काठमाडौं– मंसिर ४ गते हुने प्रदेश र प्रतिनिधि सभा निर्वाचनका लागि राजनीतिक दलहरु यतिबेला घोषणापत्र निर्माणमा केन्द्रित छन्। निर्वाचन आउन एक महिनाको समय बाँकी रहँदा दल तथा उम्मेदवारहरू घोषणापत्रलाई अन्तिम रुप दिने चटारोमा छन्।
प्रमुख राजनीतिक दलहरु अन्य कुरालाई थाति राखेर भएपनि घोषणापत्रलाई अन्तिम रुप दिने तयारीमा छन्। यही तयारी स्वरुप प्रमुख प्रतिपक्ष पार्टी नेकपा एमालेका अध्यक्ष केपी शर्मा ओली महासचिव शंकर पोखरेल र उपमहासचिव विष्णु रिमाललाई लिएर काठमाडौंदेखि अलि पर लाकुरीभञ्ज्याङ पुगेका थिए। एमाले घोषणापत्रलाई अन्तिम रुप दिने चरणमा छ।
त्यस्तै, नेपाली कांग्रेसले घोषणापत्रलाई अन्तिम रुप दिन लागिरहेको छ। कांग्रेसले घोषणापत्रको मस्यौदा संशोधनसहित पारित गरिसकेको छ। कांग्रेसले घोषणापत्र निर्माणका लागि महामन्त्री विश्वप्रकाश शर्माको नेतृत्वमा समिति बनाएको थियो भने घोषणापत्र मस्यौदा निर्माण समिति अर्थविद स्वर्णिम वाग्लेको नेतृत्वमा गठन गरेको थियो।
अर्को राष्ट्रिय दल नेकपा माओवादी केन्द्रले पनि आफ्नो प्रतिवद्धतापत्र (घोषणापत्र)लाई अन्तिम रुप दिइरहेको छ। वरिष्ठ उपाध्यक्ष नारायाणकाजी श्रेष्ठको नेतृत्वमा माओवादीले विभिन्न क्षेत्रका विज्ञहरुलाई समावेश गर्दै भदौ ४ गते नै समिति गठन गरेको थियो। २०७२ सालको संविधान जारी भएपछि माओवादी पहिलो पटक आफैं घोषणापत्र तयार गरेर निर्वाचनमा होमिँदैछ।
२०७४ सालको निर्वाचनमा माओवादीले नेकपा एमालेसँग मिलेर वाम गठबन्धन गर्दै प्रतिनिधि सभा र प्रदेश सभा निर्वाचनमा भाग लिएको थियो। उक्त समयमा संयुक्त घोषणापत्र निर्माण भएको थियो। यसपटक नेपाली कांग्र्रेससहित वाम–लोकतान्त्रिक गठबन्धन बनाएर निर्वाचनमा केन्द्रित भएको माओवादीले एकल घोषणापत्र ल्याउने तयारी गरेको छ।
सुरुमा एकीकृत समाजवादीसँग मिलेर घोषणापत्र बनाउने भनिएपनि पछि एक्ला–एक्लै ल्याउने भएपछि दुवै पार्टीले आ–आफ्नो तयारी गरेका छन्। माओवादी केन्द्रको भदौ ४ गते बसेको स्थायी कमिटी बैठकले वरिष्ठ उपाध्यक्ष श्रेष्ठको संयोजकत्वमा घोषणापत्र मस्यौदा कार्यदल गठन गरेको थियो। कार्यदलमा नारायणकाजी श्रेष्ठ (संयोजक), महासचिव देव गुरुङ, वर्षमान पुन, जनार्दन शर्मा, शक्ति बस्नेत, गिरिराजमणि पोखरेल, लिलामणि पोखरेल, गणेश साह, अमृता थापालगायतका नेताहरु छन्।
घोषणापत्र मस्यौदा कार्यदलका सदस्य गणेश साहका अनुसार अध्यक्ष प्रचण्डले घोषणापत्रको मस्यौदामा समेट्न भनेर केही सुझाव दिएका छन्। प्रचण्डका सुझावहरु समेटेर थप संशोधनसहित घोषणापत्रलाई अन्तिम रुप दिने तयारी भइरहेको साहले बताए।
सत्ता गठबन्धन भर्सेस प्रतिपक्ष गठबन्धन
यसपटक निर्वाचनमा सत्ता गठबन्धन भर्सेस प्रतिपक्ष गठबन्धन हुने देखिएको छ। लोकतान्त्रिक वाम गठबन्धनमा नेपाली कांग्र्रेस, माओवादी केन्द्र, एकीकृत समाजवादी, लोकतान्त्रिक समाजवादी र राष्ट्रिय जनामोर्चा पार्टी रहेका छन्।
प्रमुख प्रतिपक्ष नेकपा एमालेसँग जनता समाजवादी, राप्रपा, राप्रपा नेपाल, कांग्रेस बीपीको तालमेल छ। एमालेले केही स्वतन्त्र उम्मेदवारलाई पनि सर्मथन गरेको छ। यसपटकको घोषणापत्रमा सत्ता गठबन्धनका दलहरुले एमाले अध्यक्ष केपी शर्मा ओलीले २०७७ पुस ५ र २०७८ जेठ ७ गते मध्यरातमा प्रतिनिधि सभा विघठन गरेको विषयलाई उठाउने भएका छन्। उनीहरुले बहुमत प्राप्त सरकार हुँदा कसरी एमालेले असंवैधानिक कदम उठायो भनी भोट माग्ने प्रयास गरेका छन्।
एमालेको नेतृत्वमा ३ वर्षसम्म सरकारले भ्रष्टाचार धेरै गरेको विषय पनि घोषणापत्रमा समेटिने कांग्रेसको घोषणापत्र मस्यौदा समितिका एक सदस्यले बताए। केपी शर्मा ओली नेतृत्वको सरकारले स्वास्थ्य सामग्री खरिदमा भ्रष्टाचार भएको, विभिन्न व्यापारिक समूहलाई अनुचित लाभ दिएको विषय सत्ता गठबन्धन आवद्ध दलहरुले आफ्नो घोषणापत्रमा समेट्दैछन्।
नेकपा एमालेले भने प्रतिनिधि सभा विघटनको बचाउ गर्दै सत्ता गठबन्धनको औचित्यमाथि प्रश्न उठाएको छ। एमालेले विघटन सही र जनताको अभिमत लिने कार्य भएकाले त्यसलाई अबको निर्वाचनमार्फत् जनताले अनुमोदन दाबी गरेको छ।
आफ्नो नेतृत्वमा तीन वर्षमा विकास र समृद्धि सुरु भएको तर, गठबन्धनले त्यसलाई रोकेको एमालेको आरोप छ। एमालेले घोषणापत्रमा सर्वोच्च अदालतदेखि अन्य संवैधानिक निकायसम्मका बारेमा पनि उल्लेख गरेको छ।
सत्ता गठबन्धनले सर्वोच्च अदालत आफू अनुकूल प्रयोग गरेको आरोप एमालेको घोषणापत्रमार्फत् जनतामा लैजाँदै प्रतिनिधि सभा विघटनको औचित्य पुष्टि गर्ने प्रयास गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
