काठमाडौं– जनता समाजवादी पार्टीबाट मन्त्री भएका मोहम्मद इस्तियाक राईले प्रधानमन्त्री शेरबहादुर देउवा र आफ्नो पार्टीबाट निर्देशन आएमा आफूहरु सरकार छाड्न तयार रहेको बताएका छन्।
नेपाल लाइभसँग कुरा गर्दै भौतिक पूर्वाधार तथा यातायातमन्त्री राईले जसपाले एमालेसँग तालमेल नभई केही निर्वाचन क्षेत्रमा सहमति मात्र गरेको भन्दै सरकार छोड्ने कुरा कतैबाट नआएको बताए।
‘सरकार छोड्न अहिलेसम्म प्रधानमन्त्रीले पनि भन्नु भएको छैन। पार्टीबाट पनि कुनै निर्देशन आएको छैन’, उनले भने ‘यदि कुनै निर्णय वा निर्देशन आउँछ भने तयार नै छु।’
उनले आफू निर्वाचन प्रचारका लागि जिल्लामा रहेको भन्दै सरकारबाट हट्ने बारे हल्ला सुनेको बताए। सरकारमा जसपाबाट चार जना मन्त्री रहेका छन्। सरकारमा राईसहित संघीय मामिला तथा सामान्य प्रशासनमन्त्री राजेन्द्रप्रसाद श्रेष्ठ, वन तथा वातावरणमन्त्री प्रदीप यादव, कृषि तथा पशुपन्छी विकासमन्त्री मृगेन्द्रकुमार सिंह यादव छन्।
पार्टीले प्रतिपक्षमा रहेको दलसँग तालमेल गरेपछि नैतिक रुपमा तपाईं सरकारमा बस्न मिल्छ भन्ने प्रश्नमा उनले भने, ‘हामीले एमालेसँग गठबन्धन गरेको होइन। कुनै–कुनै ठाउँमा तालमेल मात्र गरेका हौं। विगतमा स्थानीय तहमा पनि यस्तै तालमेल भएकाले यसलाई नैतिक रुमपा लिन आवश्यक छैन।’
सत्ता गठबन्धनभित्र भने जसपाका मन्त्रीहरुलाई लिएर असन्तुष्टि बढिरहेको छ। प्रधानमन्त्री शेरबहादुर देउवाले सरकारमा रहेका मन्त्रीहरु हटाउने र नयाँ नियुक्ती गर्न मिल्ने वा नमिल्नेबारे कानुनविद र निर्वाचन आयोगसँग पनि परामर्श गरेका थिए।
२०७४ सालमा पनि यस्तै विवाद भएको थियो। तत्कालीन समयमा सरकारको नेतृत्व देउवाले नै गरेका थिए भने माओवादी केन्द्र सरकारमा थियो। माओवादीले सरकारमै रहेर नेकपा एमालेसँग वाम गठबन्धन गरेको थियो। लगत्तै प्रधानमन्त्री देउवाले जिम्मेवारी खोसेर बिनाविभागीय बनाएका थिए।
यसपटक पनि यस्तै घटना दोहोरिएकाले जसपाका मन्त्रीहरूलाई सरकारबाट हटाउने तयारी गरिएको बुझिएको छ। मंगलबार बसेको सत्ता गठबन्धनको बैठकमा बागी उम्मेदवारको विषयमा छलफलमा केन्द्रित भएकाले मन्त्रीहरुको बारेमा कुनै छलफल नभएको एक नेताले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
