धवल शमशेर राणा राप्रपाका महामन्त्री हुन्। नेपालगञ्ज उपमहानगरपालिका मेयर भइसकेका उनी यसपटक प्रतिनिधि सभा सदस्यका लागि बाँके–२ बाट उम्मेदवार छन्। राणालाई नेकपा एमालेले सर्मथन गरेको छ। स्थानीय तहको मतभार हेर्दा नेपाली कांग्रेस बलियो देखिए पनि राणा आफूलाई स्थानीयस्तरमा परिचित र लोकप्रिय उम्मेदवारको रुपमा प्रस्तुत गर्छन्। उक्त क्षेत्रमा जनता समाजवादीबाट निर्वतमानमन्त्री मोहम्मद ईश्तियाक राई उम्मेवार छन्। २०७४ सालको निर्वाचनमा उनी विजयी भएका थिए। नेपाली कांग्रेसले सुदीपनरसिंह राणालाई उम्मेदवार बनाएको छ भने लोसपावाट अब्दुल हन्नान जसगढ उम्मेवार छन्।
कांग्रेसको बाहूल्य रहेको क्षेत्रमा राणाको जित्ने रणनीतिक के हो? कांग्रेसलाई माओवादी र एकीकृत समाजवादी साथ दिइरहँदा राणाले पासा पल्टाउलान्? यिनै विषयमा राणासँग नेपाल लाइभले गरेको संवाद :
बाँके–२ का जनताले तपाईंलाई किन मतदान गर्ने?
म यस क्षेत्रको विगतमा २ पटक स्थानीय तहको जनप्रतिनिधि भएको व्यक्ति हुँ। म यस क्षेत्रको सबै कुरा बुझेको र समस्या जानेको मानिस हुँ। विगतमा मैले नगरपालिकाको नेतृत्वमा रहेर विकास गरेँ। अब केन्द्रीय तहमा विकासको कुरा उठाउने भूमिका निर्वाह गर्नुपर्ने सोचका साथ प्रतिनिधि सभामा उम्मेदवारी दिएको हुँ। दुई पटक नेपालगञ्ज उपमहानगरपालिकाको मेयर हुँदा मैले धेरै विकासका काम गरेको छु। म यो क्षेत्रको लोकप्रिय उम्मेदवार पनि हुँ। सबै मतदाताको घर घरमा पुगेको र उनीहरुको समस्या सुनेका कारण मलाई मतदाताले मतदान गर्ने छन्। एक शब्दमा भन्नुभन्दा नगरपालिका बनायो अब देश बनाउने अजेण्डा नै मेरो हो।
बाँके–२ मा तपाईंसँगै अन्य उम्मेदवार पनि चुनावी मैदानमा रहेका छन्। उनीहरुले पनि यस्तै दाबी गर्ने गरेका छन्। ती उम्मेदवारभन्दा तपाईं कसरी फरक?
मलाई के विश्वास छ भने यहाँका मतदातासँग म परिचित छु। उहाँहरुलाई मेरो स्वभाव र विकासवादी बानी मन परेको छ। यहाँका मतदाताहरुले धवल शमशेर राणा विकासप्रेमी नेता हो भनेर बुझेका छन्। उनीहरुले यसअघि गरेको विकास पनि देखेका छन्। अरु उम्मेदवारहरुलाई पनि बाँके–२ का मतदाताले चिनेका छन्। कसको आधार र काम गर्ने तरिका के हो भनेर मतदाताले चिनेका कारण पनि सही निर्णय लिन्छन् भन्ने मेरो विश्वास छ।
हिजो गरेका काममा तपाईंले धेरै जोड दिनुभयो। नगरप्रमुख हुँदा गरेका कामकै आधारमा किन प्रतिनिधि सभामा भोट दिने? प्रतिनिधि सभा भनेको नीति बनाउने थलो हो। नगरको कामको ‘क्रेडिट’ले मात्र जिताउनु आवश्यक हुन्छ?
मैले भन्न खोजेको म नगरको नेतृत्वमा हुँदा पनि जनताकै सेवामा थिएँ भन्ने हो। नगरबाट विकासको काम गरियो अब देशकै विकास हुने र हितमा हुने नीति र कानुन बनाउन मेरो आवश्यकता भएकाले मलाई मत दिनुपर्छ भन्ने मेरो तर्क हो। मैले नगरमा हुँदा भ्रष्टाचार भन्दा सुशासनलाई जोड दिएँ। जनताको कामलाई महत्व र समय दिए। अब प्रतिनिधि सभाबाट जनतालाई नै केन्द्रमा राखेर काम गर्छु। यी सबै गर्नका लागि मलाई नै मतदाताले जिताउनु आवश्यक छ।
मतदानाबाट कस्तो प्रतिक्रिया पाउनु भएको छ?
अहिले म मतदातासमक्ष जाँदा सबै सकारात्मक रहेको पाएको छु। तपाईं हामीलाई आवश्यक मानिस हो भनेर भन्नु भएको छ। सबैले मलाई हौसला र साथ दिने वचन दिनु भएको छ। विभिन्न खालका मानिसहरुको आ–आफ्नै सुझाव छन्। विकास र सुशासन सबैको साझा चाहना छ।
नेपालगञ्ज हिन्दू र मुसलमानहरुको बाहुल्यता रहेको क्षेत्र हो। त्यहाँको सद्भाव र मतदातालाई रिझाएर मत पाउने तपाईंका कार्यक्रम के हुन्?
तपाईंले भनेजस्तै यो क्षेत्रमा अहिले राम्रो सद्भाव रहेको छ। म नगरको नेतृत्वमा रहँदा पनि त्यसलाई कायम गर्न धेरै मेहनत गरेको थिएँ। यहाँ सबैलाई मिलाएर लैजाने काम गर्दै आएको छु। ठूलो कुरा छैन।
राप्रपा गणतन्त्रप्रति र संघीयताप्रति अनुदार नीति लिएको पार्टी हो। राजा र हिन्दू धर्म भन्दै आउनु भएको छ। अहिले देश संघीयतामा छ। जनताले मत देलान्?
मैले त्यस्तो पाएको छैन। मतदाताको राप्रपाप्रति आर्कषण नै भएको पाएको छु। राप्रपाको अजेण्डा मन पराउनु भएको छ। संविधानमा फरक विचार राख्न पाइने भनेको छ। हामीले पनि फरक विचार मात्र राखेका हौं। हामी राजा र हिन्दु राज्य आवश्यक छ भन्ने पक्षधर हौं। यसमा हामीलाई गर्व छ। हामीले मतदातालाई यही कुरा भनेका छौं।
तपाईंको मुख्य प्रतिस्पर्धी को हो जस्तो लाग्छ?
निर्वाचनको मैदानमा आएपछि उम्मेदवार सबै प्रतिस्पर्धी हुन्। बाँके–२ मा हेर्दा नेपाली कांग्रेस र जसपाका बीचमा मुख्य प्रतिस्पर्धा हो। नेपाली कांग्रेसको पनि यो क्षेत्रमा राम्रै मत रहेको छ। त्यस्तै, जसपा यसअघिको विजेता हो। तर, यसपटक नेकपा एमालेले पनि हामीलाई सहयोग गरेका कारण म बलियो दाबेदार हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
