काठमाडौं– नेकपा एमालेले आगामी निर्वाचनको मुख्य हतियार राष्ट्रियतालाई बनाउने संकेत घोषणापत्रबाट गरेको छ। घोषणापत्रको कभरदेखि भित्रीभागका चित्रमा समेत चुच्चे नक्सालाई प्रशस्त अवसर दिइएको छ।
एमाले अध्यक्ष केपी शर्मा ओली नेतृत्वको सरकारका पालामा कालापानी, लिपुलेक र लिम्पियाधुरासहितको भूभाग समेटेर नयाँ प्रशासनिक–राजनीतिक नक्सा प्रकाशित गरिनुका साथै नेपालको संविधानको अनुसूची ३ संशोधन गरी निशान छापमा समावेश गरिएको विषय विभिन्न उपशीर्षकमा दोहोरिएको छ।
एमालेले घोषणापत्रमा प्रस्तुत गरेकका ‘२० ग्यारेन्टी’को दोस्रो नम्बरमा ‘नेपालीलाई मात्रै नागरिकता’ भनेर पहाडमा राष्ट्रवाद अझ विस्तार गर्ने दर्शाएको छ। संक्षिप्तमा नेपालीलाई मात्रै नागरिकता दिने उल्लेख गरेको एमालेले यसको सविस्तारमा भनेको छ, ‘हाम्रा काम राष्ट्रिय गौरव बढाउन र सबै नागरिकको सम्मानजनक जीवनस्तर हासिल गर्ने कार्यक्रममा केन्द्रित हुनेछन्। सरकार गठन भएको एक महिनाभित्र नेपाली नागरिकका सन्तानले नागरिकता नपाउने अवस्था अन्त्य गर्ने र ६ महिनाभित्र नागरिकतासम्बन्धी समस्या हल गरिने छ। एक वर्षभित्र राष्ट्रिय परिचयपत्र वितरण गरिने छ।’
यसैगरी एमालेले अघि सारेको ‘सुशासन, विकास, समृद्धि र समानताका लागि ५ वर्षे नीति तथा प्राथमिकता’मा पनि राष्ट्रियतालाई जोड दिएको छ। ‘हाम्रो मूल मन्त्रः बलियो राष्ट्रियता र सदृढ लोकतन्त्र’ भनिएको छ। ‘नेकपा एमाले राष्ट्र, राष्ट्रियता, सार्वभौमसत्ता, भौगोलिक अखण्डता र राष्ट्रिय एकताप्रति सचेत छ, प्रतिबद्ध छ र संवेदनशील छ। यसले न्याय, समानता, सद्भाव, समद्धि र गौरवका माध्यमबाट राष्ट्रिय एकतालाई सदृढ र मजबुत बनाउनेछ। मैत्रीभाव, सक्रियता र एकतालाई नेपालको राष्ट्रिय नीति र समाजकोमूल चरित्रका रूपमा विकास गर्नेछ,’ एमालेले घोषणापत्रमा भनेको छ।
यसैगरी एमालेले प्रस्तुत गरेका ‘८२ माइलस्टोन’मा राष्ट्रियतासँग जोडिएका ९ बुँदा छन्। ‘राष्ट्रिय हितको रक्षा, राष्ट्रिय स्वाभिमान अभिवृद्धि र राष्ट्रियता सुदृढीकरण’ भन्ने उपशीर्षका केही महत्वपूर्ण बुँदा यसप्रकार छन् :
१) नेपाल–भारत सम्बन्धको सन्दर्भमा ‘प्रबुद्ध व्यक्तिहरुको समूह (इपिजी)’ गठन गरिएको। १९५० को सन्धी लगायत दुई देशबीच भएका द्विपक्षीय सन्धि र सम्झौताहरुको पुनरावलोकन गरी समस्या हल गर्न सहमतिमा सुझाव प्रतिवेदन तयार गरियो।
२) सुदूरपश्चिम प्रदेशको कालापानी, लिपुलेक र लिम्पियाधुरा सहितको आफ्नो भूभाग समेटेर नयाँ प्रशासनिक–राजनीतिक नक्सा प्रकाशित गरिएको। चुच्चे नक्साको नाममा चर्चित नेपालको नक्सालाई संसद्ले सर्वसम्मत रुपमा संविधानको अनुसूची ३ संशोधन गरी निशान छापमा समावेश गरिएको।
३) प्रतिनिधि सभा र राष्ट्रिय सभाको सर्वसम्मत निर्णयसहित नेपालको संविधान संशोधन गरी लिम्पियाधुरा, लिपुलेक र कालापानी समेटेर नेपालको राजनीतिक र प्रशासनिक सीमासहितको नयाँनक्साको प्रकाशन गरियो।
एमालेले यसअघि आफ्ना सरकारले गरेका राष्ट्रियताका कुरालाई पनि घोषणापत्रमा उल्लेख गरेको छ। २०५१ सालको ९ महिने सरकारका पालामा भारतसँग १९५० को असमान सन्धि पुनरावलोकनका लागि औपचारिक प्रस्ताव अघि बढाएको घोषणापत्रमा उल्लेख गरिएको छ। यसैगरी बंगलादेशसँगको सिधा सम्पर्कका लागि फूलबारी बङ्लाबन्ध बाटोको माग गरिइएको बताइएको छ।
२०७२ सालमा ओलीकै नेतृत्वको सरकारले भारतको नाकाबन्दीविरुद्ध गरेको प्रतिवाद पनि घोषणापत्रमा उल्लेख छ। भनिएको छ, ‘संविधान जारी गरेवापत लगाइएको नाकाबन्दीको दृढतापूर्वूक सामना गर्दै मुलुकको स्वाभिमान एवं स्वाधीनताको रक्षाका लागि नेपाल सक्षम छ भन्ने उदाहरण प्रस्तुत गरियो। यस कदम सँगै आम नेपालीमा आफ्नो सभ्यता, संस्कृति, गौरवपूर्ण इतिहास र राष्ट्रिय भावको पुनरोदय भयो।’
यसैगरी २०७४ सालको निर्वाचनपछि आफ्नै नेतृत्वको सरकारले चुच्चे नक्सा जारी गरेको घोषणापत्रमा उल्लेख छ। ‘सिङ्गो नेपाललाई एक ढिक्का बनाइ संविधानमा सर्वसम्मत संशोधन गरी अतिक्रमित भूभागहरू (लिम्पियाधुरा, लिपलेकु र कालापानी) समेटी नेपालको नयाँनक्सा प्रकाशन गऱ्यो,’ घोषणापत्रमा भनिएको छ।
ओलीले घोषणापत्र सार्वजनिक कार्यक्रमको बहसमा पनि सूर्यमा भोट हाल्ने कारणमा पनि राष्ट्रियताको विषयलाई उल्लेख गरेका छन्। उनले भने, ‘दासता अस्वीकार गरेको। राष्ट्रका लागि बलिदान गर्न तयार। पराधीन हुन कहिल्यै तयार नभएको। यसको स्वाधीनता र स्वतन्तन्त्रता, सार्वभौम सत्ता र भौगोलिक अखण्डता कायम राख्न राष्ट्रिय हित कायम राख्न सूर्यमा भोट हाल्नुपर्छ।’
एमाले अध्यक्ष ओलीले चुनावी अभियान पनि लिम्पियाधुरा, लिपुलेक र कालपानी रहेको दार्चुला जिल्लाबाट थाल्दैछन्। कात्तिक १८ गते हेलिकप्टरमार्फत् दार्चुला पुगेर सदरमुकाम खलंगामा आमसभालाई सम्बोधन गर्दै चुनावी अभियान सुरु भएको घोषणा गर्ने तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788534241.jpg)
-1787821303.jpg)
-1786602170.png)
-1789631269.jpg)
