विराटनगर– आगामी निर्वाचनमा मोरङका ६ वटै क्षेत्रमध्ये ४ वटामा पुरानै उम्मेदवारहरुबीच मुख्य प्रतिस्पर्धा हुने देखिएको छ। बाँकी दुई क्षेत्रमा पनि केही पुरानै अनुहार नै चुनावी मैदानमा छन्। प्रतिनिधिसभातर्फ मोरङ–२ र ४ बाहेक मोरङ–१ , ३ , ५ र ६ मा प्रमुख ठूला दलका पुरानै अनुहारहरु चुनावी मैदानमा छन्।
सत्ता गठबन्धनबाट मोरङ–१ मा प्रतिनिधि सभा सदस्यमा उम्मेदवारी दर्ता गरेका नेपाली कांग्रेसका डिक बहादुर लिम्बु र अघिल्लो पटक उनैलाई पराजित गरेका एमालेका निवर्तमान सांसद घनश्याम खतिवडा अहिले पनि प्रतिस्पर्धी बनेका छन। ती दुवै उम्मेदवार तेस्रो पटक भिड्दैछन्। २०७० मा भएको दोस्रो संविधानसभा चुनावमा लिम्बुले खतिवडालाई सोही क्षेत्रमा पराजित गरेका थिए। २०७४ को चुनावमा खतिवडाले नतिजा उल्ट्याएका थिए।
यसैगरी, मोरङ–३ मा कांग्रेसबाट उम्मेदवार बनेका डा सुनिल शर्मा र नेकपा एमालेका उम्मेदवार भानुभक्त ढकालबीच दोस्रो पटक प्रतिस्पर्धा हुँदैछ। २०७४ को निर्वाचनमा वाम गठबन्धनका उम्मेदवार ढकालसँग कांग्रेसका शर्मा पराजित भएका थिए।
मोरङ–५ मा पनि पुरानै अनुहार चुनावी मैदानमा देखिएका छन्। २०७४ को चुनावमा जितेका माओवादी केन्द्रका शिवकुमार मण्डल र जनता समाजवादीका राज कुमार यादवबीच फेरि प्रतिस्पर्धा हुने भएको हो। अघिल्लो निर्वाचनमा वाम गठबन्धनका उम्मेदवार मण्डलले जसपाका यादव र कांग्रेसका उम्मेदवार अमृत अर्याललाई पराजित गरेका थिए। तर, यसपटक मण्डल सत्ता गठबन्धनका तर्फबाट उम्मेदवार बनेका छन् भने यादव एमाले–जसपा गठबन्धनका उम्मेदवार हुन। अघिल्लो पटक प्रतिनिधि सभामा प्रतिस्पर्धा गरेका अर्याल चाहिँ यसपटक प्रदेश सभामा खडा भएका छन। सो क्षेत्रमा एमालेका योगेन्द्र मण्डलले स्वतन्त्र उम्मेदवारी दिएका छन्।
मोरङ–६ मा पनि यसपटक पुरानै प्रतिस्पर्धी देखिएका छन्। सत्ता गठबन्धनबाट नेपाली कांग्रेसका डा शेखर कोइराला र एमालेबाट लालबाबु पण्डितबीच मुख्य प्रतिस्पर्धा हुने देखिएको छ। २०७४ को चुनावमा वाम गठबन्धनका उम्मेदवार पण्डितले कांग्रेसका उम्मेदवार कोइरालालाई पराजित गरेका थिए। अघिल्लो चुनावमा माओवादी केन्द्रबाट उम्मेदवार बनेका गोपाल कटवाल पनि यसपटक पार्टी परिवर्तन गरि सो क्षेत्रमा राप्रपाबाट चुनावी मैदानमा छन्।
मोरङ–२ मा कांग्रेस नेतृ सुजाता कोइराला र नेकपा एमाले मोरङका अध्यक्ष ऋषिकेश पोखरेलबीच प्रतिष्पर्धा हुँदैछ। उनीहरु बीचको यो प्रतिस्पर्धा पहिलो हो। तर, एमालेका उम्मेदवार पोखरेल सो क्षेत्रका पुरानै अनुहार हुन्। २०७० को दोस्रो संविधानसभा निर्वाचनमा कांग्रेसका उम्मेदवार आमोद प्रसाद उपाध्यायलाई हराएका पोखरेल २०७० को चुनावमा कांग्रेसका डा मिनेन्द्र रिजालसँग पराजित भएका थिए।
त्यस्तै, मोरङ–४ मा अघिल्लो पटक वाम गठबन्धनबाट निर्वाचित माओवादीका अमनलाल मोदी भने यसपटक एमालेका नयाँ अनुहार विनोद ढकालसँग भिड्दैछन्। मोदी सत्ता गठबन्धनका उम्मेदवार हुन्। २०७४ को चुनावमा मोदीले कांग्रेसका महेश आचार्यलाई पराजित गरेका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
