काठमाडौं – नेपाली कांग्रेसका केन्द्रीय सदस्य तथा सिन्धुली क्षेत्र नम्बर १ बाट सत्ता गठबन्धन तर्फका उम्मेदवार श्यामकुमार घिमिरेले चुनाव जितेर गएपछि गठबन्धनभित्रका कुनै दललाई स्थिरता भत्काउने छुट नभएको बताएका छन्। शनिबार काठमाडौंमा आयोजित एक कार्यक्रममा घिमिरेले आउने पाँच वर्षसम्म यही गठबन्धन कायम रहने दाबीसमेत गरे।
’म केन्द्रीय सदस्यको हैसियतले प्रतिबद्धता गर्छु, यो गठबन्धन आउने पाँच वर्षसम्म भत्किने छैन,’ तत्कालीन नेकपाले गरेको संसद् विघटनलाई स्मरण गर्दै घिमिरेले भने, ’नेकपा (एमाले)ले के भनेर भोट माग्ने? जनताले त्यत्रो मत दिएर पठाए तर दुई–दुईपटक संसद भङ्ग गर्ने काम भयो। अब के भनेर एमालेले भोट माग्छ?’
’केन्द्रमा प्रभाव, क्षेत्रमा विकास’को नारा लगाउँदै चुनावी अभियानमा होमिएका घिमिरेले आफूले राष्ट्रिय राजनीतिमा खेल्ने भूमिकाबारे समेत स्पष्ट पारेका छन्। एउटा सांसद भएर निति–निर्माण तहमा आफूले अब्बल भूमिका खेल्ने प्रतिज्ञा उनले गरे। “लोकतन्त्रको मान्यता भनेको विधिको शासन हो। त्यो विधिको शासन निर्माण गर्ने काममा सबैभन्दा सक्रिय सांसद भएर भूमिका खेल्छु। त्यस्तै, असमान बजेट वितरणको अन्त्य गर्ने काममा पनि सक्रिय भूमिका खेल्छु,’ उनले भने।
शिक्षा र स्वास्थ्य क्षेत्रमा रहेको असमानताको खाडल पुर्न आफूले भूमिका खेल्ने घिमिरेको जिकिर छ। शिक्षामा व्यापक असमानता रहेको बताउँदै उनले सार्वजनिक शिक्षामा सुधार गर्ने र विद्यालयदेखि विश्वविद्यालय शिक्षामा आमूल परिवर्तन ल्याउनेमा अग्रसर भएर काम गर्ने दाबी गरे।
’म एउटा अभियान सुरु गर्छु भनेको छु, सम्पुर्ण सरकारी अस्पतालको गुणस्तर सुधार गर्दै निशुल्क उपचारको थालनी गर्ने अभियान थाल्छु,’ उनले थपे, ’योसगै सिन्धुलीमा पूर्वाधारको क्षत्रमा काम गर्न धेरै बाँकी छ। मेरो घर तीनपाटन जान बाटो नै खराब छ। त्यसैले सिन्धुली–तीनपाटनहुँदै कटारी निस्कने बाटो पिच गर्ने, गोदार–चकमकेहुँदै नवलपुर जाने बाटो व्यवस्थित बनाउने र खनियाँखर्कहुँदै गहुँबारी निस्कने बाटो पिच गरेर सहज बनाउन भूमिका खेल्छु। यी सबै रणनीतिक बाटालाई पिच गराएर राम्रो बनाउने योजना मेरो प्राथमिकतामा छ।’
केन्द्रीय राजनीतिमा भूमिका खेल्नेदेखि स्थानीय स्तरको विकासको योजनाबारे चर्चा गरेका घिमिरेले सबै तहमा गठबन्धनको सरकार हुने भएकोले पनि काम गर्न सहज हुने बताए।
’सबैतिर हाम्रो सरकार हुन्छ। पालिकाबाट हुने काम पालिकाबाटै हुन्छ, प्रदेशले गर्नसक्ने प्रदेशबाटै गराउँछु। तिनले नसकेका काम प्रतिनिधि सभाबाट गर्नेछु। हामी मिलेर काम गर्नेछौं,’ उनले दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
