निर्वाचन विशेष

मतदाता रिझाउने प्रयासमा उम्मेदवार : कोही धान काट्दै, कोही पुरस्कार दिँदै

शेरबहादुर ऐर शनिबार, कात्तिक ५, २०७९ १०:१३

कैलाली–५ ‘ख’ का उम्मेदवार डेजी पाण्डे मतदाताको खेतमा धान काट्दै।

धनगढी– प्रदेश सभा सदस्यका लागि कैलाली–५ ‘ख’ का उम्मेदवार नेकपा एमालेका जिल्ला कमिटी सचिव डेजी पाण्डेले मोहन्याल गाउँपालिका–३ मा कृषकको धान काटेर चु्नावी प्रचार प्रसार अघि बढाए। सामाजिक सञ्जालमा धान काटेको तस्बिर राख्दै आफूले कृषि क्षेत्रलाई प्राथमिकतामा राखेको लेख्न भ्याए।

‘धान काटेको मात्र होइन, रोपेको पनि हो है एक किसानको छोरोले’, धान काटेको भिडिओ सार्वजनिक गर्दै पाण्डेयले भनेका छन्, ‘आफ्नो निर्वाचन क्षेत्र मात्र नभई समग्र सुदूरपश्चिममा कृषि आवश्यक छ र कृषिबाट नै यस क्षेत्रको विकास गर्न सकिन्छ। धेरैले रोजगारीको लागि आफ्नो ठाउं छोडनु पर्ने बाध्यता पनि हट्छ। नेतृत्वले सम्पूर्ण कृषकलाई कमिसनको आधारमा नभई कामको आधारमा प्रोत्साहन गर्नु पर्दछ। उहाँहरूको उत्पादनको ग्यारेण्टी सरकारले लिनु पर्दछ।’

बझाङका उम्मेदवार एमाले नेता ऐन महरले बझाङमा जिल्लास्तरीय खुल्ला फुटबल प्रतियोगिताका विजेतालाई प्रथम पुरस्कार भनी नगद ४१ हजार प्रदान गरे। महरको यस गतिविधिबारे निर्वाचन आयोगले शुक्रबार २४ घण्टे स्पष्टीकरण समेत मागिसकेको छ।

पाण्डे र महर मात्र होइन, प्रतिनिधि तथा प्रदेश सभाको निर्वाचन नजिकिएसँगै उम्मेदवारहरूले मतदाता रिझाउन विभिन्न गतिविधि गरिरहेका छन्। कोही धान काट्दै किसानसँग नजिक बन्न खोजिरहेका छन्। कोही जिल्ला तथा स्थानीय तहमा आयोजित विभिन्न प्रतियोगितामा नगद सहयोग प्रदान गरेर, कोही विभिन्न वर्ग, समुदायमा आश्वासन बाँड्दै मतदातालाई रिझाउन लागिपरेका छन्।

कैलाली–५ को उर्मा क्षेत्रमा पाँच दिनअघि मात्रै उम्मेदवारका समर्थकले किसानको खेतमा धान काट्ने काममा सहयोग गरेर मतदाता रिझाउने प्रयास गरे। ‘धान भित्र्याउन किसानलाई समस्या पर्दा कार्यकर्ताबाट स्वःस्फूर्त रुपमा सहयोग भएको हो’, प्रदेश सभाका प्रत्यासी रमेश धामीले भने ‘किसानलाई समस्या पर्दा हामीहरू जहिले पनि सहयोगी बन्ने गरेका छौं।’

चुनावी प्रसारप्रचारका लागि समर्थकसहित उम्मेदवारहरू गाउँबस्तीमा पुग्न थालेपछि चुनावी रौनक पनि थपिएको छ। सबै दलका र स्वतन्त्र उम्मेदवारले वडा, टोलमा प्रचार प्रसारका लागि सम्पर्क कार्यालय खोलेर गतिविधि बढाइरहेका छन्।

नेपाली कांग्रेस कैलालीका संगठन विभाग सदस्य अमृत बिसीले भने ‘पहिलो चरणमा पार्टी पंक्तिलाई चुनावी प्रचार प्रसारका लागि क्रियाशील बनाइरहेका छौं। विस्तारै घरदैलोमा जाने योजनामा छौं।’

बलायर र महरसँग आयोगले माग्यो स्पष्टीकरण माग
यसैबीच, सुदूरपश्चिम प्रदेशका दुई उम्मेदवारलाई निर्वाचन आयोगले स्पष्टीकरण सोधेको छ। निर्वाचन आचारसंहिता विपरीत गतिविधि गरेको र आयोगमाथि लाञ्छना लगाएको भन्दै दुई जनालाई आयोगले स्पष्टीकरण सोधको हो।

आयोगले कैलाली–४ बाट प्रतिनिधि सभाका उम्मेदवार, कांग्रेसका बीरबहादुर बलायर र बझाङका उम्मेदवार, एमालेका ऐन महरलाई स्पष्टीकरण सोधेको छ।

बलायरले बिहीबार आयोजित चुनावी सभालाई सम्बोधनका क्रममा आयोग र आयोगका पदाधिकारीमाथि लाञ्छनापूर्ण अभिव्यक्ति दिएको भन्दै आयोगले शुक्रबार उनलाई २४ घण्टे स्पष्टीकरण सोधेको हो।

‘तपाईँले आफ्नो निर्वाचन क्षेत्रमा गत बिहीबार आयोजित कार्यक्रममा निर्वाचन आयोग नेपाल र यसका पदाधिकारीहरूउपर लाञ्छनापूर्ण अभिव्यक्ति दिनु भएको सूचना र सोलाई पुष्टि गर्ने सामग्री आयोगमा प्राप्त भइसकेको सन्दर्भमा तपाईँले उक्त अभिव्यक्ति दिनु भएको होइन भन्ने आधार र प्रमाण के छ?’ आयोगले बलायरलाई सोधेको छ।

उनलाई आयोगले पत्र प्राप्त भएको २४ घण्टाभित्र निर्वाचन आयोग वा प्रदेश निर्वाचन कार्यालय कैलालीमा स्पष्टीकरण पेस गर्न भनेको छ। बलायरले बिहीबारको चुनावी सभामा भनेका थिए, ‘नेकपा एकीकृत समाजवादीका अध्यक्ष माधवकुमार नेपालले रौतहटको चुनावी सभालाई सम्बोधन गर्दै बोलेको सामान्य शब्दलाई लिएर निर्वाचन आयोगले पत्र काट्यो। हामीले इमान्दारीपूर्वक निर्वाचन आयोगको आचारसंहितामा हस्ताक्षर गरेका छौं। उल्लंघन गर्दैनौं र गर्न पनि दिँदैनौं। तर, केपी ओलीको इसारामा प्रमुख निर्वाचन आयुक्त दिनेश कुमार थपलियाले उच्छृंखल गतिविधि गर्दैछन्।’

यस्तै, महरले बझाङमा भइरहेको जिल्लास्तरीय खुल्ला फुटबल प्रतियोगितामा प्रथम पुरस्कार प्रदान गरेका थिए। आयोगको पत्रमा भनिएको छ, ‘तपाईंले जिल्लास्तरीय खुल्ला फुटबल प्रतियोगिताका विजेतालाई प्रथम पुरस्कार भनी नगद ४१ हजार प्रदान गरेको भनी सामाजिक सञ्जालमा सार्वजनिक भएको छ। साथै सो विषयमा आयोगमा लिखित उजुरी समेत परेको विषयमा आयोगको ध्यानाकर्षण भई यो पत्र लेख्ने कार्य भएको छ।’

निर्वाचन आचारसंहिता २०७९ को दफा ४ को खण्ड (न) मा ‘कसैले पनि कुनै प्रकारले विर्नाचनको स्वच्छता वा निष्पक्षतालाई प्रभावित गर्ने गरी कुनै कार्य गर्न नहुने’ व्यवस्था छ भने (झ) मा विभिन्न क्लब, सामाजिक संस्था, धार्मिक संस्था, आमा समूह, गैरसरकारी संस्था, आश्रमजस्ता संस्था वा कुनै व्यक्तिलाई नगद वा जिन्सी वितरण गर्न अनुदान, आर्थिक सहायता, चन्दा, पुरस्कार वा निर्वाचन खर्च वा बुथ खर्च दिन वा दिने घोषणा गर्न नहुने’ व्यवस्था छ।