‘बाँके–२ को विकासका लागि मैले फेरि जित्नु आवश्यक छ’

राजनीति

बाँके–२‘बाँके–२ को विकासका लागि मैले फेरि जित्नु आवश्यक छ’

नेपाल लाइभ आइतबार, कात्तिक ६, २०७९ १६:२७

मोहम्मद ईश्तियाक राई निर्वतमान सांसद एवं निर्वतमानमन्त्री हुन्। बाँके–२ बाट २०७४ सालमा उनी निर्वाचित भएका थिए। तत्कालीन समयमा आफूविरुद्ध एमाले–माओवादीको वाम गठबन्धन र नेपाली कांग्रेस–राप्रपाको गठबन्धन हुँदा पनि उनी विजयी भएका थिए। उनी दोस्रोपटक उक्त क्षेत्रबाट जित हात पार्दै सांसद हुने दाउमा रहेका छन्।

नेपालगञ्ज उपमहानगरपालिका मेयर भइसकेका राप्रपा महामन्त्री धवल शमशेर राणा चुनावी मैदानमा छन्। राणालाई नेकपा एमालेले सर्मथन गरेको छ। स्थानीय तहको मतभार हेर्दा नेपाली कांग्रेस बलियो देखिए पनि जसपाका राई ‘लोकप्रिय’ छन्। २०७४ सालको निर्वाचनमा उनी विजयी भएकाले निरन्तरता दिने रणनीतिमा चुनावी मैदानमा छन्। नेपाली कांग्रेसले सुदीपनरसिंह राणालाई उम्मेदवार बनाएको छ भने लाोसपाबाट अब्दुल हन्नान जसगढ उम्मेवार छन्। यस्तो अवस्थामा जित निकाल्ने राईको रणनीतिक के छ? उनले आफ्नो समीक्षा कसरी गरिरहेका छन्? यही सेरोफेरोमा रहेर नेपाल लाइभले उनीसँग गरेको कुराकानी :

बाँके–२ बाट फेरि पनि तपाईंको उम्मेदवारी किन?
अघिल्लोपटक मैले यो क्षेत्रबाट जित हात पारेको थिएँ। यसपटक पनि चुनावी मैदानमा छु। यो यहाँका जनताको आवश्यकता पनि हो। यहाँको विकासका लागि मैले थालेका केही अधुरा योजनाहरु पूरा गर्नका लागि म फेरि चुनावी मैदानमा उत्रेको हुँ। बाँके–२ का जनताले अघिल्लोपटक जसरी विश्वास गरेर मलाई प्रतिनिधि सभाको सांसदको रुपमा पठाउनुभयो, योपटक पनि पठाउनु हुन्छ भन्ने मेरो विश्वास छ। म नै किन उम्मेदवार भनि तपाईंले प्रश्न गर्नु भयो, यो क्षेत्रको भूगोलदेखि यहाँका जनतासम्म बुझेको मानिस भएकाले मेरो उम्मेदवारी हो।

यो पटक उम्मेदवार भइरहँदा तपाईंका अजेन्डाहरु के–के हुन्?
मेरो अजेन्डा भनेको यो क्षेत्रको विकास र समग्र देशका लागि असल नीति र कानुन बनाउने हो। विगतमा मैले सांसदको रुपमा समितिको सदस्यको रुपमा र मन्त्रीको रुपमा पनि केही भूमिका खेलेको छु। म बाँके–२ बाट निर्वाचित सांसद भएपनि समग्र देशलाई केन्द्रमा राखेर नीति बनाउने सांसद हुँ। मेरो पहिलो प्राथमिकता देश हुने छ अनि मेरो निर्वाचन क्षेत्र हुने छ।

मैले यस क्षेत्रका लागि केही योजना बनाएको छु। यसको समग्र विकास र विकासको क्षेत्रमा यसलाई अग्रस्थानमा देखाउने योजनाहरु छन्। सडक, खानेपानी, ढल र अन्य कुराहरुलाई विगतमा पनि प्राथमिकता दिएर काम गरेको हो। अब पनि त्यही कुरामा केन्द्रित हुनेछु। केन्द्रीय सांसदको रुपमा र मन्त्रीको रुपमा पनि मैले सकिँदो यस क्षेत्रको विकास र समृद्धिका लागि काम गरेको छु।

बाँके–२ मा तपाईंसँगै अन्य उम्मेदवार पनि चुनावी मैदानमा छन्। उनीहरुले पनि यस्तै दाबी गर्ने गरेका छन्। ती उम्मेदवारभन्दा तपाईं कसरी फरक?
पक्कै पनि निर्वाचनको मैदानमा धेरै उम्मेदवारहरु रहनु भएको छ। सबैले आ– आफ्ना कुरा राख्नु हुने छ। मतदाताले त्यसमा पनि को चाहिँ काम गर्ने र को गफ मात्र गर्ने हो भनेर छुट्याउनु पर्दछ। त्यसका लागि विगतमा काम गरेको आधार मतदाताले पक्कै लिनु हुने छ। यस क्षेत्रका लागि विगतमा कसले कति योगदान दियो त्यसले पनि फरक पार्छ भन्ने मलाई लाग्दछ।

सबै उम्मेदवारहरुले आ–आफ्ना अजेन्डा अघि सारेर जाने हो। मतदाताले कसको कुरा वास्तविक छ, कसले कति काम गर्न सक्छ त्यसलाई छानेर मतदान गर्ने हो। मतदाता त्यो कुरामा सचेत छन्। विगतमा पनि सचेत थिए। अब आउने निर्वाचनमा पनि सचेत भएरै मतदान गर्ने छन्। मेरा कामहरुको निरन्तरताका लागि पनि म यो क्षेत्रबाट विजयी हुन जरुरी छ।

तपाईं विगतमा पनि सांसद हुनुभयो। मन्त्री हुनुभयो। तर, मन्त्रीका लागि अवसर उपयोग मात्र गर्ने काम गर्नुभएको आरोप छ नि?
मन्त्री बन्ने कुरा पार्टीको निर्णयको आधारमा हुने हो। पार्टीले म यसका लागि योग्य छु भन्ने लाग्यो अनि मलाई मन्त्री बनाएको हो। म दुई पटक मन्त्री भएपनि कुनै विवादमा आउने कार्य गरेको छैन। देशको समग्र हितमै काम गरेको छु। देशको विकास निर्माणकै लागि काम गरेको छु। जनताले पनि त्यसको मूल्यांकन गरेका छन्। सार्वजनिक सञ्चारमाध्यमले पनि मेरो मूल्यांकन गरेका छन्।

तपाईंको मुख्य प्रतिस्पर्धी को हो जस्तो लाग्छ?
निर्वाचनको मैदानमा उम्मेदवारी दिने सबै प्रतिस्पर्धी हुन्। तर, अहिले निर्वाचनको मैदानमा हेर्दा नेपाली कांग्रेस र राप्रपा–एमाले गठबन्धनका उम्मेदवार मुख्य प्रतिस्पर्धी हुन्। स्थानीय तहको मत र जनआधारले पनि यी दुई पार्टी बलियो भएकाले प्रतिस्पर्धीको रुपमा राखेको छु। मैले मतदातालाई सबैलाई हेरेर मतदान गर्न अनुरोध गरेको छु।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

एमाले इलामको अध्यक्षमा बराल निर्वाचित

राष्ट्रिय कर दिवसः उत्कृष्ट करदाता सम्मानित

मायादेवी मन्दिरमा लुम्बिनी लायन्सको जर्सी सार्वजनिक