काठमाडौं– आगामी मंसिर ४ गते हुने प्रतिनिधि सभाको निर्वाचनमा विभिन्न अभियोग लागेर विवादित बनेका व्यक्तिहरुले पनि उम्मेदवारी दर्ता गराएका छन्।
यस्तो आरोप लागेकामध्ये कोही ज्यान मुद्दाका फरार आरोपी रहेका छन् त कोही भ्रष्टाचार प्रकरणमा मुछिएका छन्। यद्यपि यस्ता उम्मेदवार प्राय: सबै दलका नेताहरु नै हुन्।
आइतबार भएको मनोनयनमा यस्ता व्यक्तिले कोही आफैं उपस्थित भएर उम्मेदवारी दिएका छन् भने केहीले वारेसमार्फत उम्मेदवारी दर्ता गराएका छन्। यसरी उम्मेदवारी दिनेमध्येका एक हुन् विजयकुमार गच्छदार। कांग्रेस नेता तथा पूर्व उपप्रधानमन्त्रीसमेत रहेका गच्छदारले सुनसरी–३ बाट उम्मेदवारी दिएका छन्। उनी निर्वाचन अधिकृतको कार्यालयमा उम्मेदवारी दर्ता गराउन आफैं उपस्थित भएका थिए।
ललिता निवासको सरकारी जग्गा व्यक्तिको नाममा बनाउने कार्यमा संलग्न रहेको भन्दै उनलाई अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको थियो। लामो समयदेखि उनी फरार हुँदै आएका थिए। तर, पछि अदालतमा उपस्थित भएर उनी धरौटीमा छुटेका थिए।
तर, विशेष अदालतमा उनीविरुद्धको मुद्दा अहिले पनि विचाराधीन छ। यस्तै विवादितमध्येका अर्का उम्मेदवार हु्न् टेकबहादुर गुरुङ। कांग्रेस नेता गुरुङले पनि आइतबार निर्वाचन अधिकृतको कार्यालयमा आफैं उपस्थित भएर उम्मेदवारी दर्ता गरेका थिए।
उनले पनि भ्रष्टाचारको अभियोग खेपिरहेका छन्। फनपार्कको जग्गामा भ्रष्टाचार गरेको आरोपमा गुरुङविरुद्ध २०७६ माघमा मुद्दा परेको थियो। उनीमाथि ३१ करोड बिगो दाबी गरिएको थियो। २०७५ चैत्रमा धरौटीमा छुटेका थिए। उनलाई सर्वोच्च अदालतले साधारण तारेखमा छाडेको थियो।
भ्रष्टाचार आरोपी मात्र होइन, कर्तव्य ज्यान मुद्दामा पक्राउ पूर्जी जारी भएर फरार रहेका आरोपीले पनि यसपटक उम्मेदवारी दर्ता गरएका छन्। जिल्ला अदालत सिन्धुपाल्चोकबाट पक्राउ पूर्जी जारी भएका एक आरोपितले वारेसमार्फत् प्रदेश सभाको उम्मेदवारी दर्ता गराएका छन्।
सिन्धुपाल्चोकको प्रतिनिधि सभा १ को प्रदेश सभा (क) मा नेकपा एमालेबाट उम्मेदवार बन्दै युद्ध विक्रम तामाङ (डिवी लामा) ले वारेसमार्फत् उम्मेदवारी दर्ता गराएका हुन्। ज्यान मार्ने उद्योगमा जिल्ला अदालत सिन्धुपाल्चोकबाट उनीविरुद्ध केही महिनाअघि पक्राउ पूर्जी जारी भएको थियो।
पक्राउ पूर्जी जारी भएपछि फरार रहेका उनी उम्मेदवारी दर्ता गर्न आउने हल्लापछि प्रहरी पक्राउ गर्ने तयारीका साथ पुगेको थियो। प्रहरीले पक्राउ गर्ने जानकारी पाएपछि उनी उम्मेदवारी दर्ता गर्न आएनन्। उनले आफ्नो उम्मेदवारी अधिवक्ता एवं एक जनप्रतिनिधिमार्फत् वारेस राखेर दर्ता गराए।
अधिवक्ता शशिनाथ आचार्यमार्फत् वारेसबाट उम्मेदवारी दर्ता गराएका हुन्। आचार्य इन्द्रावती गाउँपालिका ६ का वडाध्यक्ष हुन्। उनीविरुद्ध रोजिन बस्नेतसहित ६ जनाले जेठ २ गते ईलाका प्रहरी कार्यालय, बाह्रबिसेमा ज्यान मार्ने उद्योगमा जाहेरी दिएका थिए। प्रहरीले अनुसन्धानपछि उनीविरुद्ध कर्तव्य ज्यानको उद्योगमा मुद्दा दायर गरेको थियो। असार ९ गते जिल्ला अदालत सिन्धुपाल्चोकमा दायर भएको मुद्दामा अदालतले पक्राउ पूर्जी जारी गरेको छ। एमाले नेताहरुले भने उनी सोमबार अदालत उपस्थित भएर न्यायिक प्रक्रियाको सम्मान गर्ने बताएका छन्।
यस्तै कांग्रेसका पूर्वसहमहामन्त्री तथा पूर्वगृहमन्त्री गोविन्दराज जोशीले तनहुँ–१ बाट प्रतिनिधिसभा सदस्यका लागि स्वतन्त्रबाट प्रत्यक्षमा उम्मेदवारी दिएका छन्। उनले भ्रष्टाचार गरेको आरोपमा सर्वोच्च अदालतमा मुद्दा खेपिरहेका छन्।
उनलाई कांग्रेसले २०७५ पुसमै पार्टीको हित विपरीत काम गरेको भन्दै पार्टीबाट निष्काशन गरेको थियो। अहिले उनले रामचन्द्र पौडेलको प्रतिस्पर्धी बनेर उम्मेदवारी दर्ता गराएका छन्। उनीविरुद्धको मुद्दा पनि सर्वोच्च अदालतमा विचाराधीन छ।
यस्तै नागारिक उन्मुक्ति पार्टीका नेता रेशम चौधरीले बर्दिया–२ बाट आफ्नो उम्मेदवारी दर्ता गराएका छन्। चौधरीले बर्दिया २ बाट वारेसमार्फत उम्मेदवारी दर्ता गराएका हुन्। चौधरी व्यक्ति हत्या (टीकापुर) घटनामा अदालतबाट जन्मकैदको सजाय तोकिएर हाल डिल्लीबजार कारागारमा रहेका छन्। उनलाई जिल्ला र उच्च अदालतले जन्म कैदको फैसला सुनाएको हो। उनको मुद्दा अहिले सर्वोच्चमा विचाराधीन छ।
यसैगरी, जन्मकैदकै सजाय तोकिएका अर्का दोषी लक्ष्मण थारूले कैलाली–३ बाट प्रत्यक्षतर्फ उम्मेदवारी दिएका छन्। उनले वारेसमार्फत् उम्मेदवारी दर्ता गराएका छन्। उनलाई पनि व्यक्ति हत्या (टीकापुर) घटनामा अदालतबाट जन्मकैदको सजाय तोकिएको छ। उनलाई जिल्ला उच्च अदालतले दोषी ठहर गरेको छ। तर, उनी अहिले फरार सूचीमा रहेका छन्। उनको मुद्दा पनि अहिले सर्वोच्चामा विचाराधीन छ।
आइतबार जनता समाजवादी पार्टीबाट बाहिरिएर नेकपा एमालेमा प्रवेश गरेका लक्ष्मी महतोले महोत्तरी–१ बाट प्रतिनिधि सभामा उम्मेदवारी दिएका छन्। सशस्त्र प्रहरीका सहायक निरीक्षक (असई) थमन विकको हत्यामा मुछिएका उनले वारेसमार्फत् उम्मेदवारी दर्ता गराएका हुन्। मधेश आन्दोलनमा सशस्त्र प्रहरीका असई विक हत्या प्रकरणका अभियुक्त महतोले मिथिलेशप्रसाद यादवमार्फत् मनोनयन दर्ता गराएका छन्।
यस्तै रातो पासपोर्ट दुरुपयोग मुद्दामा विवादित बनेका एमाले नेता नारदमुनि रानाथारुले पनि कैलाली ५ बाट प्रतितिनिध सभाका लागि उम्मेदवारी दर्ता गराएका छन्। उनलाई रातोपासपोर्ट बेचेको आरोप लागेको छ। उनीविरुद्धको उक्त मुद्दा सर्वोच्चमा अहिले विचारधीन छ। विशेष अदालतबाट भने उनले सफाइ पाइसकेका छन्।
यस्तै विभिन्न आयोजनाको ठेक्दा लिएर अलपत्र पारेको आरोप लागेका राप्रपा नेता विक्रम पाण्डेले पनि यसपटक उम्मेदवारी दर्ता गराएका छन्। उनले चितवन ३ बाट आफ्नो उम्मेदवारी दिएका हुन्। सिक्टा सिँचाइ आयोजनामा भ्रष्टाचार गरेको उनीमाथि आरोप लागेको छ। विशेष अदालतले चार करोड धरौटीमा २०७५ माघ मा छाडे पनि उनको मुद्दाको टुंगो भने लागिसकेको छैन। उनीविरुद्धको उक्त मुद्दा विशेष अदालतमा अहिले पनि विचाराधीन छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768395492.png)
