशी जनअधिकार फोरमबाट कैलाली- ३ बाट चुनाव जितेका रामजनम पहिलो पटक २०७४ सालको चुनावमा पराजित भएका थिए।

कैलाली- ३ मा रामजनम बामगठबन्धनबाट माओवादीका गौरीशंकरसँग चार हजार तीन सय ८५ मतान्तरले पराजित भएका थिए। यस पटक गठबन्धनको साथले २०७४ को हारको बदला लिँदै रामजनम जित निकालेर फेरि संसद यात्रा तय गर्ने योजनामा छन्।