नेकपा एमालेले काठमाडौं- ३ बाट निवर्तमान सांसद कृष्ण राईलाई प्रतिनिधि सभा सदस्यमा उम्मेदवार बनाएको छ। उनी नेपाली कांग्रेसका सन्तोष चालिसेसँग प्रतिस्पर्धा गर्दैछन्। चालिसे गोकर्णेश्वर नगरपालिका पूर्वमेयर हुन्।
एमाले अध्यक्ष केपी ओली निकट मानिने राई २०७४ सालमा पनि सोही क्षेत्रबाट निर्वाचित भएका थिए। आफूले दोस्रो पटक पनि निर्वाचन जित्ने दावी गर्छन् राई। 'मैले आफ्नो क्षेत्रमा धेरै काम गरेको छु। कतिपय योजना अधुरा छन्। ती योजना पूरा गर्नका लागि पनि मतदाताले मलाई जिताउने छन्,' उनको दावी छ।
काठमाडौं- ३ मा एमालेका तर्फबाट उम्मेदवार बनेका उनै राईसँग नेपाल लाइभले गरेको कुराकानी:
काठमाडौं- ३ मा दोस्रो पटक उम्मेदवार बन्नुभएको छ। मतदाताले तपाईंलाई नै पटक-पटक किन जिताउने?
काठमाडौं- ३ का जनताको घरदैलोमा जानुअघि अहिले हामी कार्यकर्ताको माझमा छौं। यो क्षेत्रका जनताको घरदैलोमा पुगेर मैले धेरै काम गरेको छु। विगतदेखि सुरु भएका केही कामहरु निरन्तर चलिरहेका छन्। ती काम पूरा गर्न यस पटक म चुनावी मैदानमा उत्रिएको हुँ।
२०७४ सालको निर्वाचनमा मलाई जनताले विश्वास गरेर जिताएका थिए। मैले कोरोनादेखि अन्य समयमा यो क्षेत्रका लागि धेरै काम गरेको छु। प्रतिनिधि सभाको उम्मेदवार चयन गरिरहँदा मतदाताले यस क्षेत्रमा मेरो आवश्यकता रहेको बताएपछि मैले उम्मेदवार हुने निर्णय गरेको हुँ।
मैले गरेका विगतका काम हेरेर र जनताले मलाई जिताउने हुन्। मैले गोकर्णदेखि कागेश्वरी मनहरासम्मका जनताका लागि सांसदको रुपमा धेरै काम गरेको छु। संसद विकास कोष मार्फत धेरै महत्वका योजना सुरु गरेको छु। जोरपाटी-सुन्दरीजल बाटो निर्माणदेखि यो क्षेत्रलाई पर्यटकीय क्षेत्र बनाउन संघीय संसदमार्फत धेरै भूमिका निभाएको छु।
गोकर्ण उत्तरगयादेखि कागेश्वरी हुँदै साँखुसम्म पर्यटकीय क्षेत्र बनाउन केन्द्रीय तहबाट भूमिका खेलेको छु। त्यही भएर मतदाताले मलाई नै चुन्नेछन्।
मंसिर ४ को निर्वाचनमा तपाईंले मतदातामाझ लैजाने अजेण्डा केके हुन्?
नेकपा एमालेले २०७४ को निर्वाचनमा बहुमत ल्याएपछि सरकार राम्रोसँग चलाउन पाएन। आफ्नै पार्टीभित्र असहयोग भएपछि नयाँ निर्वाचनमा देशलाई लैजान खोजेको थियो। तर अदालत र विविध कारणले गर्दा त्यो सम्भव नभए। तर अब मंसिर ४ मा एमालेले बहुमत पाउनु पर्नेछ।
देशलाई सुशासन र सामाजवादको यात्रा गराउने एक मात्र पार्टी एमाले नै हो। त्यसैले पनि क्षेत्र नम्बर ३ का जनताले अमूल्य मत दिएर जिताउनु पर्नेछ।
त्यस्तै मतदाताहरुले यस क्षेत्रको समस्या केन्द्रसम्म लैजाने र यहाँको विकासका लागि पहल गर्ने व्यक्तिको रुपमा मलाई चिनेका छन्। मैले यस पटक यस क्षेत्रका केही विशेष अजेण्डाहरु निर्माण गरेको छु।
शहर र ग्रामीण क्षेत्रको मिश्रण रहेको यस क्षेत्रमा पर्यटकीयदेखि धार्मिक क्षेत्रहरु रहेका छन्। तर त्यसलाई प्रचार गरेर हामीले फाइदा लिन सकेका छैनौं। अब त्यस क्षेत्रका काम गर्नु पर्नेछ।
पशुपति वैद्यनाथ हुँदै गोकर्ण, उत्तरबाहिनीबाट सुन्दरीजलसम्म र साँखुसम्म धार्मिक क्षेत्र बनाउन सकिन्छ। मैले यो कुरा आफ्नो अजेण्डाको रुपमा राखेको छु।
त्यस्तै यहाँ खानेपानीको पनि समस्या भएकाले त्यसको दीर्घकालीन समस्या समाधान गर्ने, सडक र स्वास्थ्यलाई पनि प्राथमिकता दिएर काम गर्ने अजेण्डा मेरो रहेको छ।
२०७४ को निर्वाचनमा पनि यस्तै प्रतिवद्धता थियो। तर कृष्ण राई निर्वाचित भएपछि यस क्षेत्रका फर्केन, संसदमा पनि आवाज उठाएन भन्ने गुनासो छ नि?
यो आरोप गलत हो। म यहाँका जनतासँगै छु। उनीहरुका लागि सधैं उपलब्ध छु। विपक्षीले आरोप लगाए होला तर मतदाता पत्याउनेवाला छैनन्। सांसदको रुपमा मैले कुनै पनि क्षेत्रलाई विभेद नगरी काम गरेको छु। जनताको हरेक निम्तोमा उनीहरुसँग सुखदु:ख साट्न पुगेको छु। संसदमा समय पाएको समयमा यहाँको समस्या राखेकै छु। कानुन बनाउने र नीतिगत पहल गर्ने ठाउँमा पनि यस क्षेत्रलाई प्राथमिकतामा राखेर काम गरेको छु। यदि कसैले गलत आरोप लगाउँछ भने त्यसलाई हामी चिरेर जान्छौं।
तपाईंका प्रतिस्पर्धी गोकर्णेश्वर नगरपालिकाका पूर्वमेयर हुनुहुन्छ। उहाँले स्थानीय तहमा हुँदा धेरै काम गरेको दावी गर्नुभएको छ। तपाईंको जित्ने आधार चाहिँ के हो त?
यस क्षेत्रमा हामीले जित्ने आधार भनेको नेकपा एमालेको मजबुत संगठन नै हो। एमालेले विगतदेखि नै यो क्षेत्रलाई राम्रो आधार भएको मान्दै आएको छ। वैशाख ३० गतेको स्थानीय तह निर्वाचनमा पार्टीकै आन्तरिक कारणले केही प्रमुख पदमा हामी पराजित भयौं। तर अधिकांश वडामा हाम्रा उम्मेदवारले जितेका छन्।
विगतमा यहाँका नगर प्रमुखले काम हैन, धेरै गफ गरेको कुरा जनतालाई जानकारी छ। नगरपालिका प्रमुखको रुपमा उनीहरुले पाँच वर्ष त बिताए तर कुनै पनि काम नगरेको कुरालाई ध्यानमा राख्दै मलाई मत दिनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
