महेन्द्रनगर- आगामी मङ्सिर ४ मा हुने प्रतिनिधि सभा तथा प्रदेश सभा निर्वाचनको सरगर्मी बढिरहेका बेला विभिन्न दलका उम्मेदवार गाउँ-गाउँमा गएर देउसी-भैलो खेल्दै मतदाता रिझाउने प्रयास गरिरहेका छन्। उनीहरु देउसी खेलेर आफू र आफ्नो पार्टीमा मतदान गर्नका लागि अनुरोध गरिरहेका छन्।
नेपाली कांग्रेसका कञ्चनपुर- ३ का प्रतिनिधि सभा उम्मेदवार रमेश लेखक देउसी-भैलोमा सहभागी हुँदै जनतासँग मत मागिरहेका छन्।
त्यसैगरी कांग्रेस-माओवादी गठबन्धनका प्रदेश सभा उम्मेदवार टेकेन्द्र भट्ट, नेकपा (एकीकृत समाजवादी)का उम्मेदवार तथा सुदूरपश्चिम प्रदेशका आर्थिक मामिला मन्त्री प्रकाश रावल, नेकपा एमाले-राप्रपा गठबन्धनका प्रदेश सभा उम्मेदवार धर्मराज जोशी लगायतका उम्मेदवार देउसीऔभैलोको सदुपयोग गर्दै जनतासँग मत मागिरहेका छन्र
घरदैलो अभियानमा रहेका उम्मेदवारले तिहारको समयमा पनि अभियानलाई निरन्तरता दिइरहेको देखिन्छ।
नेपाली कांग्रेस कञ्चनपुरका नेता केशव चन्दले तिहारको समयमा पनि घरदैलो अभियानलाई निरन्तरता दिइरहेको बताए। 'घरदैलो अभियानलाई निरन्तरता दिइरहेका छौँ', उनले भने, 'तिहारको समयमा देउसी-भैलोको रौनक छ। हाम्रा उम्मेदवारले पनि देउसी-भैलोमा सहभागी भएर मत दिन आग्रह गरिरहेका छन्।'
त्यसैगरी राष्ट्रिय प्रजातन्त्र पार्टी कञ्चनपुरका भीमदत्तनगर अध्यक्ष करन पालले पनि उम्मेदवारले देउसी-भैलोको सदुपयोग गरिरहेको बताए।
'अहिले उम्मेदवारले देउसी-भैलो कार्यक्रममा सहभागी भएर आफ्ना कुरा जनतासमक्ष राख्ने र मत दिन आग्रह गरिरहेका छन्,' उनले भने, 'देउसी-भैलोमा सहभागी हुँदै घरदैलो अभियानलाई निरन्तरता दिइरहेका छौँ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
